ARCHIVIU NOVAS DE SOS ANNOS COLADOS
Unu cortometràgiu cun su contu de comente ant fundadu a Montresta
Chi Montresta est nàschida in su 1750, cando Carlo Emanuele III at fatu imbàtere a Sardigna 148 grecos, l'amus iscritu in carchi artìculu publicadu in sos annos colados.
Custas dies, navighende in sa Retza, amus agatadu unu bellu cortometràgiu chi nde faeddat, fatu dae sos pitzinnos montrestinos in su 2015 intro de su laboratòriu "La fondazione di Montresta" postu in òpera in sa de XIII editziones de su festival "L'isola del teatro & l'isola raccontata". Est fatu cun sa tècnica de su "stop-motion" (fotogramma pro fotogramma) cun figureddas de plastilina.
Sos pitzinnos de assora como sunt giovaneddos, e de seguru ant a tènnere praghere de si torrare a bìere.
Su cortometràgiu si podet abbaidare incarchende in custu link.
Gara de poesia a bolu
In
ammentu de sa prima e de s'ùrtima gara de Remundu Piras, sos oberajos
de santu Cristolu de Montresta organizant una "gara de poesia a bolu"
pro su 27 de abrile 2019 a sas 9 e mesa de sero (h 21,30).
Reladore
at a èssere su professore Tore Patatu; sos interventos los ant a
fàghere su sìndigu de Montresta Antoni Zedda e su sìndigu de Biddanoa
Monteleone Chirigu Melone, chi est nebode de Remundu Piras.
In s'ocasione ant a cantare Celestino Mureddu, Barore Ladu e Peppinu Donaera.
"MontrestaInnesta" 2019
Su Comune de Montresta bos invitat a partetzipare a s'editzione 2019 de "MontrestaInnesta", apuntamentu annuale pro sos amantiosos de sos innestos, chi s'at a fàghere domìniga 17 de martzu 2019.
Comente
onni annu, sos innestadores ant a atopare a su campu isportivu a sas 9 e
mesa (h 9,30), e dae sas 10 ant a comintzare sos innestos, cun s'agiudu
de mastros e de espertos de s'arte.
A sero si podet bisitare sa bidda o prenotare un'escursione guidada a sos logos de sos bentùrgios.
Chie si cheret tratènnere a gustare podet prenotare telefonende a su nùmeru 339-4054771 (tratoria-pitzeria "Cristoforo Deriu").
S'istòria de sa bidda presentada in sa "Die Mundiale de sa Cultura Ellènica"
Sa
pelea de sos Grecos de Montresta
at a èssere argumentu de s'interventu chi Antonio Zedda, sìndigu de
Montresta, at a fàghere in sa "Die Mundiale de sa Limba e de sa Cultura
Ellènica 2019" chi s'at a fàghere
sàbadu 9 de freàrgiu 2019 in su litzeu clàssicu "De Castro" de Aristanis.
Sa
die l'at istituida sa Repùblica Ellènica in su 2016 e tenet s'iscopu de
mustrare s'importàntzia chi sa limba greca at tentu pro formare sa
tziviltade europea e mundiale. Su tema de ocannu est "Il viaggio delle
idee".
Su litzeu "De Castro" at a ospitare istudiantes e professores de sos litzeos clàssicos de totu sa Sardigna chi tenent sa possibilidade de presentare temas, contos, poesias e filmados. At a èssere presente finas su litzeu Pischedda de Bosa.
Cuntestu espressivu a beru, duncas,
pro faeddare de s'insediamentu de sos grecos in su territòriu de
Montresta, chi dae su 1750 at causadu tantas cuntierras in totu su
territòriu bosincu.
Pro tènnere carchi informatzione in prus si podent lèghere sos artìculos de
repubblica.it e de
linkoristano.
Cursu pro imparare a fàghere sa "pizza"
Su
Comune de Montresta paris cun s'assòtziu "Pizzaioli e Cuochi"
(AP&C) de Tàtari organizat unu cursu professionale pro imparare a
fàghere sa
"pizza".
Su
cursu est de 90 oras de teoria e pràtica e at a comintzare su 7 de
martzu 2019. Chie partètzipat at a retzire s'atestadu de frecuèntzia e
s'atestadu HACCP.
Pro
cale si siat informatzione si podet telefonare a su Comune de Montresta
a su nùmeru 0785-30003 (internu 6) dae sas 9 a sa una (h 13,00).
