Un'aplicatzione pro impreare Facebook in sardu in dispositivos Android

Esistit giai dae 5 annos ma finas a sa chida passada si podiat impreare in computer e in dispositivos mòbiles ebbia cun programmas pro navigare in Rete (Chrome o Internet explorer).

Dae sa chida passada, imbetzes, Facebook in sardu si podet impreare in sos dispositivos Android gràtzias a un'aplicatzione noa, MaterialFB, chi permitit de navigare comente chi si siat impreende unu browser ma cun funtzionalidades meda in prus, e totu in sardu.

Comente fàghere a impostare MaterialFB in limba sarda?

Podides intrare in sa pàgina de Aplicatziones in sardu e chircare sa nova de su 20 de abrile 2020, in ue b'est totu ispiegadu. Si tenides dificultade a l'agatare, su situ www.istorias.it in s'artìculu "M'apo fatu Facebook in sardu in su telefoneddu" bos ispiegant totu bene.

Si nde cherides ischire de prus de comente est nàschida custa initziativa bella a beru, e si cherides connòschere sos promotores, abbaidade custu vìdeu chi ant fatu Lisandru Beccu e Martine Faedda carchi mese a como.

(GFP)