ARCHIVIU NOVAS
Presentatzione libru "Il dono di Natale" de Sandru Dessì
Chenàbura 13 de austu 2021 a sas 9 de sero (h 21,00) in Bosa (cunventu betzu de Caputzinos), Sandru Dessì at a presentare su libru "Il dono di Natale", chi ponet in immàgines su contu omònimu de Gràtzia Deledda.
S'òpera, iscrita in tres limbas (sardu, italianu e inglesu), est illustrada dae Sandru Dessì e Viviana Faedda. Sas bortaduras sunt de Giovanna Bosu (pro su sardu), e Francesco Licheri (pro s'inglesu).
Sa presentada, inserida in sos eventos Linguaggi d'autore de sas manifestatziones de istiu cullegadas a Bosa città dei colori, est fata in collaboratzione cun s'assòtziu turìsticu Pro Loco "Melkiorre Melis" e Messy Lab. e cun s'Ufìtziu Limba Sarda de Pianalza e Montiferru otzidentale.
Dantedì 2021
Cras 25 de martzu 2021 est su "Dantedì", die natzionale dedicada a Dante Alighieri istituida dae su Cussìgiu de sos ministros in su 2020.
Ocannu est su de 700 annos dae sa morte de Dante e Bosa at detzisu de ammentare su Poeta cun una trasmissione de Radio Planargia in ue sos istudiantes de s'istitutu superiore "G.A. Pischedda" leghent su I cantu de sa Divina Cummèdia.
In sa trasmissione intervenent sa professora Paola Pintus, s'avocada Maria Giovanna Campus, s'archeòlogu medievalista professore Franco G.R. Campus, su regista de teatru dotore Alessandro Arrabito.
Sa trasmissione si podet ascurtare in streaming culleghende·si a www.radioplanargia.net a sas 10,00.
Museos gratis pro chie si firmat a corcare in Bosa
A andare a Bosa in custos meses cumbenit, màssimu si a unu l'agradat s'arte.
Sa Giunta comunale at aprovadu sa proposta fata de s'assessoradu a sa Cultura e Turismu pro fàghere promotzione de sa tzitade in tempus de pagu turismu e agiuare sas impresas cummertziales.
Totu sos chi s'ant a firmare a dormire in albergos o àteras istruturas ant a otènnere unu billete pro intrare a sos museos sena pagare nudda.
S'initziativa, chi balet finas a su 30 de abrile e est finantziada cun dinari de s'imposta de permanèntzia, permitit de visitare su museu "Casa Deriu", sa colletzione "Melchiorre Melis", sa pinacoteca "Atza" e su museu de sas contzas.
Sas istruturas interessadas a custu servìtziu podent ritirare sos billetes in sos ufìtzios de su Comune, telefonende a su nùmeru 0785/368022 pro cuncordare sa die.
Leghe sa nova in su situ de su Comune
Presentatzione "Suta de su matessi chelu"
In Bosa sighint sas manifestatziones de "Linguaggi d'autore 2020".
Cras 18 de austu s'at a presentare su progetu didàticu Suta de su matessi chelu, nàschidu dae unu contu de Stefania Spanedda, chi est istadu bortadu in sardu e in àteras 12 limbas.
Su
contu, pro more de sas illustratziones de Massimiliano Feroldi e de su
montàgiu de Valentina Giorgio, s'est trasformadu in unu vìdeu cartoon
chi in sa versione italiana tenet sa boghe de Rita Bittolo.
Sa
tradutzione in sardu l'at curada s'Ufìtziu Limba Sarda de Bosa, sa
colunna sonora l'at iscrita su jazzista nugoresu Bainzu Mùrgia e sa
boghe chi narat su contu est de Cristina Maccioni.
Sa presentatzione s'at a fàghere cras sero a sas 8 e mesa (h 20,30) in su Càrmene ('chiostro del Carmelo').
Essende chi sos postos sunt pagos pro sas normas anti-Covid, chie tenet
praghere de èssere presente si devet prenotare telefonende a su nùmeru
349-9360900 o mandende una mail a s'indiritzu prolocobosa@gmail.com.
"Linguaggi d'autore": unu biàgiu intre sas artes de sa tzitade de sos colores
Bosa ponet in vetrina sos mègius artistas suos, cun mustras e eventos culturales e musicales.
Dae
su 7 a su 25 de austu 2020 su Càrmene ('chiostro del Carmelo') s'at a
animare cun mustras de pitura, tessidura e artes de onni genia e eventos
musicales e culturales.
S'initziativa est de s'assessoradu a sa Cultura e Turismu de su Comune
de Bosa, paris cun s'assòtziu Melkiorre Melis; sa diretzione artìstica
la curat Stefania Spanedda de su Messy Lab collettivo Ceramiche de Torino, e sos eventos los presentat sa cantante Nila Masala.
Esponent
sas òperas issoro sos artistas Gianni Baldini, Carla
Bonomi, Salvatore Caria, Sara Castellano, Mariano Chelo, Sonia Congiu,
Bruna Cossu, Gloria Delitala, Nilla Idili, Pina Monne, Carey Mortimer,
Luigi Mozzo, Sandro Ruggiu, Stefania Spanedda, Anna Speranza. Sas
mustras ant a rispetare custos oràrios: 10,00-13,30; 18,00-21,00 (cando
b'at ispetàculu s'oràriu càmbiat e at a èssere 21,00-23,30).
Su
calendàriu de sos ispetàculos (chi comintzant su 12 e finint su 20 de
austu) l'agatades in sa locandina chi amus allegadu. Essende chi sos
postos sunt pagos pro sas normas anti-Covid, chie tenet praghere de
èssere presente si devet prenotare telefonende a su nùmeru 349-9360900 o
mandende una mail a s'indiritzu prolocobosa@gmail.com.
Contributos a sos assòtzios de Volontariadu e Promotzione Sotziale
Essende
chi in custos annos est crèschidu su nùmeru de famìllias chi tenent
bisòngiu, s'Amministratione comunale de Bosa at detzisu de crèschere
finas su servìtziu de assistèntzia econòmica ponende a disponimentu
agiudos alimentares e assistèntzia materiale.
Podent
partetzipare a su bandu sos assòtzios de Voluntariadu e de Promotzione
Sotziale iscritos in s'albo de sa Regione in ue tenent sede legale a sa
data de iscadèntzia de su bandu in argumentu.
Su finantziamentu at a èssere de 3.000 èuros pro 12 meses.
Sas domandas cherent presentadas intro de su 30 de su mese de santandria 2018.
Unu cursu pro imparare a filare sas nassas
S'assòtziu teatrale "Sas Comares"
organizat unu cursu pro imparare a filare sas nassas. Su mastru at a èssere
Alfonso Vidili, piscadore de Bosa cun esperièntzia manna.
Su cursu s'at a à fàghere in sos locales de su Càrmene.
Pro informatziones e pro s'iscrìere telefonare a su nùmeru 328-4915842 (Alfonso).
Cursos de alfabetizatzione in sardu annu 2018
S'Ufìtziu Limba Sarda est ativende in
Bosa sas atividades de formatzione pro su 2018.
Bi podent partetzipare dipendentes
comunales, amministradores e uditores esternos dae totu sos Comunes chi
ant aderidu a su progetu.
Sas letziones ant a comintzare mèrcuris 14/11/2018 (oràriu 15,30-17,30 in sa biblioteca comunale).
Chie cheret partetzipare devet compilare su mòdulu de iscritzione chi agatat in Comune (Ufìtziu Segreteria) e lu cunsignare intro de lunis 5 de santandria.
Sas
primas 3 letziones sunt pensadas pro chie no at mai partetzipadu a
perunu cursu, si b'ant a ispiegare sas règulas de base de sa Limba Sarda
Comuna cun laboratòrios pràticos de tradutzione. Dae sa de 4 s'at a
aprofundare s'argumentu cun esertzìtzios prus detalliados pro chie tenet
giai carchi connoschèntzia.
Pro partetzipare non si pagat nudda.
Presentatzione libru "Sinzos de poesia" de Angelo Maria Ardu
S'assòtziu culturale "Luisa Monti" cun s'apògiu de su Comune de Bosa bos invitat a partetzipare a sa presentatzione de su libru Sinzos de poesia de Angelo Maria Ardu, chi s'at a fàghere sàbadu 6 de santugaine 2018 a sas 6 de sero (h 18,00) in su Càrmene ('ex convento dei Carmelitani').
Sos
reladores sunt Sandro Biccai (iscritore e poeta), Eliano Cau (iscritore
e poeta), professor Luigi Mastino (sìndigu de Bosa). At a èssere
presente s'autore e a sa fine s'at a fàghere unu cumbidu.
Seis totus invitados a partetzipare.
Sa nàschida de Deus contada in sardu
Su 6 de
gennàrgiu 2015 (die de sos
Tres Res) in Bosa b'at un'eventu de non pèrdere: su presèpiu animadu e sa
rapresentatzione de sa Natividade in limba sarda.
S'eventu est
aparitzadu dae sa Consulta de sos Giòvanos paris cun s'assòtziu
teatrale-culturale Sas Comares chi dae annos meda est traballende pro
valorizare sa limba istòrica nostra.
Sos oràrios
de sas manifestatziones sunt sos chi sighint:
- h 11,00:
domos e magasinos de sa zona antiga ant a ospitare artigianos e produtores de
màndigos e binos locales.
- h
18,00: rapresentatzione de sa Natividade in limba sarda (a cura de s'assòtziu
teatrale-culturale Sas Comares).
Pro carchi
informatzione in prus bos podides cullegare a sa pàgina Facebook de s'eventu.
Su meràculu de Nadale
Domìniga 20
de nadale dae sas 9
de mangianu a sas 9 de sero (h 21,00) in Caputzinos s'at a fàghere sa
prima editzione de su "Meràculu de Nadale", trasmissione de
Sardigna1 presentada dae Gennaro Longobardi chi si faghet in contemporànea
finas in Casteddu, Igrèsias e Portu Turre.
