Segundu atopu de "Su sardu in iscola" in Ossi

A pustis de sa bona resurtada de s'atopu "Su sardu in iscola" fatu in S'Ulumedu, s'Assemblea Natzionale Sarda (ANS) cun s'agiudu de su Comune de Ossi est aparitzende·nde un'àteru, pro faeddare ancora de s'inserimentu de sa limba sarda in iscola.

S'atopu s'at a fàghere in Ossi su 10 de maju 2022 a sas 5 e mesa de sero (h 17,30) in su Tzìnema Casablanca (carrera Sardigna) e at a èssere un'oportunidade de formatzione pro sos mastros de s'Istitutu Cumprensivu "A. Gramsci" de Ossi, chi s'ant a pòdere cunfrontare cun espertos de psicolinguìstica e linguìstica e cun dirigentes e mastros de iscola chi ant giai inseridu su plurilinguismu in sas iscolas issoro.

S'Amministratzione comunale s'est impignada meda pro fàghere partetzipare sos mastros, cun s'isetu chi s'Istitutu Cumprensivu si fatzat iscola plurilìngue cantu primu.

"Est pròpiu custu s'iscopu de custos atopos: - narant  sos sòtzios de ANS - fàghere a manera chi sos mastros, cumprendende sos benefìtzios de su plurilinguismu pro sos pitzinnos, fatzant retza, s'agiuent e pòngiant a cumone sas esperièntzias, sighende modellos de giudu chi giai esistint, comente su de s'Istitutu Cumprensivu "Satta-Fois" de Pèrfugas.

Custos atopos a tema, chi tenent s'iscopu de fàghere intrare su bilinguismu in totue (dae sas iscolas a sas istitutziones locales) si podent fàghere pro more de sa collaboratzione intre Universidade de Tàtari, Istitutu Cumprensivu "Satta-Fois" de Pèrfugas, assòtziu "Spaciada sa Bregùngia", assòtziu "Corona de Logu" e Assemblea Natzionale Sarda.

Su programma si podet abbaidare in su situ de ANS.

Chie est interessadu a fàghere carchi atopu in bidda sua podet iscrìere a sa mail de ANS a s'indiritzu info@assembleasarda.org.

(GF.P.)