Sune

ARCHIVIU NOVAS DE SOS ANNOS COLADOS

"Natal'insieme" - Unu sero in sa magia de su Nadale

Su Comune de Sune faghet a ischire chi chenàbura 21 de nadale dae sas tres e mesa in carrera Tinnura s'at a organizare "Natal'insieme", unu sero de initziativas e animatzione isetende su Nadale. B'at a àere animatzione pro sos pitzinnos, mùsica e àteras cosas bellas. B'at a èssere puru s'espositzione de produtos artigianales.

 

 

Pianos personalizados L. 162/1998 - Annu 2019

Si faghet a ischire a sos tzitadinos benefitziàrios de sos pianos personalizados de sa L. 162/1998 chi sa Regione Sardigna at autorizadu a sìghere finas a su 30 de abrile 2019 cun sos matessis importos mensiles de su 2018. Intro sos primos tres meses de su 2019 si devet agiornare s'ischeda sotziale, sa tzertificatzione ISEE 2019 e s'ischeda sanitària noa si s'utente s'est agravadu. In prus, dae su 1 de maju, podet presentare su pianu nou personalizadu chie tenet sa tzertificatzione de disabilidade. Totu sos interessados si podent rivòlgere a s'Ufìtziu de sos Servìtzios Sotziales e presentare: 1) Tzertificatzione chi atestet sa conditzione de handicap grave; 2) ISEE 2019; 3) Ischeda cumpilada dae su dotore; 4) Documentu de identidade vàlidu, chi non siat iscadidu. 

Sa documentatzione si podet presentare dae su 17/12/2018 a su 18/02/2019 in s'Ufìtziu de sos Servìtzios Sotziales.

Prèmiu de contadura in limba sarda "Contos e paristòrias"

Sàbadu 02/01/2016 a sas bator de sero (h 16,00) in sa biblioteca comunale de Sune s'at a fàghere sa premiatzione de su Prèmiu de contadura in Limba Sarda "Contos e Paristòrias" (III ed.).

A pustis b'at a àere unu cumbidu ofertu dae s'Amministratzione Comunale.

Custas sas òperas premiadas:

• I prèmiu: SOS BATTOR BICOS DE S'AMISTADE - Rachel Falchi
• II prèmiu: NOIS, SOS MUNTAGNINOS, SOS ROMANOS -  Albino Pau
• III prèmiu: LUISSA - Leonardo Angelo Berrai
• Prèmiu Ròtary: CHIE NON TENET ITE FAGHERE - Sandro Biccai

Mentziones:

• LU BATTIU - Maria Antonietta Sechi
• DIES DE MAJU - Giovanni Chessa
• IS CONILLUS DE BIDDA - Gigi Tatti
• DIANZINEDDOS - P. Giuseppe Branca
• FURITTU - Ida Patta
• NIGOLA CASTANZA - Stefano Flore
• L'AMORI NO E' CIUDDHA - Giovanni Piredda (fora de cuncursu)

Iscolas premiadas:

• I prèmiu: S'ISCAMPAGNADA DE SA FAMIGLIA PROCU - Ins.: MARIA MASIA E TERESINA LICHERI
• MENTZIONE EX AEQUO: TRAMPENDE NO S'ANDAT A LOGU - MARTINA NUVOLI ( 2° ELEMENTARE ) e SU DINARI NON COMPORAT S'AMORE - LIDIA ARRU (2° ELEMENTARE). 

Benide in medas, bos isetamus!

Atopu informativu de Laore

S'Agentzia regionale pro s'isvilupu in agricultura (Laore) organizat un'atopu informativu pro faeddare de sa PAC (Polìtica Agrìcula Comunitària) 2014-2020 in sas aziendas zootènnicas. Chie totu est interessadu est invitadu a partetzipare a sa riunione chi s'at a fàghere chenàbura 4 de Nadale 2015 a sas 10,30 in sa Ludoteca Comunale de Sune. 