Chie cheret
nche podet leare cosa de mandigare (a cunservatzione longa), produtos pro
pitzinnos e giogos.
S'eventu est
promòvidu e organizadu dae Sardinia4All e Hotel Mannu in collaboratzione cun sa
Caritas.
IV editzione de su prèmiu de poesia dedicadu a Luisa
Monti
S'assòtziu Luisa
Monti onlus e su grupu scout Bosa1 cun su patrotzìniu de su Comune
de Bosa bandint sa de IV editziones de su cuncursu de poesia sarda. Su tema de
ocannu est "Su traballu lassat s'òmine lìberu" e est
indiritzadu a chie totu cheret contare in versos s'importàntzia chi tenet su
traballu in sa sotziedade de oe.
Sos
cumponimentos cherent iscritos in limba sarda e mandados cun sa posta a
s'assòtziu "Luisa Monti onlus" o intregados a manu a sa
presidente Antonella Deriu intro de su 23/11/2015. In sa busta non bi
cheret postu su nùmene de chie l'imbiat.
Sa
premiatzione s'at a fàghere su 13 de nadale a sas 7 de sero (h 19,00) in su
Càrmene.
Su bandu
(fatu semper bilìngue comente in sos annos colados) si podet iscarrigare dae inoghe.
Pro ischire
chie fiat Luisa Monti e cando est nàschidu s'assòtziu leghe s'artìculu de Bentos.
Comintzant sos cursos de formatzione pro su 2015
(adesiones intro de su 30 de custu mese)
S'Ufìtziu
Limba Sarda est ativende in Bosa e in Iscanu sas atividades de formatzione pro
su 2015 (finantziadas dae sa L. 482/1999 annualidade 2012).
A sos cursos
bi podet partetzipare dipendentes comunales, amministradores e uditores
esternos dae totu sos Comunes chi ant aderidu a su progetu, e tocat a dare
adesione cumpilende su mòdulu e cunsignende·lu a s'Ufìtziu Protocollo de su
Comune de Iscanu o de Bosa intro de su 30/10/2015.
Su cursu
l'at a fàghere su sig. Antoni Nàtziu Garau, e at a tratare de custos
argumentos:
- Faeddare,
iscrìere, lèghere: règulas e trassas pro su tramudu de sa limba sarda dae
s'oralidade a s'iscritura;
- Ortografia
de sa limba sarda, chistiones morfo-sintàticas de su sardu, chistiones
terminològicas e tradutològicas;
-
Interlinguìstica sardu-italianu: calidades e formas de s'ammisturu.
Pro partetzipare
non si pagat nudda.
Sas
letziones s'ant a fàghere in sas datas e in sos oràrios chi sighint:
Bosa:
lunis
09/11/2015 h 15,00-18,00
lunis
16/11/2015 h 15,00-18,00
lunis
23/11/2015 h 15,00-18,00
lunis
30/11/2015 h 15,00-18,00
lunis
07/12/2015 h 15,00-18,00
lunis
14/12/2015 h 15,00-18,00
semper in sa
sala cunferèntzias de sa biblioteca
Iscanu:
mèrcuris
04/11/2015 h 15,00-18,00
mèrcuris
11/11/2015 h 15,00-18,00
mèrcuris
18/11/2015 h 15,00-18,00
mèrcuris
25/11/2015 h 15,00-18,00
mèrcuris
02/12/2015 h 15,00-18,00
mèrcuris
09/12/2015 h 15,00-18,00
semper in
s'àula de su Consìgiu de su Comune.
"Bosa Animation Awards" - Cuncursu pro
sos mègius cortometràgios animados
Su 3, 4 e 5
de cabudanni in Bosa
s'at a fàghere sa prima editzione de su Bosa Animation Awards, setzione
de su Sardinia Film Festival dedicada a sos mègius cortometràgios de
animatzione.
A su
cuncursu bi partètzipant 23 cortometràgios dae totu su mundu in prima visione
europea, seberados dae una giuria de espertos intro de prus de chentu
partetzipantes.
Su festival
est organizadu dae s'Assessoradu a su Turismu de su Comune de Bosa e dae su Cineclub
Sassari FICC.
Programma:
Giòbia
03/09/2015: h 18,30
presentada de su fèstival (MAP - cursu Vittorio Emanuele n° 71); h 20,30
proietzione de 11 cortometràgios in prima visione (Corte 'e Intro); h
22,30 "Notte bianca" cun sa mùsica de sa Banda Mescal e de
70Beat (cursu Vittorio Emanuele).
Chenàbura
04/09/2015: h 16,00
laboratòriu de animatzione pro pitzinnos (Museu de sas contzas - carrera E.
Schrerer); h 17,30 proietzione de sos cortometràgios in segunda visione (pratza
IV Novembre - cursu Vittorio Emanuele); h 18,00 dibàtidu cun sos
registas (MAP - cursu Vittorio Emanuele n° 71); h 20,30 proietzione de
12 cortometràgios in prima visione (Corte 'e Intro); h 22,30 "Notte
bianca" cun animatzione e mùsica.
Sàbadu
05/09/2015: h 16,00
laboratòriu de animatzione pro pitzinnos (Museu de sas contzas - carrera E.
Schrerer); h 17,30 proietzione de sos cortometràgios in segunda visione (pratza
IV Novembre - cursu Vittorio Emanuele); h 18,00 dibàtidu cun sos
registas (MAP - cursu Vittorio Emanuele n° 71); h 21,30 PREMIATZIONE (Corte
'e Intro); h 23,00 cumbidu e festa (Eden - Discobeachpriveè).
Presentada libru de Omar Onnis e mustra fotogràfica de
Luigi Tedde
Martis 18 de
austu a sas 9 e
mesa de sero (h 21,30) in su Càrmene s'at a fàghere sa presentada de su
libru "La Sardegna e i sardi nel tempo" de Omar Onnis.
Su libru,
publicadu dae Arkadia, faeddat de istòria sarda movende dae sos tempos prus
antigos finas a imbàtere a dies de oe. No est però unu tratadu acadèmicu ma unu
libru fàtzile de lèghere, fatu pro ingustare sos sardos a sa connoschèntzia de
s'istòria issoro. Sa presentada l'at a fàghere Antoni Flore Motzo.
Sa matessi
die in su Càrmene si podet visitare sa mustra fotogràfica de Luigi
Tedde, chi nos permitit de connòschere sa Bosa de sos Annos Chimbanta.
Pro sos chi
sunt interessados, sa mustra est aberta s'11, 12 e 13 (e naturalmente su 18) de
austu dae sas 9 a mesanote (h 21,00-24,00).
Programma "Isola del teatro" 2015
Dae s'8 a su
30 de austu torrant a
comintzare sas atividades de su fèstival "L'isola del teatro &
l'isola raccontata", chi ocannu est imbàtidu a sa de XIII editziones e
s'at a fàghere siat in Montresta siat in Bosa.
Su
calendàriu est ricu comente semper: b'at ispetàculos teatrales, presentadas de
libros, film e cuntzertos, e non mancant sos giogos pro sos pitzinnos.
Sinnalamus
in manera particulare sa proietzione de su documentàriu "Oil"
de Massimiliano Mazzotta, chi faeddat de s'indùstria petrolchìmica Saras e de
sos dannos chi est faghende a sa salude de sos abitantes de Sarrocu (sa
proietzione s'at a fàghere mèrcuris 12 de austu in Bosa e giòbia 13 in
Montresta).
Interessante
est finas su cortometràgiu "La valigia di Tidiane Cuccu" de
Umberto Siotto. Si bi faeddat de tziu Antoni Cuccu, editore de libreddos
in sardu, chi cun traballu ùmile e silentziosu at salvadu dae s'ismèntigu
tantas cantzones antigas. Su traballu suo l'est mandende a in antis Cheick
Tidiane Diagne, senegalesu e amigu mannu de tziu Cuccu (sa proietzione
s'at a fàghere mèrcuris 19 de austu in Montresta e giòbia 20 in Bosa).
Pro
iscarrigare su programma cumpletu de "L'isola del teatro" bos
podides cullegare a su situ o a sa pàgina Facebook.
Prontos sos atestados de su cursu "In sardu
est prus bellu"
Si dat a
ischire a sos corsistas chi ant partetzipadu a su cursu "In sardu est
prus bellu" fatu in Bosa dae su 5 de santandria a su 3 de nadale de su
2014 chi sos atestados sunt prontos e si podent ritirare su mangianu dae
sas 11 a sa una (h 13,00) in s'ufìtziu Segreteria de su Comune de Bosa (sig.ra
Rita Màsala).
Ammentamus
chi retzint s'atestadu sos chi ant partetzipadu nessi a 3 de sas 5 letziones e
nos iscusamus pro su ritardu, causadu dae dificultades tècnicas.
Su primu fèstival de su cuncàmbiu ('gift economy')
Cando sos
tempos si faghent dificultosos, sa gente agatat maneras noas de campare. Est su
chi benit a conca leghende de custu primu fèstival de s'economia collaborativa
(o gift economy, 'economia de su regalu') chi s'at a fàghere in Bosa su 26
de trìulas in su Blu B&B Bosa. Nde faeddat Bentos in un'artìculu de su 5 de
trìulas, ispieghende in manera crara s'eventu e sas esperièntzias fatas in
àteros logos.
Ma ite est
custa economia noa, e comente funtzionat? La connoschimus ca fiat su motore de
sa vida de biddas nostras in àteros tempos: ognunu daiat de su chi tenet (a
chie traballu, a chie produtos, a chie ospitalidade), e custu permitiat a totus
de campare finas cun pagu dinari.
