Ite b'at de istranu? Mahmood e sa frase "Ja ti la credias cras!"

Mahmood e sa mama - Fotografia dae Internet

In custas dies at fatu ispantu mannu a totus chi su cantante Mahmood, binchidore de su Festival de Sanremo, saludende a sos parentes a pustis de sa vitòria apat naradu a sa mama: "Ja ti la credias cras!" cherende significare "Quando mai lo avresti creduto (che io vincessi di nuovo)?"

Totus si nde sunt ispantados: a chie at pensadu chi l'apat fatu pro tènnere visibilidade mediàtica, a chie chi l'apat fatu pro brulla, a chie pro una forma de balentia, o pro amore pro sa limba sua, o pro bàntidu, o pro provocatzione...

A pagos lis est bènnida a conca sa cosa prus iscontada: pro Mahmood su sardu est limba naturale, ca cun sa mama la faeddat onni die. In cale limba la deviat saludare, in finlandesu?

Ite riflessione nde podimus bogare, dae custu pubusone chi s'est pesadu? Pro me, duas ebbia.

Sa prima est chi pro su cantante su sardu est su chi est: una limba che totu sas àteras, chi impreat onni die in manera naturale sena birgòngia, sena bàntidu e sena bisòngiu de dare ispiegatzione peruna a nemos.

Sa segunda riflessione est chi pro su prus de sos sardos cussa limba est totu foras chi naturale: la faeddant pagu, no l'imparant a sos fìgios, nde tenent birgòngia in pùblicu e acusant a chie l'impreat de chèrrere visibilidade.

Si pro sos sardos sa limba issoro fiat istada "naturale", no aiant tentu bisòngiu de la giustificare nen de la bantare nen de la criticare nen de l'impreare pro argumentos "sensìbiles" ebbia lassende totu sos àteros campos a sa limba italiana. L'aiant faeddada e bastat, comente at fatu Mahmood cun sa mama.

Ascurta su vìdeu de su saludu de Mahmood a sa mama.

(GF.P.)