Imparamus a nos difèndere dae su “virus” de sas NOVAS FARSAS

In custu tempus de inserru, a intro de domo, nos depimus difèndere dae su Coronavirus ma fintzas dae un’àteru male  chi intrat in onni domo dae sos mèdios de comunicatzione, in manera particulare computer e telefoneddos chi totu tenimus e impreamus. Sa tecnologia est de importu mannu in custu tempus chi semus vivinde, si est impreada bene, ca cunsentit de fàghere cosas meda dae domo e de pòdere istare a faca mancari istende a tesu! Però b’est fintzas su perìgulu de nche rùere in calchi trampa, de èssere vìtimas de un’àteru “virus” chi est cussu chi, cun faeddos modernos, si narat “fake news”, est a nàrrere sas novas farsas. A totus nos est capitadu de lèghere, e carchi borta mandare a àtere, novas chi nos pariant de importu ma, a dolu mannu, non fiat gasi! Duncas tocat de dare atentzione a su chi si leget e in antis de difùndere est semper mègius de èssere seguros chi siant cosas sèrias iscritas dae espertos de su tema chi tratant.

A custu propòsitu su CORECOM SARDEGNA (chi est su Comitadu regionale pro sas comunicatziones de sa Regione Sardigna e est òrganu de consulèntzia e tutela in sas comunicatziones) at aprontadu unu decàlogu in ue dat 10 cussìgios pro si tutelare dae sas novas farsas chi, màssimu in custas dies difìtziles, càpitat de lèghere. Su chi cussìgiant est de si fidare de sa iscièntzia ebbia; de dare atentu dae in ue benit sa nova e chie l’at iscrita; de abbaidare fintzas su tipu de iscritura e istare atentos a non difùndere novas farsas e a non dare o mandare dinari sena èssere seguros chi non siat carchi trufa.

(M.G.S.)