Santu Antoni de su Fogu 2019
Su 16 de ghennàrgiu totu sa Sardigna festat a Santu Antoni de su Fogu faghende fogulones.
In Montresta
dae paritzos annos est traditzione de fàghere chena comunitària,
càntigos e ballos. Ocannu sa festa comintzat a sas 3 (h 15,00) allumende
su fogulone in pratza de crèsia betza ("chiesa di Sant'Antonio").
A sas 5 (h 17,00) si faghet su vèsperu in onore de su santu e a pustis sa beneditzione de su fogu.
Dae
sas 6 a sas 10 de sero (h 18,00-22,00) si podet chenare in carrera:
b'at a àere pulenta cun ghisadu, sartitza arrustida cun patata, pane e
cosa de bufare pro totus (binu, birra o abba) paghende ebbia 10 èuros.
Su Comitadu at a dare "sas frisciolas"
(tzìpulas longas) a totus e su sero at a èssere allegradu dae su
cuntzertu de su coro Lu Fruntuni e Lus Amics de La Muraglia de
S'Alighera.
Pro informatziones si podet telefonare a Leonarda Fois (328-3862053).
Seis totus invitados a partetzipare!
Mùsica antiga e moderna pro sas festas de Nadale
Montresta
pro sas festas de Nadale aunit sa mùsica traditzionale a sa mùsica moderna,
faghende tres eventos musicales chi balet sa pena de bìdere: su 26 de nadale
a sas 9 e mesa de sero (h 21,30) in su Tzentru de Agregatzione s'at a fàghere
sa gara de cantu a poesia cun Peppinu Donaera de Ossi, Salvatore Ladu de
Sarule, Celestino Mureddu de Aidumajore e su Tenore de Sèneghe.
Su 27 de
nadale a sas 7 de sero (h 19,00) in crèsia magiore s'at a esibire su coro
de Magumadas.
Su 29 de
nadale a sas 9 de sero (h 21,00) in su Tzentru de Agregatzione b'at a
èssere su cuntzertu de Flo, sa cantante napoletana chi cantat "de amore
e de àteras cosas irreversìbiles".
Seis totus
invitados a partetzipare.
"Seros de ilgerru": initziativas pro
su tempus de Nadale
Su Comune e sa
Pro Loco de Montresta organizant "Seros de ilgerru", una sèrie
de initziativas pro passare in allegria sos seros longos e anneosos de s'ierru.
Si comintzat
su 5 de nadale cun sa sagra de su porcheddu intreu. Su 7 b'at una gara
de cantu a poesia cun sos cantadores Donaera, Ladu e Mureddu.
Su 23 sa Pro
Loco aparitzat su Nadale de sos pitzinnos e preparat tzìpulas pro chie
totu b'at a partetzipare.
Su 29 b'at
unu cuntzertu de su Flo Trio (in su tzentru de agregatzione).
Su 6 de
ghennàrgiu sa Pro Loco torrat a fàghere una festa pro sos prus piticos, cun
tzìpulas pro chie totu b'andat.
Su 16 de
ghennàrgiu, festa de sant'Antoni de su Fogu, torrat s'apuntamentu cun sa sagra
de su concale e de sa sartitza montrestina.
Chie cheret
tènnere su calendàriu cumpletu podet iscarrigare sa locandina dae inoghe.
VI Sagra de sos pipiriolos
In Montresta
su 14 de austu a sas 8 e mesa de sero (h 20,30) pratza IV Novembre s'at
a fàghere sa de VI editziones de sa Sagra de sos pipiriolos, pasta
tìpica de sa bidda fata in domo cun sabidoria antiga dae sas fèminas
montrestinas.
Custa pasta
la cundint cun ghisadu de angione o porcabru e cun casu pilotu ('pecorino'), e
bos cussigiamus de l'assagiare ca, comente si narat, "bos nd'ais a
lìnghere sos mustatzos!"
(Abbàida su vìdeu
de comente si faghent sos pipiriolos).
Programma "Isola del teatro" 2015
Dae s'8 a su
30 de austu torrant a
comintzare sas atividades de su fèstival "L'isola del teatro &
l'isola raccontata", chi ocannu est imbàtidu a sa de XIII editziones e
s'at a fàghere siat in Montresta siat in Bosa.
