Sos laboratòrios culturales de ocannu - Carchi fotografia

Su 15 de santugaine 2022 sunt acabadas sas atividades culturales aprontadas dae s'Ufìtziu de sa Limba Sarda e finantziadas cun su dinari de sa L. 482/1999 e L.R. 22/2018 annualidade 2021.

Sos laboratòrios de ocannu ant aunidu s'imparu de sa limba a sas atividades traditzionales, pro chi sos pitzinnos esserent postu in movimentu sa creatividade blocada dae duos annos de pandemia.

In acordu cun s'amministratzione de Bosa, Comune capufilera, s'ufìtziu at aparitzadu 5 laboratòrios:

- In Bosa sos pitzinnos ant imparadu a laurare ('fare il filet') gràtzias a s'impignu de sas espertas de sos tres assòtzios de làuru bosincu, La Foce, Manos de Oro e Ea de 'Osa.

- In Iscanu Antiogu Milia at trasmìtidu a sos giovaneddos s'arte antiga de su cantu a cuncordu.

- Montresta, Sune e Tresnuraghes ant tentu a disponimentu sas connoschèntzias de Tore Vacca, "artesanu de sa linna" chi at imparadu a sos pitzinnos a giogare cun sos giogos antigos.

Ponimus in fatu carchi fotografia pro ammentare sos momentos bellos chi amus bìvidu paris cun sos pitzinnos.