S'idea de su
fèstival est de Alfredo Meschi, autore de su libru 33! L'economia che fa
cantare di gioia (Terra Nuova edizioni), iscritu paris cun Ilaria Farulli,
chi si podet iscarrigare dae custu link sena pagare nudda.
Custu tipu
de 'economia sustenìbile' permitit a ognunu de dare de su chi tenet e de
retzire su chi li bisòngiat, e custu podet megiorare sa vida de totus in tempos
dificultosos che sos nostros. Nos atrivimus a nàrrere chi podet sarvare su
mundu, pro ite nono?
Nos benit a
conca su presidente (iscadidu) de s'Uruguay José Pepe Mujica cando narat chi
sas cosas las comporamus cun su tempus chi amus postu a balangiare su dinari, e
duncas tocat a tènnere sobriedade ca sos consumos esagerados nos nche sunt
furende sa vida.
Sa
sobriedade, narat Mujica, est s'ùnica manera de èssere lìberos ca "pòberu
no est chie tenet pagu, ma chie tenet bisòngiu de cosa meda e nde cheret semper
de prus" (leghe inoghe sas paràulas de Mujica).
Programma cumpletu de sas manifestatziones de istiu
Custu istiu
in Bosa non b'at perìgulu de s'infadare. Su programma culturale est ricu de
manifestatziones de ogni genia e pro totu sos gustos: b'at cuntzertos, mustras,
ispetàculos teatrales, film, ballos, isfiladas, giogos pro pitzinnos e cantu
prus nde cherides nd'agatades.
In prus, dae
su 15 a su 26 de trìulas sos amantiosos de sa mùsica de càmera podent ascurtare
sos cuntzertos de "Bosa Antica 2015", festival internatzionale
organizadu dae s'Assòtziu culturale InterArtes (diretore artìsticu Jana
Bitti). Pro aunire su divertimentu a sa cultura non b'at mègius manera che
custa.
Ammentende a Franca Rame
Sàbadu 18 de
trìulas a sas 9 de
sero (h 21,00) in Corte 'e Intro (pratza Gioberti) s'at a fàghere
s'ispetàculu "Sono una stella?" chi ammentat a Franca Rame in
sa die chi diat àere cumpridu sos 86 annos.
S'ispetàculu
est curadu dae Dale Zaccaria; sos testos sunt de Franca Rame, Dario Fo, Jacopo
Fo, Stefano Benni e Dale Zaccaria; sas mùsicas sunt de Mara Miccichè.
Pro intrare
non si pagat nudda.
Proietzione film "A piedi scalzi" su
12 de trìulas
A pustis de
sa partetzipatzione manna chi su film at tentu in beranu, "A piedi
scalzi" torrat in proietzione domìniga 12 de trìulas 2015.
Su film
naschet dae su romanzu omònimu de Tata Carboni, chi narat sos contos de Tetta Màsciu, una
pitzinna de ses annos (sa mama de s'autora) chi vivet in Sa Costa de
Bosa in tempus de sa Gherra Mundiale. Unu contu chi tocat sos sentidos pro
s'umanidade de sos personàgios, gente pòbera de dinari ma rica de sentimentos e
de valores antigos.
Sa
proietzione s'at a fàghere in Corte 'e Intro (pratza Gioberti) a sas 9 e
mesa de sero (h 21,30); pro sos turistas chi non cumprendent su sardu su film
tenet sos suta-tìtulos in italianu.
Su billete
costat 5 èuros e si podet comporare in antètzipu in via Martini 26 o fàghere sa
die etotu in sa billeteria (pro ischire sos oràrios de sa billeteria tocat a si
cullegare a sa pàgina Facebook de su film).
Esàmene de maturidade iscientìfica in limba sarda
A l'ischides
chi custos giovaneddos in contu de limba tenent sas ideas prus craras chi non
nois?
A pustis de
su pitzinnu de Casteddu chi aiat dadu in
sardu s'esàmene de 3° mèdia, a pustis de sa pitzinna de Talana chi cheriat faeddare in
sardu in s'esàmene de maturidade in Tortuelie e non bi l'ant permìtidu, sàbadu
in Bosa un'àtera pitzinna at detzisu de faeddare in sardu in s'esàmene de
maturidade.
Si narat Lia
Obinu, est iscanesa e at dadu s'esàmene in su litzeu iscientìficu G.A.
Pischedda de Bosa. Pro ite l'at fatu? "Pro mustrare chi in sardu si
podet faeddare de cale si siat argumentu, e chi custa limba tenet sa matessi
dignidade de s'italianu e de s'inglesu, e duncas si podet inserire in cuntestos
regionales, natzionales e internatzionales sena problema perunu. Pro custu
motivu est importante de l'impreare finas in sas iscolas, ca est una richesa in
prus" at naradu Lia in sa presentada de su traballu suo. Argumentu de
s'esàmene sunt sos Gigantes de Mont'e Prama, e Lia nd'at fatu una bella
presentada narende chi "Sos gigantes sunt torrados a nàschere dae sa
terra, a nos ammentare chi nois puru tenimus un'istòria nostra".
A cumpletare
su traballu, Lia at presentadu una bella brochure cartonada iscrita in
tres limbas (sardu, italianu e inglesu) chi podides iscarrigare dae inoghe.
Su Comune prèmiat sos tzilleris chi rinùntziant a sas
"slot machines"
Su Comune de
Bosa prèmiat a sos operadores chi nche bogant sas machinetas màndiga-dinari dae
sos tzilleris issoro: sas dies passadas su sìndigu Luigi Mastino at dadu sos
atestados de "Bar èticu" a 16 locales chi ant eliminadu sas slot
machine o videolottery. Custos tzilleris ant a tènnere un'iscontu de
su 10 pro chentu in sa pagamenta de su terrinu pùblicu e in sa bulleta de
s'arga, comente prevedit su regulamentu comunale.
Unu de sos
pionieris de custa gherra contra a sa ludopatia (sa dipendèntzia dae su
giogu de azardu) est istadu su sìndigu de Montresta Antonio Zedda, chi giai in
su 2012 aiat bidu su perìgulu mannu, morale e econòmicu, de sa presèntzia
de slot machine in sos tzilleris de sa bidda.
Pro carchi
informatzione in prus, si podent lèghere sos artìculos chi sighint:
Su contu de su rùspiu - Dae su libru "A piedi
scalzi" de Tata Carboni
"Pro
pesare unu pitzinnu bi cheret una bidda intrea", narat unu ditzu
africanu, e custu essit bene a campu in su film "A piedi scalzi"
de Tata Carboni, chi narat sos contos de una pitzinna de ses annos (sa mama de
s'autora) in sa Bosa de sa segunda Gherra Mondiale.
Leadu dae su
libru omònimu, su film mustrat sa vida de sa gente de Sa Costa de Bosa,
sa parte prus pòbera de sa tzitade. Si bidet comente ogni pitzinnu fiat fìgiu
de totus, e comente sa comunidade intrea vigilaiat subra de s'educatzione sua
brighende·lu si faghiat a fìgiu malu e agiudende·lu si s'agataiat in perìgulu.
Pesende·lu paris cun sa famìllia, comente amus naradu.
In su link
chi sighit agatades su contu de sa borta chi tia Maria Càlmena
(una bighina) aiat mandadu sa pitzinna a li fàghere unu cumandu, minetzende·la
chi, si non si daiat còidu a torrare, li poniat su rùspiu ("Como deo
ponzo su rùspiu e tue depes fàghere impresse a torrare poite si su rùspiu
s'asciuttat primu chi tue torres, moris"). Unu mètodu unu pagu
terrorìsticu, forsis, ma chi non faddiat mai.
Pro carchi
informatzione in prus subra de libru e film leghe in suta:
"Mamma non vuole, a uscire in strada"
(cunferèntzia de interlinguìstica)
Lunis 26 de
ghennàrgiu a sas 5 de
sero (h 17,00) in sa Sala pro sas cunferèntzias de sa biblioteca comunale de
Bosa (cunventu betzu de su Càrmene - 1 pranu) s'at a fàghere sa
cunferèntzia-dibàtidu intitulada "Mamma non vuole, a uscire in strada -
Fenomenologia de s'ammisturu intra de limba sarda e limba italiana".
Sa
cunferèntzia naschet dae su disìgiu (manifestadu dae sos corsistas de su cursu
de alfabetizatzione de Bosa) de connòschere mègius sas dinàmicas chi naschent
dae s'interferèntzia de sa limba sarda cun sa limba italiana.
Su reladore
est Antoni Nàtziu Garau, presidente de sa Sotziedade cooperativa "L'altra
cultura" de Aristanis, dotzente de limba sarda, istudiosu de
interlinguìstica e de didàtica de sa limba sarda.
Cuntzertu de Piero Marras
Domìniga 28
de nadale a sas 7 de
sero (h 19,00) in sa Catedrale de Bosa Piero Marras at a fàghere unu cuntzertu
pro boghe e pianoforte.
Piero Marras
est su cantadore prus connotu de sa mùsica ètnica sarda. Issu si contat unu
"sirbone", ma in sa mùsica sua b'agatamus sos elementos fundantes de
su mundu sardu: s'amore, su mundu pastorale, sas cuntradditziones de su coro,
sos gosos e sas penas de s'òmine.
Dae sa
collaboratzione cun Pàulu Pillonca, in su 1987, naschet s'album "Funtanafrisca",
chi cuntenet cantzones de riflessione e de denùntzia sotziale. Una est Osposidda, chi ammentat sos
acadimentos tristos de su 19 de ghennàrgiu 1985, cando in un'isparatòria a sa
tzega in sos montes de Orgòsolo, durada 4 oras, b'at mortu 5 òmines (4
isbandidos e unu sovrintendente de Politzia). Su testu contat sa barbaridade de sos chi ant
passigiadu sas carenas de sos mortos peri sas carreras de Nùgoro, "che
peddes de sirbone".