Su
calendàriu est ricu comente semper: b'at ispetàculos teatrales, presentadas de
libros, film e cuntzertos, e non mancant sos giogos pro sos pitzinnos.
Sinnalamus
in manera particulare sa proietzione de su documentàriu "Oil"
de Massimiliano Mazzotta, chi faeddat de s'indùstria petrolchìmica Saras e de
sos dannos chi est faghende a sa salude de sos abitantes de Sarrocu (sa
proietzione s'at a fàghere mèrcuris 12 de austu in Bosa e giòbia 13 in Montresta).
Interessante
est finas su cortometràgiu "La valigia di Tidiane Cuccu" de
Umberto Siotto. Si bi faeddat de tziu Antoni Cuccu, editore de libreddos
in sardu, chi cun traballu ùmile e silentziosu at salvadu dae s'ismèntigu
tantas cantzones antigas. Su traballu suo l'est mandende a in antis Cheick
Tidiane Diagne, senegalesu e amigu mannu de tziu Cuccu (sa proietzione
s'at a fàghere mèrcuris 19 de austu in Montresta e giòbia 20 in Bosa).
Pro
iscarrigare su programma cumpletu de "L'isola del teatro" bos
podides cullegare a su situ o a sa pàgina Facebook.
"Montresta Innesta" 2015
Su Comune de
Montresta bos invitat a partetzipare a sa de VI editziones de "MontrestaInnesta",
chi s'at a fàghere domìniga 29 de martzu.
S'atopu est
a sas 9 e mesa (h 9,30) in su campu isportivu, e dae sas 10 mastros e espertos
de innestu ant a imparare a sos noitolos s'arte de innestare su pirastru. A
sero si podet visitare sa bidda e sos murales suos, o prenotare un'escursione
guidada a sos logos de sos bentùrgios.
Chie cheret
si podet tratènnere a gustare e finas a chenare (gustu + chena costat 20,00
èuros) prenotende a su nùmeru 0785/30052 (tratoria-pitzeria "Cristoforo
Deriu" - Montresta).
Totu sas
informatziones s'agatant in sa locandina, chi si podet iscarrigare dae inoghe.
Montresta delìberat contra a su depòsitu de iscòrias
nucleares
Su 30 de
ghennàrgiu de su 2015 su Cussìgiu comunale de Montresta at deliberadu su nono
contra a cale si siat ipòtesi de pònnere iscòrias nucleares o radioativas in
Sardigna, in lìnia cun sa delìbera n° 16 fata su 14.07.2010 e in su rispetu de
sos resurtados de su referendum de su 15/16 de maju de su 2011.
Unu
documentu importante, chi leat ancora prus fortza cun sas delìberas fatas dae
sos Cussìgios comunales de onni bidda de Sardigna.
Sa delìbera
de Montresta si podet iscarrigare dae inoghe.
Sant'Antoni de su Fogu
Su 16 de
ghennàrgiu totu sa Sardigna festat a Sant'Antoni de su Fogu faghende fogulones.
Su Comune de Montresta dae paritzos annos in custa die faghet sa sagra de sa
sartitza o "de su porcheddu montrestinu".
Sa festa
comintzat a sas 4 (h 16,00) allumende su fogulone. A sas 5 e mesa (h 17,30)
b'est sa Missa animada dae su coro polifònicu de Magumadas, e a pustis sa
beneditzione de su fogu.
A sas 8 (h
20,00) comintzat sa sagra de su porcheddu montrestinu: b'at a àere sartitza
arrustida, fae a landinu e binu nieddu pro totus, e in prus sa mùsica e sos
ballos de su grupu folk Figulinas de Fiolinas.
Seis totus
invitados a partetzipare!
Lisa Mills ("boghe ispantosa" de su sound
americanu) in cuntzertu
Su 21 de
nadale a sas 9 e
mesa de sero (h 21,30) in su tzentru de agregatzione sotziale de Montresta
(carrera de s'Asilu n° 5) s'at a esibire Lisa Mills, unu de sos talentos
artìsticos prus mannos de su panorama blues americanu de sos ùrtimos vinti
annos.
Nàschida in
Mississipi, Lisa Mills in sa mùsica sua (chi est un'ammesturu de formas blues,
gospel, country e rock&roll) bi ponet sas sonoridades tìpicas de cussa
terra caraterizada dae formas musicales particulares meda. L'ant definida
"una boghe ispantosa" e at collaboradu cun artistas famados
che Eric Clapton, George Harrison e Robert Plant.