Su presèpiu in sas famìllias

S'Amministratzione Comunale de Sune, paris cun sa Parròchia "Santa Maria ad Nives", organizant unu cuncursu pro su presèpiu prus bellu. Sas famìllias chi cherent partetzipare podent presentare sa domanda in s'Ufìtziu Servìtzios Sotziales. Sa cummissione at a passare in sas domos a bìere e valutare sas òperas a partire dae su 09 de Nadale 2015. Sa premiatzione s'at a fàghere su 27 de Nadale 2015.

Ammentu de sos MORTOS IN GHERRA - IV de santandria 2015

S'Amministratzione Comunale de Sune invitat a partetzipare a s'ammentu de sos mortos in gherra chi s'at a fàghere su 4 de santandria de su 2015.

Su programma de sa die est custu: 

• h 11,00: Sos partetzipantes devent atopare a Comune;
• h 11,30: Santa Missa;
• h 12,30: Depositzione de sas coronas in sos monumentos, pro ammentare sos mortos de totu sas gherras;
• h 13,00: Cumbidu in pratza A. Bua.

"Sa mesa 'e sos moltos"

Sa Domo Museu "Tiu Virgìliu", paris cun sas Bibliotecas de Sune e de Tinnura, cun s'intentu de fàghere connòschere e ammentare sas usàntzias antigas de sa Pianalza, invitant a sa manifestatzione "SA MESA 'E SOS MOLTOS"  chi s'at a fàghere lunis 2 de santandria 2015 a sas ses de sero (h 18,00) in sa Domo Museu "Tiu Virgìliu" in Sune. B'at a èssere finas unu cumbidu "Pro sas ànimas". Chie cheret podet ammentare custas traditziones chi at connotu in sa vida sua.

 

"RocKas in campu" - Duos eventos musicales de non pèrdere

S'11 e 12 de làmpadas, in ocasione de su campionadu mondiale de Rally "Italia Sardegna 2015", s'assòtziu culturale RocKas e sas amministratziones de Frussio, Sàgama, Sune e Tinnura paris cun sa Pro Loco de Sune organizant "RocKas in campu", duos eventos musicales chi sos amantiosos de sa mùsica bona non si podent pèrdere:

giòbia 11 de làmpadas a sas 9 e mesa (h 21,30) in su campu isportivu de Sune ant a sonare sos grupos Redrum Experience, Slim Fit e Breakin'Down;

chenàbura 12 de làmpadas a sas 9 e mesa (h 21,30) in su parcu de Santu Micheli in Sàgama ant a sonare sos grupos 70 beat e MsM.

Pro carchi detàlliu in prus leghe s'artìculu de Bentos.

 

Tzia Dèlia festat sos 100 annos

Festa manna domìniga in Sune pro sos 100 annos de tzia Dèlia Masia. S'est fata sa Missa de ringratziamentu e in antis su Sìndigu at fatu sos augùrios a tzia Dèlia a nùmene de s'Amministratzione Comunale e de totu sa comunidade. L'ant regaladu una pergamena cun s'estratu de sa data de nàschida pro ammentare custa die ispetziale. Totu sa bidda at partetzipadu a sa festa cun praghere mannu. Tzia Dèlia at tentu paràulas bellas de ringratziamentu pro totus e in fines at cantadu sos gosos de sos Santos Gòsomo e Domianu chi tenet in devotzione manna. A tzia Dèlia e a sa fìgia Antònia sos augùrios prus bellos a àteros annos cun salude!

In sa fotografia tzia Dèlia in sa Domo Museu de Sune, chi fiat sa domo de sa famìllia sua.

 

Biàgiu pro sos giòvanos a Bratislava e Budapest e pro sos mannos a Madrid

S'Assessoradu a sos Servìtzios Sotziales de su Comune de Sune faghet a ischire chi est organizende duos biàgios de vacàntzia: unu pro sos giòvanos a Bratislava e a Budapest e unu pro sos mannos a Madrid. Sas domandas cherent presentadas intro de su 21/10/2014 (pro sos giòvanos) e intro de su 30/10/2014 (pro sos mannos). 