Su 16 de
nadale de su 2000 s'artista s'est esibidu in su Cuntzertu de Nadale in dae in
antis de paba Wojtyla paris cun sa cantante afroamericana Dionne Warwick cun sa
cantzone "Sa boghe de Maria / The voice of Maria",
trasmìtida in mondovisione.
In su 2001
Marras at retzidu su Discu de Oro dae Randy Crawford (sa reina de sa mùsica soul,
sa 'mùsica de s'ànima') e in su 2003 su Prèmiu internatzionale Ignazio
Silone pro su valore culturale de sas cantzones suas in sardu.
"Un'artista
- narat Marras - devet operare in sa terra in ue bivet", manigiende
sa cultura e sa limba de logu suo. Cun custa cultura e custa limba Piero Marras
at fatu capolavoros comente "Ses tue" (cantzone de amore de
sas prus bellas) o "Babbu meu" (ammentu de su babbu).
Ma finas perlas de sabiore antigu comente "Su lèpere a carru" chi, ponende
in mùsica su ditzu "Sa Giustìtzia sighit su lèpere a carru",
ammentat chi sa Giustìtzia est lenta ma inesoràbile.
Custu de
Bosa at a èssere unu cuntzertu bellu. Balet sa pena de andare a l'intèndere.
S'Amministratzione at deliberadu pro su coju in sardu
Un'Amministratzione
sensìbile a sa chistione de sa limba sarda si bidet in sos passos chi faghet
onni die pro la valorizare, e s'Amministratzione comunale de Bosa passos in
custu sensu nd'est faghende bona chedda.
At
comintzadu cun s'inserimentu de un'artìculu ispetzìficu in s'Istatutu (s'art.
4), chi previdit chi sa limba sarda "siat limba de su Comune e de sas
Istitutziones suas", e su 3 de nadale at sighidu cun una delìbera chi
permitit a sos isposos de impreare su sardu in sa tzerimònia de coju tzivile.
Sa voluntade
de fàghere intrare su sardu comente limba de sas istitutziones e de sa vida de
onni die (chi fiat unu de sos obietivos programmàticos de custa
Amministratzione) si bidet finas in s'impignu chi ponent a comunicare semper in
sardu cun s'Isportellu linguìsticu, in sa partetzipatzione a sas atividades de
formatzione e in sa disponibilidade a retzire propostas e a bogare a campu ideas
noas e modernas pro valorizare sa limba istòrica nostra.
Semus
seguros chi sa limba sarda dae custas initziativas nd'at a tènnere profetu
mannu, e auguramus de sighire in custu caminu de collaboratzione e de
innovatzione linguìstica.
Cursu de alfabetizatzione in limba sarda - Oràrios
Si dat a
ischire chi sos cursos de alfabetizatzione in limba sarda s'ant a fàghere in
sas datas e in sos oràrios chi sighint:
Bosa:
mèrcuris
05/11/2014 h 15,30-17,30
mèrcuris
12/11/2014 h 15,30-17,30
mèrcuris
19/11/2014 h 15,30-17,30
mèrcuris
26/11/2014 h 15,30-17,30
semper in sa
sala cunferèntzias de sa biblioteca.
Iscanu:
martis
04/11/2014 h 16,00-18,00
martis
11/11/2014 h 16,00-18,00
martis
18/11/2014 h 16,00-18,00
martis
25/11/2014 h 16,00-18,00
semper in
s'àula de su Consìgiu de su Comune.
Comintzant sos cursos pro imparare a iscrìere in sardu
Sos Comunes
de Bosa e de Iscanu sunt ativende sos cursos de alfabetizatzione pro chie
cheret imparare a iscrìere in sardu.
Sos cursos
s'ant a fàghere in su mese de santandria, bi podet aderire partetzipantes dae
totu sos Comunes de s'Unione Pianalza-Montiferru e s'adesione cheret dada a sos
referentes intro de lunis 27.10.2014.
Pro chi sos
cursos si fatzant tocat a tènnere nessi 15 adesione pro onni cursu.
Naschet sa Consulta de sos Giòvanos
S'Assessoradu
a sas polìticas giovaniles de Bosa tenet in intentu de fàghere nàschere sa Consulta
de sos Giòvanos.
Màura Cossu,
vitze-sìndigu cun dèlega a custu setore, ispiegat chi s'idea est de dare a sos
giòvanos unu canale privilegiadu pro comunicare cun s'Amministratzione
collaborende in sa programmatzione de interventos e atividades.
Sa prima
riunione s'at a fàghere martis 14 de santugaine a sas 7 de sero (h
19,00) in sa biblioteca comunale (cunventu de su Càrmene).
Sunt
invitados a partetzipare totu sos giòvanos intre sos 15 e sos 35 annos.
Cuncursu de poesia 3° editzione
S'Assòtziu
"Luisa Monti Onlus" e su grupu Scout "Bosa 1"
bandint su 3° cuncursu de poesia intituladu a Luisa Monti. Temas de ocannu sunt
sa solidariedade e sa libertade, e su tìtulu est "S'òmine est nàschidu
lìberu e in d'ogni logu est incadenadu".
Pro
partetzipare tocat de mandare sos elaborados (anònimos e sena mitente) a
s'indiritzu publicadu in su bandu intro de su 5 de nadale 2014.
Sa
premiatzione s'at a fàghere su 26 de nadale de su 2014 a sas 7 de sero (h
19,00) in sa sede de s'assòtziu.
Su cuncursu
est patrotzinadu dae su Comune de Bosa.
Isportellu sotziale de informatzione e consulèntzia
familiare
Su Plus
Ghilarza-Bosa faghet a ischire chi dae su 30/09/2014 est abertu in Bosa
s'isportellu sotziale de informatzione e consulèntzia familiare in favore de
dipendentes e pensionados pùblicos e familiares issoro chi non siant
autosufitzientes e chi siant residentes in su territòriu comunale. S'oràriu
est: su martis dae sas noe a sa una (h 09,00-13,00) e dae sas tres a sas
chimbe (h 15,00-17,00) e sa giòbia dae sas noe a sa una (h 09,00-13,00).
Pro informatziones si podet telefonare a su n° 389-1141201 (Ass. Sotziale
dut.ssa Giuseppina Cubeddu). Sa e-mail est: sportellohcp.ghilarza-bosa@comune.ghilarza.or.it.
Unu mundu de magia in sas pinturas de Gloria Delitala
Bosa,
s'ischit, est una tzitadina chi tenet un'istòria e una bellesa de totu rispetu.
Ma a la bìdere pintada in sos cuadros de Gloria Delitala paret ancora prus
bella, paret unu mundu incantadu de cussos chi si mentovant in sos contos
antigos de fadas e de orcos.
Gloria
Delitala (31 annu, crèschida in Bosa e mòvida a Roma pro istudiare Restauro
e Storia dell'Arte) est una pintora naïf chi in sas dies de su disterru at
cumpresu e apretziadu sos logos de sa pitzinnia, pintende·los in sos
cuadros comente logos mitològicos de ammentos e de bisiones.
Sas pinturas
suas mustrant una Bosa màgica in ue logos, festas e traballos de campagna
s'aunint in una lìrica de colores e de magia. Pro custas particularidades non
faghet ispantu chi, mancari pitzinna, Gloria Delitala apat giai tentu sa
possibilidade de fàghere espositzione de s'òpera sua in Madrid e de àere
partetzipadu a rassignas internatzionales che cussa de Varenna e Mandria de
Chivasso.
Su
laboratòriu suo est in Bosa in cursu Vittorio Emanuele 72, ma sos cuadros si
podent ammirare finas culleghende·si a su situ www.gloriadelitala.it.
Su nùmeru
pro la cuntatare est 340-9369637.
Prèmiu fotogràficu "Wiki Loves Monuments
Italia 2014"
Finas a su
30 de cabudanni sos amantiosos de fotografia podent partetzipare a su cuncursu
fotogràficu "Wiki Loves Monuments Italia 2014", organizadu dae
s'Assòtziu culturale Wikimedia Italia.
Bi podent
partetzipare totu sos chi tenent praghere de fotografare su patrimòniu istòricu
e monumentale de Bosa, e in manera particulare su tzentru istòricu, su
casteddu, sas contzas, su cunventu de Caputzinos, sa biblioteca e s'archìviu,
sa "Puntana Manna", su rellògiu antigu, su Càrmene, su Comune.
Pro àteras
informatziones si podet abbaidare in custos sitos:
http://www.wikimedia.it
http://www.wikilovesmontuments.it
Bosa in Lineablu
Sàbadu 20
de cabudanni a sas duas (h 14,00) in sa trasmissione Lineablu de
Rai1 s'at a faeddare de Bosa pro sa segunda borta in pagos annos: ammentamus
chi in su 2009 Lineablu aiat dedicadu una servìtziu a custa tzitadina
(abbàida su vìdeu inoghe).
S'at a
faeddare de sos monumentos e de su territòriu paris cun Cristina Obinu
(presidente de sa cooperativa "L'Antico Tesoro") e de su
sìndigu Luigi Mastino.
No at a
mancare una vìsita a Tinnura pro bìdere sos murales de Pina Monne, e a
Magumadas, bidda apretziada pro sa malvasia.
Pro carchi
informatzione in prus leghe inoghe.
"Manos de Oro" 2014
Dae su 29 a
su 31 de austu in Bosa si
torrant a dare apuntamentu sos mègius artesanos de Sardigna. Est su de 5 annos,
difatis, chi s'Assòtziu culturale "La Foce" aparitzat sa
manifestatzione "Manos de Oro" chi aunit a pare arte, cultura
e limba sarda in 3 dies prenas de traballos artìsticos e de apuntamentos
culturales.