Un'ocasione
ùnica pro totu sos apassionados de mùsica, bidu chi custu cuntzertu est abertu
a totus e non si pagat nudda!
Cuntzertu de Nadale
Sa Pro Loco
de Montresta bos invitat a partetzipare a su cuntzertu chi s'at a fàghere su
24 de nadale 2014 a sas 4 de sero (h 16,00) in pratza.
S'ant a
esibire sonadores de organitu ('fisarmonica'), de "clarinetto"
e de bassu elètricu.
Seis totus
invitados a partetzipare.
Calendàriu manifestatziones "Isola del
Teatro" 2014
Publicamus
su calendàriu de sas manifestatziones de "L'Isola del Teatro" chi si
faghet in Montresta dae s'11 a su 31 de austu 2014.
Ocannu,
comente semper, s'ant a fàghere ispetàculos, films, presentadas de libros e
laboratòrios pro pitzinnos e mannos.
Chie nde
cheret ischire de prus si podet cullegare a su situ
http://www.isoladelteatro.it/.
Pro
informatziones si podet telefonare a su nùmeru 0785-30003 (Comune de Montresta)
o 340-0767866 (Emanuele Masillo).
Custu sero projetzione de su film "Capo e Croce -
Le ragioni dei pastori"
Custu sero a
sas 10 (h 22,00)
in s'anfiteatru de Montresta s'at a projetare su film-documentàriu "Capo
e Croce - Le ragioni dei pastori" de Marco Antonio Pani e Paolo
Carboni.
Su film,
premiadu comente mègius documentàriu italianu in su Film Festival de
Torino, est unu documentu chi faeddat de sa vida de sos pastores sardos intre
traballu fitianu e gherras pro sos deretos negados.
Sas ripresas
sunt comintzadas in su 2010, cando 10.000 pastores fiant calados a Casteddu a
protestare ca su prètziu de su late fiat tropu bassu e sas aziendas non bi la
faghiant prus a campare.
A bortas sa
polìtica non bi pensat chi onni famìllia sarda est fata manna pro more de su
traballu de carchi pastore ("semus totus pastores" fiat
s'islogan de cussu tempus o, pro la nàrrere cun Francesco Casula, "si
morit su pastore morit sa Sardigna intrea").
Si sos
polìticos aiant amministradu sa Regione "cun su matessi cuidadu chi
tenet su pastore atendende a sa famìllia sua", forsis sas cosas
in Sardigna fiant andadas unu paghitzeddu mègius.
V Sagra de sos Pipiriolos
Sàbadu 19 de
trìulas in Montresta s'at a fàghere sa de V editziones de sa Sagra de sos
pipiriolos.
Sos pipiriolos
sunt una calidade de pasta fata in domo, saborida meda e tìpica de Montresta,
chi si cundit cun ghisadu de angione o de porcabru e cun casu pilotu
('pecorino').
Sa festa
incomintzat a ora de sas 6 ('h 18,00 circa') in dae in antis de s'iscola mèdia
betza, e ocannu b'at una novidade: sos voluntàrios chi ant a dare su sàmbene in
cussu mese (dae sa prima die de trìulas a su 19) ant a retzire una portzione de
pipiriolos sena pagare nudda. Sos àteros ant a pagare 6 èuros.
Ammentamus
chi s'emoteca at a èssere in Montresta su 13 de trìulas.
Comente seberare s'arga
Su 26 de
cabudanni a sas 6 (h 18,00) in s'Àula de su Consìgiu de su Comune de Montresta
s'at a fàghere una riunione pùblica pro faeddare de sas règulas noas pro
seberare s'arga, essende chi dae sa prima die de santugaine in totu su
territòriu de s'Unione de sos Comunes ant a partire sas règulas noas.
Sos
Montrestinos sunt invitados totus a partetzipare.
Su pane e sa pasta in laboratòrios, atopos e leturas
Su 27 de
cabudanni Montresta at a ospitare sa manifestatzione "Letture di gusto
/ Il pane e la pasta", inserida in su progetu "I libri aiutano
a leggere il mondo" chi cheret valorizare sos territòrios e sos
produtos tìpicos issoro.