Festa de Santa Maria de su Nie

Su 4 e su 5 de austu in Sune si festat a Santa Maria de su Nie. In custas dies b'at manifestatziones meda, tziviles e religiosas.

Su 4 a sas noe de sero (h 21,00) b'at a èssere "SU(O)NI D'ESTATE", sero de mùsica cun sa partetzipatzione de grupos meda. Su 5 b'est sa Missa Magiore a sas 11, sa prutissione a sas sete de sero (h 19,00) e a sas deghe de note (h 22,00) rassigna internatzionale de folklore.

Una cosa bella meda est chi Sune at tramandadu finas a dies de oe s'usàntzia de fàghere  sa Novena de Santa Maria de su Nie e su Rosàriu in limba sarda. Pro chie bi cheret partetzipare, si faghent dae su 27 de trìulas a su 4 de austu.

 

Sos caddos birdes de santu Pancràtziu

In Sune su 12 de maju si festat a Santu Pancràtziu (o, comente narant sos sunesos, Santu "Brecatzu"). Una paristòria antiga narat chi in sa crèsia de Santu Pancràtziu b'aiat unu putzu cun abba miraculosa. Sa die de sa festa sos chi curriant a caddu in  onore de su Santu faghiant inghiriare sa crèsia a sos caddos cando su Vicàriu naraiat sa Missa. In su mentres faghiant bufare a sos caddos s'abba de unu putzu collocadu in dae segus de s'altare majore. Si bufaiat s'abba cando su Vicàriu cunsagraiat s'òstia, su caddu si faghiat birde.

Sa petza imbinada e a saltza

Sas Cunfradias de Santa Rughe e de Su SS. Rosàriu, cun su cuntributu de s'Amministratzione Comunale de Sune, organizant e invitant a partetzipare a sa segunda Sagra de sa peta imbinada e a saltza chi s'at a fàghere sàbadu 21 de nadale de su 2013, in carrera San Pancrazio dae sas ses de sero (h 18,00). 

Letzione de manovras de "disostruzione pediatrica"

Su Comune de Sune, paris cun sa Croce Rossa Italiana, Comitadu locale de Bosa, organizat una letzione de manovras de "disostruzione pediatrica" chi s'at a fàghere su 13/12/2013 in s'iscola mèdia de Sune in Via IV Novembre a sas ses de sero (h 18,00). S'initziativa est aberta a totus ma in particulare a maistros de asilos, iscolas maternas e elementares, genitores, giajos, baby-sitter, pro imparare sas manovras de "disostruzione e rianimazione pediatrica". Sa riunione durat duas oras e pro partetzipare non si pagat nudda.

"Soggiorno giovani" in Madrid

S'Assessoradu a sos Servìtzios Sotziales de su Comune de Sune faghet a ischire chi est organizende su "Soggiorno Giovani 2013" in Madrid dae su 19/11/2013 a su 23/11/2013. Sas domandas cherent presentadas a s'Ufìtziu de sos Servìtzios Sotziales intro de su 18/10/2013.

Campionadu de fùbalu ('calcio')

Sas Amministratziones comunales de Frussio, Sune e Tinnura, cun sa collaboratzione de sas sotziedades isportivas Nikeyon Suni e sa Flussiese, invitant a partetzipare a su campionadu de càlcio riservadu a pitzinnos (òmines e fèminas) dae sos 5 a sos 16 annos. Sos mòdulos e sas informatziones si podent preguntare in onni comune de residèntzia. Sas iscritziones iscadint su 16/09/2013 a mesudie (h 12,00). 

