Tinnura - Cursu pro imparare a nadare e Iscola de murales

Su Comune de Tinnura faghet a ischire a chie est interessadu chi s'at a fàghere unu cursu pro imparare a nadare a sos pitzinnos dae sos bator a sos batòrdighi annos de edade. S'at a fàghere in su villàgiu "Abbamala" in Bosa. Sunt previstas 18 letziones. Sas domandas cherent presentadas a su Comune de Tinnura intro de su 13/05/2014. 

Faghet a ischire fintzas chi organizat unu "Cantiere scuola Murales" pro 15 persones, dae sos 16 annos in susu, residentes in Tinnura. Si b'at postos disponìbiles s'ant a ammìtere fintzas sos chi non sunt residentes. Su cursu s'at a fàghere dae su 21/07/2014 a su 02/08/2014 dae sas noe a mesudie (h 09,00-12,00) e a su sero dae sas tres a sas ses (h 15,00-18,00). Sas domandas de iscritzione iscadint su 30/05/2014. 

Pro cale si siat informatzione preguntare in Comune.  

Preguntade a nois

Preguntade a nois.

Preguntade a nois operadores, si cherides ischire a ite serbit un'istandard de iscritura in limba sarda. Preguntade a nois chi l'impreamus ogni santa die: l'impreamus "netu" in blog e in documentos, e l'impreamus "contaminadu" in social network, posta eletrònica e sms, pro imbàtere a cantu prus gente podimus, pro comunicare novas e ideas, pro ingustare sos giòvanos a sa bellesa de sa limba sarda, pro lis fàghere a cumprèndere chi su sardu est limba che sas àteras.

Preguntade a nois, si cherides ischire cantu nos bisòngiat, a tènnere una norma pro iscrìere.

Totu custas cuntierras "istandard emmo, istandard nono", totu custu chircare su pilu in s'ou, totu custu chèrrere fraigare su mundu dae bella-nou, totu custu chèrrere diferentzialismos, sèberos imboligosos, anàlisis ispietadas, los faghet chie non tenet bisòngiu de una limba de impreare OE, una limba chi siat fàtzile a l'iscrìere, chi siat fàtzile a l'ammentare e a la cumprèndere. Lu faghet chie est trancuillu ca tantu tenet prontu s'istandard italianu de Manzoni.

Ma nois no. A nois non nos nd'importat nudda de sas gherras intestinas, non nos nd'importat de chie si nde cheret istratzare sa resone a mossu e nemmancu de chie si ochiet pro non nàrrere chi carchi resone la tenent sos àteros puru. A nois nos bisòngiat una limba pro iscrìere. Punto.

E duncas preguntade a nois, si cherides ischire a ite serbit un'istandard.

Sune - Sos caddos birdes de Santu Pancràtziu

In Sune su 12 de maju si festat a Santu Pancràtziu (o, comente narant sos sunesos, Santu "Brecatzu"). Una paristòria antiga narat chi in sa crèsia de Santu Pancràtziu b'aiat unu putzu cun abba miraculosa. Sa die de sa festa sos chi curriant a caddu in  onore de su Santu faghiant inghiriare sa crèsia a sos caddos cando su Vicàriu naraiat sa Missa. In su mentres faghiant bufare a sos caddos s'abba de unu putzu collocadu in dae segus de s'altare majore. Si bufaiat s'abba cando su Vicàriu cunsagraiat s'òstia, su caddu si faghiat birde.  

Bosa - Su Rotary cunsignat duas bursas de chirca

Custu sero a sas 5 e mesa (h 17,30) in s'àula magna de su litzeu Pischedda in Bosa su Rotary Club at a cunsignare duas bursas de chirca a sas dutoressas Maristella Pitzalis e Magdalena Zoledziewska de s'Istitutu de Chirca Genètica e Biomèdica de su CNR de Casteddu.

Su finantziamentu de custas bursas (fatas pro istudiare mègius sa diabete) benit dae sa bèndida de su libru "Rimas e frores" de Augusto Piras e Cicita Solinas, e dae su dinari regortu dae sos genitores de pitzinnos diabèticos de sa zona de Aristanis (FAND Assòtziu Diabèticos).

A festare sos 108 in chelu

Eris est morta sa fèmina prus betza de Iscanu. "Tzia" Nannedda Chessa, difatis, aiat festadu sos 107 annos in su mese de santandria.

Cando l'aìamus fatu sos augùrios, aìamus ammentadu su contu de cando "tzia" Nannedda, pitzinna de unos binti annos, pro pregare vida a su babbu moribundu aiat pedidu a Deus de dare a issu 10 de sos annos suos. E difatis su babbu fiat sanadu ma paret chi Deus apat chertu premiare custa atzione de amore dende a Nannedda annos e annos de vida, istimada dae chie totu l'at connota.

Semus seguros chi est giai bidende sa cara de cussu Deus chi at amadu e pregadu totu vida.

S'interru est lunis 5 de abrile in Iscanu.

Leghe su contu de "tzia" Nannedda