S'inauguratzione
est su 29 a sas 7 de sero (h 19,00) in Caputzinos (su cunventu betzu de
sos padres frantziscanos in carrera Garibaldi). Sas dies a pustis b'at a àere
presentadas de libros, contos in sardu e laboratòrios pràticos fatos dae sos
artistas.
Sas
espositziones de prendas de onni genia si podent visitare onni die in custos
oràrios:
Mangianu: h 9,30-13,00
Sero: h 16,00-23,30
Bosa e Pianalza in un'artìculu de "Il Fatto
Quotidiano"
"Sa
Sardigna tenet bellesas raras: tenet unu de sos mègius mares de su mundu, una
tziviltade nuràgica ùnica, una limba tìpica e particulare, biddas de bellesa
manna (comente Bosa, pro esempru), cultura, mùsica, gastronomia foras dae
s'ordinàriu".
Lu narat su
giornalista Marcello Adriano Mazzola in un'artìculu de "Il Fatto
Quotidiano" (leghe inoghe) in ue denùntziat su discòidu e su
malu fàghere de una classe dirigente chi no at cumpresu chi dae sa bellesa si
bi podet vìvere.
"Totu
s'Itàlia - narat Mazzola - tenet unu patrimòniu culturale foras dae sa
norma e nde diat pòdere fàghere un'Eden pro bi pesare sos fìgios. E imbetzes lu
bendet pro pagos soddos a mercantes chi connoschent ebbia sa bellesa de su
tzimentu e de s'arga. Pro sa cultura dinari non bi nd'at".
Mentovende
sa Sardigna, Mazzola non si dat paghe: "Comente podet èssere - narat
- chi una regione de rara bellesa, chi diat pòdere campare de turismu pro 8
meses a s'annu (finas ca sos abitantes sunt pagos meda), est unu de sos
logos de Eurozona in ue b'at prus gente disocupada?"
E comente
podet èssere - sighit Mazzola - chi biddas bellas e tentas contu che a Bosa,
Mòdolo, Magumadas, Tresnuraghes non bèngiant promòvidas de peruna manera,
lassadas a un'oferta turìstica improvisada e male aparitzada?
Sa risposta
de Mazzola discunnortat: "Est su sistema Itàlia. E difatis s'Itàlia no
agradat prus a niunu".
Una medusa gigante in s'oru de su mare
Su mare
sardu luadu dae sas medusas. Medusas gigantes, però, cun sa "conca"
de 80 tzentìmetros.
ANSA (Agenzia
Nazionale Stampa Associata) a primos de austu at dadu sa nova publichende
sas fotografias tiradas dae sos sub in su mare ogiastrinu: betze medusa
manna cantu de unu pitzinnu (abbàida inoghe).
Domìniga
passada s'Unione Sarda at publicadu una fotografia mandada dae unu sub bosincu
e tirada in Bosa a pagos metros dae s'oru de su mare. Sa medusa est una
Rhizostoma Pulmo e vivet a 12 metros de profundidade (leghe s'artìculu).
Narant chi
custa crèschida de medusas est ca su mare in custos annos s'est iscaldidu tropu
e ca sos piscadores nde sunt tenende sos pisches chi si nche las màndigant.
Narant finas chi sas medusas gigantes, mancari unu pagu urticantes, non sunt
perigulosas pro s'òmine.
Ma chi su
chelu nos nd'iscampet de nos las agatare a in antis cando semus nadende.
Manifestatziones de austu e cabudanni
Publicamus
(cun unu pagu de ritardu) su calendàriu de sas manifestatziones chi s'ant a
fàghere in Bosa in sos meses de austu e cabudanni.
Su Carrasegare
de Istiu a dolu mannu nch'est giai coladu, però su pèsperu de Mesaustu
b'est sa manifestatzione "Atopa a camasinu", e sas dies a
pustis cuntzertos, degustatziones de màndigos e cursas a caddu.
Chie cheret
su calendàriu cumpletu lu podet iscarrigare dae inoghe.
Santa Maria de su Mare 2014
Domìniga 3 de austu in Bosa si festat a Santa
Maria de su Mare. Est festa pro totu sos bosincos, ma màssimu pro sos
piscadores chi bi tenent in manera particulare.
Si comintzat
a sas 10,00 cun sa Missa in sa Crèsia "Stella Maris" e, a
pustis, cun sa prutissione peri su frùmene.
A su sero a
sas 7 (h 19,00) si faghet sa prutissione solenne: sas barcas mudadas a festa
movent dae sa Catedrale a cara a sa Marina.
A sas deghe
de note (h 22,00) bi sunt sos fogos de artifìtziu in sa Turre Aragonesa.
Oràrios pro retzire sa gente
Su Comune de
Bosa informat chi su Sìndigu retzit sa gente in custos oràrios:
lunis h 17,30-19,00
mèrcuris h 12,30-14,00
Pro cosas
pretzisas si podet leare apuntamentu telefonende a su nùmeru 0785-368037 o
mandende una mail a s'indiritzu sindaco@comune.bosa.or.it
o sindaco@pec.comune.bosa.or.it.
Su Comune
informat finas chi dae su 7 de trìulas 2014 sos ufìtzios sunt abertos a su
pùblicu in custos oràrios:
lunis h 15,30-17,30
mèrcuris e chenàbura h 9,00-13,00
S'Ufìtziu
Protocollo aberit finas su martis e sa giòbia dae sas 11,00 a sa una (h 13,00).
Augùrios a su Sìndigu nou
In sas
votatziones comunales de su 25 de maju 2014, Bosa at dadu su mandadu pro la
guvernare a Luigi Mastino cun su 45,78% de sos votos (2.238 votos). At a
guvernare cun 11 consigeris.
Li faghimus
sos mègius augùrios pro chi su traballu suo e de sos àteros amministradores
siat de profetu mannu siat pro sa tzitadina de Bosa siat pro sa limba sarda.
Sa Festa de su Binu
Sàbadu 17 de
maju 2014 in
Bosa s'at a fàghere sa prima Festa de su Binu, pensada dae s'Assòtziu "Centro
Storico Sa Costa" e realizada paris cun sos meres de sos magasinos.
Sos
bisitadores, comporende unu càlighe de bidru, ant a pòdere assagiare binos de
sa mègius traditzione sarda (sa Malvasia de Bosa, su Cannonau, su Cagnulari...)
e binos connotos in totu su mundu (Brunello di Montalcino, Chianti,
Cabernet...).
Sa
presèntzia de sos mègius coghineris de Bosa at dare sa possibilidade de
assagiare sos màndigos de sa traditzione bosinca, e sos artistas locales ant a
espònnere sos traballos issoro.
Sa
manifestatzione est patrotzinada dae su Comune de Bosa, sa Provìntzia de
Aristanis, sa Regione Sardigna e s'Unione de sos Comunes de Pianalza e
Montiferru Otzidentale.
Pro
nd'ischire de prus leghe inoghe
Bosa - Su Rotary cunsignat duas bursas de chirca
Custu sero a
sas 5 e mesa (h 17,30) in s'àula magna de su litzeu Pischedda in Bosa su Rotary
Club at a cunsignare duas bursas de chirca a sas dutoressas Maristella Pitzalis
e Magdalena Zoledziewska de s'Istitutu de Chirca Genètica e Biomèdica de su CNR
de Casteddu.
Su
finantziamentu de custas bursas (fatas pro istudiare mègius sa diabete) benit
dae sa bèndida de su libru "Rimas e frores" de Augusto Piras e
Cicita Solinas, e dae su dinari regortu dae sos genitores de pitzinnos
diabèticos de sa zona de Aristanis (FAND Assòtziu Diabèticos).
Cuntzertu literàriu
Sàbadu 26 de
abrile 2014 a sas 9 de sero (h 21,00) in su teatru tzìvicu de Bosa s'at a
fàghere unu cuntzertu literàriu pro ammentare su poeta e fotògrafu bosincu
Giovanni Nurchi (1870-1941).
S'ant a
esibire Clara Farina, Claudio Gabriele Sanna, Eugenio Lugliè, Mario Fragiacomo,
Luca Mastino e Ilario Frau, cun sa partetzipatzione istraordinària de su Coro
de Bosa.
Sa segunda bidda prus bella de Itàlia
Sa segunda
bidda prus bella de Itàlia est in Pianalza e si narat Bosa. L'at naradu su
cuncursu "Il borgo dei borghi" organizadu dae sa trasmissione
"Alle falde del Kilimangiaro" de Licia Colò e Dario
Vergassola.
Sa puntada
de su sero de Pasca at decretadu sa bìnchida de Ganci (una bidda in provìntzia
de Palermo), ma fiat una bìnchida pilu-pilu contra a Bosa e a Santa Severina
(bidda in provìntzia de Crotone).
Sa puntada
l'ant sighida belle 2 milliones de telespetadores, e duncas si podet nàrrere
chi Bosa apat bìnchidu su matessi ca custa est una promotzione manna pro su
territòriu, màssimu como chi est incomintzende s'istajone turìstica.
Presentada libru "Io e il filet di Bosa"
Sàbadu 4 de
ghennàrgiu 2014 a sas 5 e mesa (h 17,30) in su Teatru tzìvicu (pratza
Gioberti), Marina Mureddu at a presentare su libru "Io e il filet di
Bosa", in ue si podent agatare sas riprodutziones a computer de sos
traballos de laoru.
In custa
ocasione, s'Assòtziu Culturale "La Foce" at a espònnere unos
cantos traballos.
A sas 8 (h
20,00) semper in su teatru b'at a èssere sa cummèdia "Su Prèsperu
de Nadale" de s'Assòtziu "Sas Comares".
Progetu "Ultima Costa"
Sa parte
antiga de Bosa est ùnica: sas domos de "Sa Costa" vigiladas
dae su Casteddu, acaradas abbaidende su frùmene e su mare, sunt un'ispetàculu
chi non s'ismèntigat. A dolu mannu, però, non b'at logu a parchegiare, su prus
de sas domos sunt derrutas e sa gente si nch'est andende a domos prus
cumbeniosas e mannas.