"Soggiorno Anziani 2013"

Su Comune de Sune organizat unu biàgiu pro sos antzianos a Madrid. S'edade mìnima pro partetzipare est 60 annos. Sas domandas cherent presentadas intro de su 26 de austu in s'ufìtziu Servìtzios Sotziales de su Comune, in ue b'est sa modulìstica. Paris cun sa domanda si devet presentare sa còpia de s'ùrtima decraratzione de su rèdditu o de su CUD 2013.

Cursu pro imparare a nadare

S'Assessoradu de sos Servìtzios Sotziales de su Comune de Sune organizat unu cursu, in "Abba Mala Village", pro imparare a nadare a sos pitzinnos. Podent partetzipare sos pitzinnos nàschidos intre su 2008 e su 2000. Pro presentare sa domanda e pro cale si siat informatzione, si podet preguntare in s'ufìtziu de sos Servìtzios Sotziales de su Comune. 

Cursa de solidariedade in Pianalza

"Sardegna Solidale" de Bosa, paris cun sos assòtzios de volontariadu de Pianalza (Sune, Tinnura e Frussio) organizat pro domìniga 23 de Làmpadas 2013 sa II editzione de sa "Cursa de sa solidariedade",  chi tenet su fine de valorizare su volontariadu.

Si movet a sas 9,00 dae Pratza Bua in Sune, si faghet pasu in Tinnura e s'imbatet a Frussio in ue, in localidade "Sa Roda", b'at a èssere sa premiatzione a mesudie e mesu  (h 12,30) e a sa una (h 13,00) s'at a mandigare totu paris.

 

Progetu "Intrecci"

Sos Comunes de Bosa, Sune, Tinnura e Frussio paris cun sa Fondazione con il Sud ant aparitzadu su progetu “Intrecci”, indiritzadu a totu sos tzitadinos de su territòriu.

Su progetu est articuladu in 3 setores:

1.      Isportellu informativu: pensadu pro chie cheret connòschere mègius sos servìtzios dados dae sos Comunes, màssimu pro sos disàbiles e sas famìllias issoro. S’isportellu informat subra de sas leges de assistèntzia e sos servìtzios ativados (CSM, consultòriu, agiudu a chie tenet maladias graves o problemas de dipendèntzias) e agiudat a cumpilare sas pràticas ASL.

2.      Cursu de vela: pro sos giòvanos, pro lis imparare a amministrare una barca. Su cursu est de 50 oras, si faghet in sa marina de Bosa e pro lu fàghere tocat a s'iscrìere.

3.      Laboratòrios traditzionales: pro chie totu est interessadu a imparare a coghinare sos màndigos antigos, a cosire, a laurare ('lavorare il Filet') e a fàghere cestinos de isciareu ('asfodelo'). Tocat a s'iscrìere.

Pro tènnere totu custos servìtzios NON SI PAGAT NUDDA.

Chie si cheret informare podet telefonare a a su nùmeru 329-4144586 (sig.ra Piera Lotti) o mandare una e-mail a s’indiritzu progetto.intrecci@gmail.com.

Sa psicòloga chi coordinat su progetu est sa d.ssa Manuela Schintu.

ORÀRIOS DE S'ISPORTELLU INFORMATIVU:

LOGU	DIE	ORÀRIU
Bosa (Sasol Point)	Martis Chenàbura	10,00-12,00
Sune (domo comunale)	Mèrcuris	10,00-12,00
Tinnura (domo comunale)	Lunis	15,30-17,30
Frussio (domo comunale)	Gioja	10,00-12,00

"Soggiorno giovani a Praga"

S'Amministratzione Comunale de Sune organizat su "Soggiorno giovani 2012" a Praga. S'edade pro partetzipare est dae sos 18 a sos 60 annos. Sas domandas si devent presentare intro de su 20 de santugaine 2012 a s'Ufìtziu Servìtzios Sotziales de su Comune.