Sa
manifestatzione est su resurtadu de s'impignu de tantos: Comune, Pro Loco, Coldiretti
locale, "Filiera del grano duro di Sardegna", assòtzios,
cooperativas, aziendas e paneterias.
Programma:
A sas 9 in
sa Ludoteca comunale: "Dae sa terra a sa mesa", laboratòriu
gastro-culturale pro sos alunnos de s'Iscola primària de Montresta.
A sas 10,30
in sa Paneteria de su bistocu: "Saperi e sapori del pane"
(laboratòriu pro imparare a fàghere su bistocu) pro sos istudiantes de s'Iscola
Alberghiera de Bosa.
A sas 11,00
in pratza IV Novembre: "Cucina d'autore", ispetàculu
gastronòmicu pro sos istudiantes de s'Iscola Alberghiera de Bosa.
A sas 4 e
mesa (h 16,30) in pratza IV Novembre: "Pipiriolande"
(laboratòriu pro imparare a fàghere sos pipiriolos) pro chie totu cheret
partetzipare.
A sas 5 e
mesa (h 17,30) in su Salone polivalente: "Grano di Sardegna, grano
d'Europa" (Cunferèntzia, leturas temàticas e acumpangiamentu musicale).
A sas 7 (h
19,00) in pratza IV Novembre: "Letture di gusto - Aperitivo
letterario" a cura de Gilberto Arru e Alessandra Guigoni.
IV Sagra de sos Pipiriolos
Sa Pro Loco
de Montresta organizat pro su 10 e 11 de austu sa " IV Sagra de sos
Pipiriolos".
Sos pipiriolos
sunt una calidade de pasta fata in domo, saborida meda, chi si cundit cun
ghisadu de angione o de porcabru e casu pilotu ('pecorino').
Sa festa
incomintzat a ora de sas 6 ('h 18,00 circa') in dae in antis de s'iscola
mèdia betza, e at a èssere animada dae sonadores e cantadores.
Su menu
previdit: pipiriolos, berbeghe montrestina, patata frissa, sìndria
(regalada dae sa Pro Loco de Arborea), e pane fatu in domo cun madrighe grega.
Sa cuota pro
partetzipare est de 13,00 èuros pro su pastu cumpretu. Chie cheret pipiriolos
ebbia pagat 7,00 èuros; chie cheret petza ebbia pagat 4 èuros.
Laboratòrios pro sos pitzinnos
Dae su 9 a
su 23 de austu sos
pitzinnos de Montresta s'ant a pòdere ispassiare in sos laboratòrios
organizados dae su Comune paris cun "L'Isola del Teatro".
Sas datas
sunt sas chi sighint:
Die
|
Ora
|
Atividade
|
09/08/2013
|
19,00
|
La Monolfiera terrestre trottola
|
09/08/2013
|
22,00
|
Circus Maccus
|
17/08/2013
|
22,00
|
Cammina… cammina… lucertolina
|
23/08/2013
|
18,00
|
Nata dalla luna
|
Comente sunt isparidos sos gregos
Chenàbura
passada, su 26 de trìulas 2013, in Montresta s'est fata sa presentada de su
libru "Nostos, Montresta e i Greci. Diaspore, emigrazioni e colonie nel
Mediterraneo dal XVIII al XIX secolo" (a cura de Stefano Pira), libru
chi contat s'istòria de Montresta dae sa nàschida a dies de oe.
Comente
s'ischit, in su 1750 su re Carlo Emanuele III aiat fatu bènnere dae Còrsica 148
gregos pro fraigare una bidda noa. Custos massajos gregos, però, no ant tentu
vida fàtzile siat pro sas cuntierras cun sos pastores bosincos (chi si cheriant
meres de cussas terras), siat pro sas dificultades cun su guvernu sardu, siat
pro su dèpidu chi teniant cun s'eràriu, siat pro problemas religiosos cun sa
diòtzesi de Bosa.
Custu libru,
pro mesu de s'anàlisi de chentinas de documentos, isorbet su mistèriu de
comente in pagu prus de 80 annos dae Montresta sunt isparidos sos gregos. La
Marmora, chi si bi fiat firmadu in su 1836, b'aiat agatadu duos gregos
ebbia, e aiat iscritu chi sos àteros fiant istados "tutti uccisi a poco a
poco, e quelli che non morirono de balla, come si dice nell'Isola,
morirono de Deus, falcidiati dall'aria malsana tipica dei luoghi".