Pro torrare
a biu su tzentru istòricu, s'Amministratzione comunale bandit su progetu "Ultima
Costa", cun s'idea de dare vida noa a sa parte prus caraterìstica de
sa tzitadina.
S'ant a
fàghere laboratòrios de restàuru pro pòdere fàghere sos megioros in sos
edifìtzios privados. Sos maistros de muru bosincos, chi connoschent sas
tècnicas antigas, ant a imparare s'arte a dischentes disocupados chi ant a
acontzare sas domos antigas.
Su progetu
no ismèntigat mancu sa marina nen su frùmene Temo, chi sunt elementos
caraterìsticos de sa tzitadina.
Pro imbàtere
a su mègius resurtadu, su Comune bandit tres cuncursos internatzionales de
ideas (unu pro Sa Costa, unu pro sa marina e unu pro su frùmene).
Retìfica data premiatzione "Paràulas de
azudu"
S'Assòtziu
"Luisa Monti onlus" de Bosa dat a ischire chi sa premiatzione
de su 2° cuncursu de poesia sarda "Paràulas de azudu" est
istada ispostada a su 5 de ghennàrgiu 2014 a sas 6 de sero (h 18,00), semper in
su Teatru Tzìvicu de Bosa.
Cuncursu de poesia sarda "Paràulas de azudu"
annu 2013
S'Assòtziu "Luisa
Monti Onlus" e su grupu Scout "Bosa 1" bandint su 2°
cuncursu de poesia sarda "Paràulas de azudu".
Sas òperas
(chi cherent inèditas) devent tènnere comente tema sa solidariedade, e cherent
mandadas a s'Assòtziu "Luisa Monti" intro de su 15 de
Nadale de su 2013.
Sa
premiatzione s'at a fàghere su 4 de Ghennàrgiu 2014.
Pro sos
premiados b'at unu prèmiu in dinari chi no at a andare a sos binchidores (chi
ant a retzire unu prèmiu simbòlicu) ma a un'òpera benèfica.
Presentada de su cursu on-line "Dischente"
pro imparare a iscrìere su sardu
Sighint sas
presentadas de su cursu on-line "Dischente.or.it" pro imparare
a iscrìere su sardu dae domo e sena pagare nudda.
Giòbia 17 de custu mese, dae sas 3 a sas 6 (h
15,00-18,00) s'at a fàghere sa presentada in Bosa (sala cunferèntzias de
sa Biblioteca comunale).
Su cursu,
aprontadu dae sa Provìntzia de Aristanis, est istruturadu in 3 livellos
diferentes: mòdulu base, mòdulu mesanu e mòdulu avantzadu. A s'acabbu de ogni
mòdulu si podet dare un'esàmene e retzire un'atestadu.
Pro
partetzipare a sa letzione de presentada non si pagat nudda e non b'at bisòngiu
de si prenotare.
"Cantende in sos càscios"
Mèrcuris 21 de austu a sas 9 sero (h 21,00) in
sas carreras de "Sa Costa" su Coro de Bosa at a allegrare su
seranu cun sa manifestatzione "Cantende in sos càscios".
Sos "càscios"
('vicoletti') sunt guturinos (a bortas ammuntados) chi aunint una carrera a
s'àtera in sa zona antiga de sa tzitade.
"Sas Comares" andant a Magumadas
Giòbia 29
de austu a sas 9 e mesa de sero (h 21,30) in Magumadas (localidade "Binza
de Crèsia") s'Assòtziu Culturale Teatrale "Sas Comares"
de Bosa at a presentare sa cummèdia "Contos de Foghile", chi
faeddat de unu massaju mandrone e asuridu ('avaro') chi una die in campagna
agatat una casseta. E custa casseta at a dare ite de nàrrere a bona chedda de
gente.
Comente totu
sas cummèdias presentadas dae "Sas Comares", custa puru est in
sardu e faeddat de una Bosa chi a dies de oe no esistit prus.
S'Assòtziu
faghet dae semper unu traballu de chirca e istùdiu pro nde bogare a campu una
manera de vìvere (e finas de faeddare) chi sos giòvanos non connoschent prus,
unu mundu fatu de isperas, dificultades, ingenuidades e sentidos genuinos chi
incantant a chie los ascurtat.
Sas
cummèdias propostas in custos annos dae s'Assòtziu sunt 8: Attoppa a sa
Costa, Prèsperu de Nadale, Contos de Foghile, Sa Sonatza, Su Còggiu, Sa
Malchesa Malispina, S'istòria de sas Conzas, Cantu fàghede una toccada de
'enuggiu.
Carrasegare de istiu 2013
Chenàbura 9 de austu 2013 in Bosa si torrat a
repìtere su "Carrasegare de Istiu", chi ocannu imbatet a sa de XV
editziones.
Nàschidu in
su 1998 dae s'idea de unu grupu de giòvanos de sa Pro Loco "Melchiorre
Melis", in custos annos su carrasegare de istiu est bidende sa
partetzipatzione de gente meda chi benit dae totu sa Sardigna.
Presentada libru
Gioja 25 de trìulas a sas 6 de sero (h
18,00) in s'Universidade "della Terza Età" de Bosa s'at a
fàghere sa presentada de su libru "Rimas e Frores" de Augusto
F. Piras e Cicita Solinas.
Su Rotary
Club de Bosa at a impreare su dinari de sa bèndida de sos libros a finantziare
sos istùdios pro curare sa diabete.
"Manos de Oro"
S'assòtziu
culturale "La Foce" de Bosa presentat sa rassigna artigianale "Manos
de Oro", arrivada ocannu a sa de IV editziones e chi mustrat a chie
las cheret bìdere sas mègius prendas fatas dae sas "manos de oro" de
òmines e fèminas de totu sa Sardigna.
Oràrios:
chenàbura 19 de trìulas h 19,00: Inauguratzione
(presentada dae sa presidente Maria Màsala);
19, 20 e 21: Mustra (h 10,00-13,00 e
16,30-23,30);
domìniga 21 h 18,00: Presentada de su libru Bosa
città regia. Capitoli di corte, leggi e regolamenti (1421-1826) de
Cecilia Tasca;
22, 23 e 24: laboratòriu de laoru
('filet di Bosa').
Totu sas
atividades s'ant a fàghere in su Teatru Tzìvicu in pratza Gioberti.
Die ecològica
Su Comune de
Bosa invitat a chie totu est sensìbile a sos temas de s'amparu de s'ambiente a
partetzipare a sa Die Ecològica chi s'at a fàghere sàbadu 20 de
trìulas in Bosa Marina.
Oràrios de
sa die:
h 8,30:
Atopu a Bosa Marina (pratza P. Harris)
h 9,00:
S'incomintzat a traballare in sos logos assignados
h 12,30: Si
torrat a pratza Harris. Recreu.
Istiu 2013 in mùsica
Su Cunventu
de Bosa in su mese de trìulas tenet sa fortuna de ospitare s'orchestra e su
coro de su Teatru Lìricu de Casteddu, chi ant a rapresentare custas
òperas:
19 de
trìulas a sas 9 de
sero (h 21,00): "Operetta Eterno Amore".
26 de trìulas a sas 9 de sero (h 21,00): "La
Traviata" de Giuseppe Verdi.
Pro intrare
si pagat unu billete de 5,00 èuros (intreu) o 3,00 èuros (reduidu).
"Monumenti aperti 2013"
Dae sa prima
die de làmpadas in Bosa comintzat sa manifestatzione "Monumenti
aperti 2013".
Custa bella
manifestatzione, patrotzinada dae s'Assessoradu a sa Cultura e arrivada a sa de
XVII editziones, naschet e creschet gràtzias a s'impignu de assòtzios
culturales, voluntàrios, iscolas e cunfrades chi cun entusiasmu e bona
voluntade ogni annu si ponent a disponimentu pro fàghere promotzione a sas
bellesas de Bosa.
Sas primas
duas dies de làmpadas (1-2 giugno) s'ant a pòdere visitare monumentos e
mustras, ascurtare cuntzertos e biagiare in treninu turìsticu o batellu.
Sos monumentos ant a èssere
abertos cun custos oràrios: sàbadu h 15,30-19,30; domìniga h 9,30-13,00 e
15,30-19,30.
Sas mustras de visitare
sunt custas:
- Repertos
archeològicos (in Cunventu);
- Su laoru,
est a nàrrere 'il filet di Bosa' (in su teatru de pratza Gioberti e in su Presìdiu
turìsticu de sa carrera Ultima Costa);
-
Artigianadu artìsticu (in su museu de "Casa Deriu");
-
Fotografias (in su Cunvitu de su I.I.S. "G.A. Pischedda", in cursu
Garibaldi).
Sos cuntzertos: sàbadu pro
s'inauguratzione (h 15,30 in pratza Gioberti) ant a cantare su Tràgiu
'Osincu e su Coro de Bosa.
Semper
sàbadu a sas 6 e mesa (h 18,30) b'at a èssere un'interventu musicale de sos
dischentes de su litzeu musicale Azuni de Tàtari.
Domìniga a
sas 7 e mesa (h 19,30) in su teatru de pratza Gioberti b'at a èssere sa
cunsigna de sos atestados de partetzipatzione.
Progetu "Intrecci"
Sos Comunes
de Bosa, Sune, Tinnura e Frussio paris cun sa Fondazione con il Sud ant
aparitzadu su progetu “Intrecci”, indiritzadu a totu sos tzitadinos de
su territòriu.
Su progetu
est articuladu in 3 setores:
1. Isportellu informativu: pensadu pro chie cheret
connòschere mègius sos servìtzios dados dae sos Comunes, màssimu pro sos
disàbiles e sas famìllias issoro. S’isportellu informat subra de sas leges de
assistèntzia e sos servìtzios ativados (CSM, consultòriu, agiudu a chie tenet
maladias graves o problemas de dipendèntzias) e agiudat a cumpilare sas
pràticas ASL.
