Iscriimus de Grazia Deledda: un'invitu pro autores pagu connotos

Fotografia iscarrigada dae Internet

Pro festare sos 150 annos dae sa nàschida de Grazia Deledda sa Provìntzia de Nùgoro, su MAN, UniNuoro e sa Fundatzione de Sardigna ant aviadu un’annu de manifestatziones dedicadas a s’iscritora sarda.

Su diretore artìsticu Anthony Muroni at propostu su programma “Gràssia, sa fèmina chi no at postu làcanas a sas àteras fèminas”, chi previdet manifestatziones de tantos tipos pro istitutziones e iscolas, e una de custas est dedicada a autores pagu connotos chi ant a pòdere imbiare artìculos, sàgios o contos chi tenent comente argumentu s’òpera literària de Grazia Deledda.

Una cummissione literària capitanada dae Muroni at a valutare su materiale imbiadu, e sos mègius traballos los ant a publicare in su situ ufitziale (https://www.150graziadeledda.it), cun s’idea de fàghere nàschere unu logu de cunfrontu chi, movende dae sos temas tratados dae sa Deledda afrontet finas argumentos cullegados a sa modernidade.

Chie cheret partetzipare podet mandare su materiale a https://www.150graziadeledda.it/giovani-autori/

(GF.P.)