Custu libru
ponet in evidèntzia imbetzes chi su prus de sos gregos si nche fiant andados,
comente iscriet giai in su 1772 su giùighe Gavino Cocco narende chi
s'Istadu cussu dinari antitzipadu a sos massajos gregos no l'at a torrare a
bìdere, a motivu de "la fuga, morte o simili di una gran parte di quei
greci-corsi, che furono invitati ad abitare la detta villa".
Pro chie est
interessadu, su libru s'agatat in libreria e costat 20,00 èuros.
Sos fogos de Santu Giuanne
Montresta
ocannu cheret festare a Santu Giuanne premiende sos fogos prus bellos.
Sa Pro Loco
dat a ischire chi totus sunt invitados a sa festa chi at a comintzare a sas 9 e
mesa de sero (h 21,00) de domìniga 23 de làmpadas (leghe sa nova).
Sa
traditzione de sos fogos de Santu Giuanne esistit in totu Europa e tenet
orìgines antigas meda.
Sos Romanos
a su 24 de làmpadas li naraiant Lampas o Dies Lampàrum ('giorno
delle lanterne'), ca si usaiat a andare peri sa campagna cun làmpanas e fracas.
Sos antigos
creiant chi cussu note fiat note de maja e de perìgulos, e chi essiant a campu
fortzas malignas a pònnere in perìgulu òmines, bestiàmene e incùngia. Pro
s'amparare dae totu sos perìgulos massajos e pastores allumaiant fogos
purificadores e faghiant ritos pro propitziare sa fertilidade.
In època
cristiana su simbolismu est cambiadu ma sas traditziones antigas si sunt
mantesas perdende su significadu originàriu.
Escursione
Pro domìniga
19 de maju su Museu Naturalìsticu de Montresta, paris cun su Comune
e cun sa cumpagnia de sos Barratzellos, organizat un'escursione a Silva
Manna.
S'atopu est
a su Museu a sas 9 de mangianu. Dae inie si andat a sa Punta 'e sa Cabina,
Su Casteddu, Baldu Druche, Coatos. Si recuit a Su Palatu a sas 5 de
sero.
Chie cheret
podet dare adesione pro mandigare (sa cuota est 5,00 èuros) telefonende a sos
nùmeros 348-8926692 e 348-8924711 o iscriende a
museonaturalisticomontresta@yahoo.it.
"Montresta Innesta" 2013
Domìniga 17 de martzu 2013 sos amantiosos de
sos innestos podent partetzipare a sa de V editziones de "Montresta
Innesta".
S'atopu est
a su campu isportivu a sas 9 e mesa, e dae sas 10 mastros e espertos de innestu
ant a imparare a sos noitolos s'arte de innestare su pirastru. A sero b'est
s'escursione guidada a sos logos de sos bentùrgios, e chie cheret si podet
tratènnere a chenare (gustu + chena costat 20,00 èuros).
Pro
s'informare e pro s'iscrìere telefonare a custos nùmeros: 079/9732057 (Bar
Passerò - S'Alighera); 0785/30052 (Bar "Da French" -
Montresta).
Bandu pro allogare panifìtziu
S'Amministratzione
Comunale de Montresta cheret allogare unu locale predispostu pro prodùere su
pane Bistocu de Montresta.
Podent
partetzipare a su bandu sos operadores chi s'impignant a impreare traballantes
residentes in Montresta (e bonos a fàghere custu traballu).
Chie est
interessadu a partetzipare devet presentare domanda intro de mesudie (h 12,00)
de su 22 de freàrgiu 2013.
Intervista a "tiu" Borànzelu Ruju
Dae sa
miniera de informatziones salvada in sa Libreria Digitale de Sardigna bogamus a
campu unu filmadu fatu in Montresta in su 2008. Est s'intervista a "tiu"
Borànzelu Ruju, unu pastore de otanta annos chi, cun memòria lùghida, ironia e
fortzis unu pagu de rimpiantu, faeddat de sa vida sua in su cuile.
Est unu
bellu documentu de torrare a ascurtare, màssimu como chi "tiu"
Borànzelu est mortu.
Chie cheret
podet abbaidare àteros vìdeos de Montresta in sa pàgina de su situ ufitziale
dedicada a "Montresta in Rete".