2. Cursu de vela: pro sos giòvanos, pro lis imparare
a amministrare una barca. Su cursu est de 50 oras, si faghet in sa marina de
Bosa e pro lu fàghere tocat a s'iscrìere.
3. Laboratòrios traditzionales: pro chie totu est interessadu a
imparare a coghinare sos màndigos antigos, a cosire, a laurare ('lavorare
il Filet') e a fàghere cestinos de isciareu ('asfodelo'). Tocat a
s'iscrìere.
Pro tènnere
totu custos servìtzios NON SI PAGAT NUDDA.
Chie si
cheret informare podet telefonare a a su nùmeru 329-4144586 (sig.ra Piera
Lotti) o mandare una e-mail a s’indiritzu progetto.intrecci@gmail.com.
Sa psicòloga
chi coordinat su progetu est sa d.ssa Manuela Schintu.
ORÀRIOS DE
S'ISPORTELLU INFORMATIVU:
LOGU
|
DIE
|
ORÀRIU
|
Bosa
(Sasol Point)
|
Martis
Chenàbura
|
10,00-12,00
|
Sune (domo
comunale)
|
Mèrcuris
|
10,00-12,00
|
Tinnura
(domo comunale)
|
Lunis
|
15,30-17,30
|
Frussio
(domo comunale)
|
Gioja
|
10,00-12,00
|
Fainas pro "Monumenti Aperti 2013"
Bosa
incomintzat a ammaniare sas fainas de "Monumenti Aperti 2013", chi
s'at a fàghere s'1 e su 2 de làmpadas.
S'Assessoradu
a sa Cultura invitat a istudiantes e mastros a partetzipare,
"adotende" unu logu in ue retzire sos turistas e lis dare novas de
s'istòria bosinca.
Assòtzios,
grupos, voluntàrios, genitores, operadores cummertziales e turìsticos, e chie
totu est interessadu, podent dare disponibilidade pro contribuire a sa bona
resurtada de sa manifestatzione cun agiudos e consìgios.
"Diariu Sardu" de Ràdio Planàrgia
Radio
Planàrgia faeddat in
sardu.
Sa ràdio
istòrica de Bosa, nàschida in su 1979 comente emitente religiosa e arrivada in
custos 35 annos a si fàghere connòschere e apretziare in totu sa Sardigna, no
at isetadu a li nàrrere "marranu" pro incomintzare a faeddare
in sardu.
Dae ocannu
passadu at aviadu sa trasmissione "Diariu Sardu", curada dae
Mariu Antiogu Sanna e realizada cun su contributu regionale de sa Lege 26/1997.
Programma de informatzione, atualidade, cultura e mùsica in limba sarda,
mustrat chi sos mèdios massivos podent faeddare in sardu de cale si siat cosa.
Sa ràdio
trasmitit in custas frecuèntzias:
98.750,
101.00, 103.00, 103.850 Mhz (pro Bosa e Planàrgia)
89.600 Mhz
(pro Aristanis e Campidanu de Mesu)
92.400 Mhz
(pro Thiesi)
Su programma
"Diariu Sardu" b'est ogni die (lunis-chenàbura) dae sas 19,05
a sas 20,05 e, cherende, si nde podet lèghere sa sìntesi in su blog http://diariusardu.myblog.it/.
BITAS (Borsa de su Turismu)
Dae su 12 a
su 17 de martzu in Bosa b'at a èssere sa de IV editziones de sa BITAS ("Borsa
Internazionale del Turismo Attivo in Sardegna"), chi tenet s'iscopu de
permìtere a sas agentzias de biàgiu, a sos assòtzios e a sos operadores
turìsticos de s'atobiare pro pònnere paris domanda (natzionale e
internatzionale) cun oferta turìstica sarda.
Sa BITAS si
faghet in Cunventu (Cursu Garibaldi), e chie partètzipat si podet registrare su
13 de martzu dae sas 8 de mangianu pro li dare sa tèssera de intrada.
Pro tènnere
prus informatziones podides incarcare inoghe.
Sa Padedda
Sàbadu 16 de freàrgiu finint sas festas de su
"Karrasegare 'osincu" 2013.
A sas 5 de
sero (h 17,00) in Pratza IV Novembre si segat sa padedda e si prèmiant
sas mègius màscaras e carros. A pustis si chenat cun màndigos tìpicos de su
carrasegare, e non podet mancare s'animatzione musicale.
"Karrasegare 'osincu" 2013
Sighint in
Bosa sas festas de su "Karrasegare 'osincu".
Sàbadu 9 a sas 6 de sero (h 18,00): Festa de
sos magasinos (cun binu e fae pro totus) e animatzione musicale in su Càrmene.
Domìniga 10 a sas 4 de sero (h 16,00):
Mascarada lìbera.
Lunis 11 a sas 10 de mangianu: Isfilada de
màscaras e carros (movende dae Viale Giovanni XXIII). A sas 4 de
sero (h 16,00): Ballos in pratza IV Novembre.
Martis 12 a sas 10 de mangianu: “S’attittidu”
(màscaras bestidas de nieddu); a sas 7 de sero (h 19,00): “Chilchende
a Giolzi Moro” (màscaras bestidas de biancu); a sas 10 e mesa de note
(h 22,30) in pratza IV Novembre: “Giolzi a su fogu” e, a pustis,
mùsica.
Iscàrriga su
programma cumpretu dae inoghe.
Sabidoria antiga (2° parte)
In custos
tempos de crisi e de dificultade econòmica, non nos faghet male a ammentare su
chi naraiant sos antigos.
Dae su libru
Sos consizos de giagiu. Proverbi e detti popolari raccolti nella città di
Bosa (de Gianni Fois) nde bogamus unu ditzu sàbiu chi narat Dae su pagu
paghitu e dae su nudda niente. Est a nàrrere chi dae su pagu, si unu
s'acuntentat, si bi podet campare. Sa peus cosa, difatis, est a non tènnere
nudda.
Fonte: Gianni
Fois, Sos consizos de giagiu. Proverbi e detti popolari raccolti nella città
di Bosa (Nuoro, Grafiche Editoriali Solinas, 2011)
Sabidoria antiga
Dae su libru
Sos consizos de giagiu. Proverbi e detti popolari raccolti nella città di
Bosa de Gianni Fois publicamus unu ditzu in rima chi dat consìgios de bonu
cumportamentu.
Cando
calicunu est revessu e non s'abìgiat chi est isballiende, e però non s'istracat
de criticare sos difetos angenos, su ditzu li narat:
Su mare
(ch'est su mare)
àltziat e
torrat in tinu,
e tue, chi
ses trainu,
in tinu non
cheres torrare.
Est a
nàrrere: cando unu isbàlliat est giustu a riconnòschere s'errore.
Fonte: Gianni
Fois, Sos consizos de giagiu. Proverbi e detti popolari raccolti nella città
di Bosa (Nuoro, Grafiche Editoriali Solinas, 2011)
Sa filigrana bosinca
Dae sa
Libreria Digitale de Sardigna un'àteru filmadu interessante chi faeddat de
un'arte tìpica de Bosa: sa filigrana.
Su filmadu,
inseridu in su percursu "Manos imbenteras", est totu in sardu
e documentat su traballu de Istèvene Rùggiu, mastru òrafu bosincu.
Intervista a Rosa Schintu
Sa Libreria
Digitale de Sardigna at publicadu s''intervista a Rosa Schintu, una de sas
ùrtimas mastras de "filet" bosincu.
Si bi
faeddat de traballu, de traditziones, de festas e de su momentu ispantosu cando
sa televisione nch'est intrada a sas domos.
Monumentos abertos
Sàbadu 27 a sas 3 de sero in pratza Gioberti
s'inàugurat sa III editzione de "Monumentos abertos", chi permitit a
chie est interessadu de connòscherre monumentos, sitos istòricos e museos de
Bosa.
Sos
istudentes de iscola mèdia e superiore (ma finas sos pitzinnos de iscola
elementare), paris cun assòtzios culturales e cun voluntàrios, ant a
acumpagnare sos visitadores e lis ant a contare s'istòria e sa bellesa de sa
bidda issoro.
Domìniga 28 a sas 8 de sero in su Teatru
comunale s'at a serrare sa manifestatzione cun sa cunsigna de sos atestados.
Unu vìdeo de su 1989
Dae sa
Libreria Digitale de Sardigna un'àteru bellu documentàriu chi mustrat sa festa
de Regnos Altos in su 1989.
Si bi podet
bìdere sa essida de Nostra Signora dae su casteddu, sa prutissione in sas
carreras de sa Costa, sos altaritos mudados a frores, sa chena de su note.
B'est finas sa prutissione de sa die in fatu, cando Nostra Signora nche torrat
a "domo" sua.
Unu documentàriu de sos Annos Chimbanta
Comente fiat
Bosa in sos Annos Chimbanta?
Sa Digital
Library at salvadu unu vìdeo (mudu) de cussos annos, chi mustrat su tzentru, su
ponte betzu, su casteddu e sa catedrale. Calicunu, fortzis, si bi podet
connòschere.
Sa Digital
Library de sa Regione, pro chie est interessadu a sa limba e a sa cultura
sarda, est una miniera de documentos.
Est
articulada in setziones (vìdeo, immàgines, àudio, testos, argumentos) e dat sa
possibilidade de iscarrigare su materiale archiviadu.
Su materiale
archiviadu pertocat a ogni bidda, cun testos, documentos vìdeo, àudio e
fotogràficos.
In sa
setzione de sos testos bi nd'at prus de 2.000 intre documentos, ditzionàrios,
entziclopedias, lìbros de narrativa e de poesia, etc.
