Sos ritos de Chida Santa

Oe, lunis 11 de abrile, comintzat sa Chida Santa 2022.

Sa Chida Santa, in Sardigna, est unu momentu importante in sa vida de sas comunidades: protagonistas sunt sas cunfrarias chi nd'acumpàngiant cun devotzione totu sos passos, ma est unu momentu de partetzipatzione manna pro totu sas biddas.

Sìmbulos e riferimentos meda benint dae sa traditzione ispagnola e si sunt aunidos cun ritos presentes in Sardigna dae sos tempos antigos. Unu de custos est s’usàntzia de pònnere su nènnere, trigu postu a crèschere sena lughe, chi rapresentat sa vida chi torrat a nàschere dae s'iscuru e dae sa morte. Belle totu s'ìsula tenet sas traditziones suas.

Sas prus connotas sunt S’Iscravamentu (‘la deposizione di Gesù dalla croce’) e S’Incontru (‘l’incontro di Gesù risorto con Maria sua madre’), ma b’at finas àteros ritos prus pagu connotos e bellos meda, chi agatamus fotografados in su libru I riti della Settimana Santa in Sardegna de Giulio Concu e Franco Stefano Ruiu, publicadu in su 2007 dae s’editore Imago Multimedia de Nùgoro. Sa versione in pdf, posta a disponimentu dae sa Sardegna Digital Library, si podet iscarrigare (sena pagare nudda) dae su link https://www.sardegnadigitallibrary.it/mmt/fullsize/2008120919582700007.pdf.

Chie cheret carchi informatzione in prus si podet cullegare a sa pàgina de Sardegna Cultura o abbaidare su vìdeu de  Novas in Tv - La Regione a casa tua  chi tratat pròpiu de custu argumentu.

(GF.P.)