"Suta de su matessi chelu" - Unu contu de Stefania Spanedda pro agiuare a sos pitzinnos a non tìmere sa pandemia

Illustratzione de Massimiliano Feroldi

Cales sunt sos sentimentos de sos pitzinnos in custu tempus de emergèntzia coronavirus? Comente los podimus agiuare a cumprèndere su chi est capitende e a non tìmere?

Custas preguntas si las at fatas Stefania Spanedda, una mastra de iscola elementare originària de Bosa chi at pensadu de iscrìere unu contu pro dare a sos prus piticos unu messàgiu de isperàntzia. Cun custu disìgiu est nàschidu su contu Sotto lo stesso cielo. Storia di 清  di Qīng e 月 Yuè, chi faeddat de Qīng, una pitzinna tzinesa chi cando comintzat sa pandemia si devet separare dae sa mama chi est dotora. Gràtzias a sas paràulas sàbias de sa giaja, sa pitzinna cumprendet chi sa gente podet abarrare aunida cun su coro mancari nche siat a tesu, ca a bortas bastat de abbaidare sa luna in su matessi momentu.

Su contu, pro more de sas illustratziones de Massimiliano Feroldi e de su montàgiu de Valentina Giorgio, s'est trasformadu in unu vìdeu cartoon chi in sa versione italiana tenet sa boghe de Rita Bittolo.

Cun s'agiudu de tantos voluntàrios e de sos assòtzios ANGI (Associazione Nazionale Giovani Italo-Cinesi), Alma Teatro e "Antonio Gramsci" de Torino, su contu at tentu sa tradutzione in 12 limbas.

Pro voluntade de s'autora e de s'assessoradu a s'Istrutzione Pùblica de su Comune de Bosa, su vìdeu est istadu fatu finas in sardu: sa tradutzione l'at curada s'Ufìtziu Limba Sarda de Bosa, sa colunna sonora l'at iscrita su jazzista nugoresu Bainzu Mùrgia e sa boghe chi narat su contu est de Cristina Maccioni. Custu bellu traballu s'est pòdidu realizare finas gràtzias a s'agiudu de Piergavino Sedda.

Su Coordinamentu Natzionale Insegnanti Specializzati (C.N.I.S.) de Vercelli at postu a disponimentu su traballu in sa pàgina sua pro chi esseret imbàtidu a famìllias e iscolas chi lu cherent impreare.

Pro su 7 de maju, die de luna prena, su C.N.I.S. proponet unu flash mob pro chi pitzinnos e famìllias de totu su mundu s'intendant aunidos abbaidende sa luna totu paris a sas 9 de sero.

Chie cheret podet contare custa esperièntzia cun paràulas o disignos mandende una mail a s'assessora Paola Pintus (paola.pintus@comune.bosa.or.it).

Su vìdeu in sardu e su pdf in sardu sunt a disponimentu de chie los cheret bìere o iscarrigare.

Pro lèghere e abbaidare sos vìdeos in àteras limbas bos podides cullegare a sa pàgina de su C.N.I.S. de Vercelli.

(GF.P.)

Illustratzione de Massimiliano Feroldi