"Piccolo Festival 7° edizione"
Su Nadale
montrestinu est animadu ocannu puru dae sas manifestatziones de su "Piccolo
Festival", ch'est arrivadu a sa de VII editziones.
Sàbadu 29 e domìniga 30 in su Tzentru
de Agregatzione Sotziale s'ant a fàghere cunferèntzias, cuntzertos e
laboratòrios pro sos pitzinnos.
Vacinatzione
S'Ufìtziu de
sos Servìtzios Sotziales comùnicat a totu sos antzianos e a chie tenet deretu
pro patologia chi sa vacinatzione contra a s'influènzia s'at a fàghere su 3 de
nadale in su Centru de Agregatzione dae sas 2 (h 14,00) a sas 2 e mesa (h
14,30) .
Sa pelea de sos Grecos
Montresta est nàschida in su 1750, cando a Carlo Emanuele III l'est bènnida
s’idea de populare sos logos desertos de Sardigna e at fatu arrivare 148 Grecos
dae Còrsica.
Su re no aiat pensadu, però, chi in cussos terrinos sos Bosincos si
contaiant meres, e bidende·si ispodestados no l’ant sufrida e ant comintzadu
una gherra contra a sos massajos grecos, a su puntu de ordinzare una congiura
pro los ochire in su sonnu. Los at firmados ebia s'interventu de Lenardu Pira,
unu pastore chi s'est opostu.
Dae cussu momentu Montresta at vìvidu semper in gherra.
Sos fundadores (chie mortu "a balla”, chie mortu “de Deus” - comente
si naraiat pro sas epidemias -, chie torradu a Còrsica) si nche sunt ispèrdidos
e at arrivadu àteros massajos dae àteras biddas.
La Marmora passende in Montresta in su 1836 (mancu chentu annos a pustis de
s’insediamentu) b'at agatadu duos Grecos ebia.
Dae sos documentos parrochiales essit a campu chi s’ùrtimu Grecu, mortu a
98 annos in su 1844, si naraiat Elias Passerò, capostìpite de sos Passerò de
Montresta.
Fontes:
Marina Sechi Nuvole, Montresta. Storia e società (Sassari, EDES,
2005)
Costantino Moretti, Una colonia di Greco-corsi in Sardegna: Montresta
(Sassari, Carbongemma)
Montresta tra passato e presente. Storia, usi, costumi
(Sassari, Magnum-Edizioni, 2003)
Escursione annullada
Sas
voluntàrias de su Servìtziu Tzivile comùnicant chi s'escursione de su 28 de
santugaine est annullada in previsione de su tempus malu.
Escursione
Domìniga 28 s'at a fàghere sa prima escursione
organizada dae sas voluntàrias de su servìtziu tzivile paris cun su Comune e
cun su capitanu de sos barratzellos.
Si movet a
sas 9 dae su Casteddu, e s'at a torrare a sas 4 de sero (dae pagu prus a
mancu).
A pustis,
chie cheret podet visitare su museu naturalìsticu.
"NOSTOS". Dies de festa e de memòria
Pro no
ismentigare a cussos 148 Grecos chi l'ant fraigada, Montresta organizat duas
dies de festa e de memòria.
Sa
manifestatzione, intitulada "Nostos" (chi cheret nàrrere
'torrada a domo'), incomintzat chenàbura 28 de cabudanni a sas 5 e mesa
de sero in pratza "IV Novembre" cun sa presentatzione de su libru
"Nostos, Montresta e i Greci. Diaspore, emigrazioni e colonie nel
Mediterraneo del XVIII secolo" de Stefano Pira.
A sas 10 de
sero ballos e càntigos in pratza cun su grupu "Asi Gonia" de
Creta.
Sàbadu 29 est sa "Die de sa
memòria". A sas 5 e mesa de sero si faghet s'isfilada in costùmene. A
sas 6 e mesa in pratza de crèsia betza b'est sa mentzione solenne de sos
fundadores, e a sas 10 in pratza "IV Novembre" ballos e càntigos in
carrera cun su grupu "Asi Gonia" de Creta.
Domìniga 30 a sas 5 e mesa de sero in s'àula de
su Consìgiu, Michel Stephanopoli de Comnene at a retzire sa tzitadinàntzia
onorària.
A sas 8, pro
serrare sas festas, b'at a àere ballos e càntigos in pratza "IV
Novembre".
Festa de S. Antoni
Su 15, 16 e
17 de cabudanni in Montresta si festat a S. Antoni de Padua.