Istudiende e cantende
Sighint sas
atividades pro sos 900 annos de su casteddu de Bosa.
Sàbadu 29 de cabudanni b'at una sèrie de
atividades cullegadas a s'istòria e a sa cultura locale.
A sas 4 de
sero in su casteddu b'est su cunvegnu Il castello Malaspina, novecento anni
di storia fra tradizione e innovazione, a cura de prof. Marco Milanese.
A sas 7
s'Assòtziu "Cuochi della Provincia di Oristano" (sede istacada de Bosa)
presentant sos màndigos tìpicos locales.
A sas 9 de
sero b'est sa manifestatzione Cantende a traggiu. Sos grupos "Coro
di Bosa", "Traggiu 'Osincu" e "Coro di Castelsardo"
ant a mòvere dae su casteddu a cara a Piata ('Corso Vittorio Emanuele'),
passende dae Sa Costa. In caminu a
Sighit sa festa pro su "centenàriu" de su
casteddu
Pro
ammentare chi su casteddu Malaspina de Bosa ocannu faghet 900 annos, ista chida
sighit sa festa aparitzada dae s'Amministratzione comunale paris cun assòtzios
e cooperativas locales.
Sàbadu 22 de cabudanni a sas 9 e mesa de sero
in su casteddu: Cantat Maria Giovanna Cherchi cun sa band sua.
Domìniga 23 a sas 11 e mesa in su Càrmene:
Esibitzione de isbanderadores e figurantes in costùmene medioevale (a cura de
su Grupu Istòricu Medioevale "Ghibellina" de Igrèsias).
A sas 4 de
sero sos cadderis, isbandieradores e figurantes ant a mòvere dae su casteddu a
cara a "via Lungo Temo", in ue ant a cùrrere a parìglia a sas 5 (a
cura de s'assòtziu "Sos cadderis").
Su casteddu faghet 900 annos
Ocannu su
casteddu de Bosa faghet 900 annos dae cando l'ant fraigadu (paret in su 1112).
Intre
istòria e legenda su casteddu est istadu su sìmbulu de custa tzitadina, e
s'Amministratzione at organizadu una sèrie de manifestatziones pro ammentare
custa data.
Sàbadu 15 de cabudanni dae sas 4 e mesa a sas
7 e mesa de sero in su casteddu: Legendas antigas, giogos medioevales e
"Caccia al tesoro" pro sos pitzinnos.
A sas 8 de
sero: Proietzione de su documentàriu "Bosa città lungo il fiume"
de Benito Castangia.
A sas 9 de
sero: Ispetàculu musicale "Eleonora d'Arborea - Ultima giudicessa"
cun Gian Luca Medas e su trio Crais.
Domìniga 16 a sas 10 in sas pratzas de Bosa:
Poste Italiane faghet unu "annullo filatelico" dedicadu a custu
eventu.
Nostra Signora de Regnos Altos
Custu fine
de chida in Bosa si festat a Nostra Signora de Regnos Altos.
Sa festa est
nàschida fortzis in su 1847, cando unu pitzinneddu at agatadu in sas ruinas de
su Casteddu Malaspina un'istatua minoredda de Nostra Signora, chi fortzis est
prus antiga de su casteddu matessi (ch'est de su sec. XIII).
Sa festa si
faghet ogni annu sa segunda domìniga de cabudanni.
Programma de
sa festa religiosa:
Sàbadu 8 de cabudanni a sas 5 e mesa de sero
in su casteddu: Prutissione dae sa crèsia de Regnos Altos a Catedrale e
beneditzione de sos altaritos de sa Costa dedicados a Nostra Signora. Su coro
de Bosa cantat su "Deus ti salvet, Maria".
Domìniga 9 a sas 5 e mesa de sero in
Catedrale: Prutissione dae Catedrale a su casteddu, e Missa in sa crèsia de
Regnos Altos. A sa prutissione bi partètzipant figurantes in costùmene
medioevale.
"Ti con Zero" presentat a Michela Murgia
Oe (22 de
austu) a sas 9 de sero in su Càrmene, sa libreria "Ti con Zero"
presentat su libru "L'incontro" de Michela Murgia. Su reladore
est Omar Onnis.
Seis totus
invitados a partetzipare.
Eventos pro sa fine de su mese
Dae su 25 a
su 31 de austu in
su Càrmene: Mustra personale de pitura de Mario Giordano.
Presentatzione
de su libru "Regalati una poesia, farsi accarezzare da parole che ti
somigliano".
Dae su 29 de
austu a su 2 de cabudanni: "L'arte del vivere in viaggio". Eventos divulgativos de
shiatsu, cantu, mùsica, dansa, teatro e cuntzertos. Su progetu est de Tiziano
Lamantea, Lucilla Galeazzi e Ornella D'Agostino.
Sos apuntamentos de ista chida
Chenàbura 17 a sas 9 de sero in pratza "IV
Novembre": Ballu sardu in pratza paris cun s'assòtziu "La Foce".
A sa matessi
ora in Bosa Marina (Lungo Mare Mediterraneo): Ispetàculu de saltimbancos, mimos
e giocolieris.
Sàbadu 18 a sas 9 de sero in Cunventu:
Rapresentatzione teatrale "S'Uffiziu 'e s'anagrafe" a cura de
s'assòtziu teatrale "Sas comares".
Domìniga 19 a sas 9 de sero in pratza Gioberti:
Isfilada-ispetàculu "L'oro dei nuraghi" in collaboratzione cun
sa C.C. de Nùgoro e de Aristanis. Presentat Giuliano Marongiu.
"Carrasegare 'Osincu" de istiu
Mèrcuris 8 de austu: Inauguratzione de sa
mustra fotogràfica "Caras de su Carrasegare 'Osincu", a cura de
Maurizio Torretti e Enzo Fida. Sa mustra abarrat aberta finas a su 18.
Gioja 9 a sas 9 de sero in Bosa Marina:
Isfilada de màscaras de Sardigna.
Chenàbura 10 a sas 9 in Bosa: Màscaras lìberas
cun mùsica, ballos e produtos tìpicos locales.
Sàbadu 11: Santa Filomena.
Domìniga 12 a sas 9 de sero in su Càrmene:
"Bici nuragica 2012" a cura de s'assòtziu culturale Fusibilia
in collaboratzione cun sa libreria TiconZero e cun sa Memòria
istòrica.
Festa de Santa Maria de Mare
Custu fine
de chida in Bosa si festat a Santa Maria de Mare. Sos piscadores bi tenent in
manera particulare.
Domìniga 5 de austu a sas 10,00 b'est sa Missa
in sa Crèsia "Stella Maris" e, a pustis, sa prutissione peri
su frùmene.
A su sero, a
sas 6 e mesa, b'est sa prutissione solenne: sas barcas mudadas a festa partint
dae Bosa a cara a Bosa Marina, in ue si faghet sa Missa in pratza de crèsia.
A sas 11 de
note bi sunt sos fogos pirotècnicos in sa Turre Aragonesa.
Sos apuntamentos de "Bosaestate" pro ista
chida
In Bosa
sighint sos apuntamentos de "Bosaestate 2012".
Manifestatziones
de ista chida:
Gioja 26 a sas 9 de sero in Cunventu:
S'Orchestra de su Teatru Lìricu presentat "Le otto stagioni";
Chenàbura 27 a sas 9 e mesa de sero in Pratza
Passino: Cuntzertu "Luisa Monti" pro s'Emìlia;
Artigianadu:
A cura de
s'assòtziu "La Foce", chenàbura 27 a sas 7 de sero in su
Teatru comunale s'inàugurat sa 3° rassigna "Manos de Oro".
In intro de
custa manifestatzione, sàbadu 28 a sas 6 de sero (semper in su Teatru)
s'ant a presentare sos libros "A dir di Bosa" de Ottorino Mastino,
"A cavallo della vita" de Carlo Sorgia e "Iscampuddu
Cesaracciu" de Mario Scampuddu.
Domìniga 29 a sas 7 de sero in su Teatru si
proietat su documentàriu "Bosa città lungo un fiume" de Benito
Castangia.
Arte e
cultura:
Sàbadu 28 a sas 9 de sero in su museu
"Casa Deriu" s'inàugurat sa mustra "Terra Madre" de Pina
Monne;
Dae su 29 a
su 18 de austu in Cunventu
s'at a fàghere sa "Summer School" cun Prof. Milanese,
Universidade de Tàtari e Soprintendèntzia Archeològica.
"Bosaestate 2012"
S'Assessoradu
de sa Cultura ocannu proponet unu calendàriu de manifestatziones ricu meda.
Manifestatziones
de ista chida:
Mèrcuris a
sas 9 de sero su Teatru Lìricu de Casteddu presentat sa "Cantata n.147 e
Magnificat BWV 243 di Johann S.Bach";
Gioja a sas
7 de sero b'est sa presentada de su libru “Sardo luce degli Dei” de Vittorio
Melis;
Chenàbura a
sas 9 e mesa de sero b'est sa presentada de su libru “Per legge superiore” de
Giorgio Fontana;
Sàbadu a sas
7 e mesa de sero b'est sa presentada de su libru “Ghibli in arrivo” de
Francesca Spinola e a sas 9 si torrat a fàghere “BOSA IN DANZA”.
Est operativu in Bosa s'Ufìtziu Limba Sarda
Dae su mese
de trìulas est operativu in Bosa s'Ufìtziu de sa Limba Sarda.
Ocannu su
servìtziu est a livellu sovra-comunale (in rete cun totu sos Comunes de
s'Unione de Comunes de Planàrgia e Montiferru otzidentale) e Iscanu est su
Comune capofila.
Pro cale si
siat informatzione s'Ufìtziu est abertu ogni mèrcuris in oràriu 15,00-18,00.
Nessun commento:
Posta un commento
Nota. Solo i membri di questo blog possono postare un commento.