Programma:
Sàbadu 15 a sas 10 e mesa de note: Ispetàculu
musicale cun su grupu "Altatensione" chi cantat su repertòriu
de sos Nòmades.
Domìniga 16: A sas 11 Missa e prutissione
solenne. A sas 4 e mesa de sero giogos pro sos pitzinnos. A sas 10 de note
cantadores a chiterra cun Antonio Senes, Roberto Murgia e Stefano Sotgiu
acumpagnados dae Antonio Masala (chiterra) e Antonello Salis (fisarmònica).
Lunis 17 a sas 10 e mesa: Missa e cunsigna
de sa bandera a su Presidente nou.
"Mamma mia dammi cento L€U'RO"
Ite si
provat faghende sa vida de su migrante? Ite s'isperat, ite si disìgiat, cantas
delusiones e cantos gosos si tenent?
Sa Pro Loco
de Montresta organizat "Mamma mia dammi cento L€U'RO" e invitat a
chie cheret contare s'esperièntzia sua (de cando at mòvidu dae Montresta o
b'est imbàtidu) a mandare sos ammentos a s'indiritzu nostos2@gmail.com.
Unu "Centro Benessere" in su campu
polivalente
S'Amministratzione
comunale de Montresta est atretzende sos locales de su campu polivalente
pro nde fàghere unu "Centro Benessere".
Si b'at a
pòdere fàghere aerobica e cardio-fitness, una ginnàstica addata a giòvanos e a
gente manna.
Significadu de su nùmene
Sas
interpretatziones pro su nùmene Montresta sunt meda:
- SPANO
narat chi benit dae su fenìtziu est ('fuoco');
- MIGLIOR
narat chi benit dae mont ('monte') + resta ('spiga, grano');
- DEDOLA
narat chi benit dae s'acàdicu Mūtu ('demone della morte') e rēštû ('eminentissimo');
Sa prus
probàbile, però, paret s'interpretatzione chi dat PITTAU. Issu narat chi su
nùmene benit dae su sardianu o nuràgicu montestra, chi diat chèrrere
nàrrere 'zona pietrosa e rocciosa'.
Gita a "Diverland"
Pro lunis 6
de austu s'Amministratzione comunale organizat una gita a "Diverland"
(Quartucciu), unu parcu in ue b'at giogos acuàticos e divertimentu pro mannos e
minores.
Chie totu
cheret partetzipare podet dare sas adesiones in Comune.
Animatzione "Birbalandia"
Dae s'1 a su
30 de austu (foras de sa die de Mesaustu), pitzinnos e giovaneddos dae sos 6 a sos
14 annos s'ant a pòdere ispassiare cun sos giogos de "Birbalandia".
S'atopu est
a pratza Monumentu ogni die dae sas 5 a sas 8 de sero.
Museu naturalìsticu
Dae su mese
de austu in Montresta at a èssere operativu su museu naturalìsticu, chi esponet
esemplares de flora e de fàuna de sa Sardigna.
Nàschidu pro
dare visibilidade a su territòriu, su progetu "Montresta socialmente
naturale" at coinvoltu bator voluntàrias de su Servìtziu Civile
natzionale.
Chie est
interessadu si podet informare in Comune pro sos oràrios.
Sagra de sos pipiriolos
Su 12 de
austu de su 2012 sa Pro Loco de Montresta torrat a fàghere sa "Sagra de
sos pipiriolos".
Sos
pipiriolos, unu màndigu tìpicu de sa bidda, los faghent sas fèminas in domo dae
su tempus antigu e cun sabidoria manna.
A sa sagra
de ocannu b'est aunidu unu cuncursu de coghina.
Chie totu
est interessadu est invitadu a partetzipare.
S'Ufìtziu Limba Sarda est torra operativu
Dae su 2 de
trìulas est torra operativu in Montresta s'Ufìtziu de sa Limba Sarda.
Ocannu su
servìtziu est a livellu sovra-comunale (in rete cun totu sos Comunes de
s'Unione de Comunes de Planàrgia e Montiferru otzidentale). Su Comune capofila
est Iscanu.
Pro cale si
siat informatzione s'Ufìtziu est abertu ogni mèrcuris dae sas 9,30 a sas 13,30.
Nessun commento:
Posta un commento
Nota. Solo i membri di questo blog possono postare un commento.