Festa de sos santos Gòsomo e Damianu

In Sune su 25, 26 e 27 de cabudanni si festant sos santos Gòsomo e Damianu. Dae su 17 a su 25 b'est sa Novena in limba sarda. Su 26 (sa die de sa festa) b'at Missas a sas 7 e mesa, 8 e mesa, 9 e mesa, a sas 11 (sa Missa cantada cun panegìrico) e a sas 6. A pustis sa prutissione.

Sa note de su 25, a sas deghe, b'est sa segunda editzione de su festival de s'organitu "BALLOS IN PIANALZA". Su 26, a sas deghe, su complesso musicale "CANTA IN GIRO" e sos fogos de artifìtziu.

"Santu Gosomo e Damianu

Sune semper bos venerat cun fide

dae sos males lontanu tenide

sos cristianos e gai animales

maladias no s'isvilupet mai,

meighinas invanu no s'isciupede...

E Gosomo umpare a Damianu

diat un'assistentzia potente...

chi mandet agiutoriu a sa zente

niune a ambulatoriu manc'andede"

         (Remundu Piras 1975)

Iscola de calcio pro sos pitzinnos

Sas Amministratziones comunales de Frussio, Magumadas, Sune e Tinnura cherent fàghere un'iscola de calcio pro sos pitzinnos (òmines e fèminas) chi tenent dae sos 5 a sos 13 annos. Su cursu costat 10 èuros su mese e 10 èuros de iscritzione.

Sos mòdulos si podent agatare in ogni Comune de residèntzia e sas iscritziones cherent fatas intro de mesudie de su 25/09/2012.

Gita pro sos antzianos

S'Amministratzione Comunale de Sune organizat una gita pro sos antzianos a Bratislava, Vienna e Budapest. S'edade mìnima pro pòdere partetzipare est 60 annos. Sas domandas si devent presentare intro de su 14 de cabudanni 2012 a s'ufìtziu Servìtzios Sotziales de su Comune. Paris cun sa domanda cheret presentada fintzas sa còpia de sa decraratzione de sos rèdditos.

Festa de sos emigrados

S'Amministratzione Comunale e sa Pro Loco de Sune, paris cun sa Sotziedade Isportiva Nikeyon, organizant sa FESTA DE SOS EMIGRADOS su 14 de austu.

Programma:

- A sas 6 de sero, in sa sala de su Consìgiu Comunale, saludu de su Sìndigu a sos emigrados;

- A sas 7, in carrera Tinnura, isfilada de "Sos Merdules Betzos de Otzana";

- A sas 9, in Pratza Santu Gòsamu, chena a base de pische arrustidu e ispetàculu musicale.

Festa de Santa Maria de su Nie

Programma de sa festa:  

• Dae su 27 de trìulas a su 4 de austu, a sas 9 e mesa de sero, Rosàriu e Novena in onore de sa Madonna.
• Su 3 de austu a sas 7 de sero in su "campetto" comunale Torneo de calcetto "Tutto in una notte".
• Su 4 de austu a sas 6 e mesa de sero vèsperu solenne in onore de sa Madonna; a sas 10 de note in Pratza Regina Margherita "CANTAUTORES": LUCIANO PIGLIARU in cuntzertu.
• Oràrios de sas Missas de su 5 de austu: a sas 7 e mesa, 8 e mesa, 9 e mesa e a sas 11 (Missa solenne). A sas 6 e mesa de sero b'est sa Missa pro sas Cunfrarias e a sas 7 e mesa sa prutissione solenne cun sa partetzipatzione de grupos folk e cunfrarias de tantas biddas. A sas 8 e mesa "SAGRA DE S'ALBEGHE" e a sas 10, in Pratza Regina Margherita, Rassigna Folklorìstica "Canti e Balli di Sardegna" cun sos grupos folk, sos cantadores a chiterra Roberto Murgia e Stefano Sotgiu e sos Tenores de Silanos.

Prèmiu de contadura in limba sarda

S' Amministratzione Comunale de Sune, paris cun s'Universidade de Tàtari, cun s'Amministratzione Provintziale de Aristanis e cun su Rotary Club de Bosa, invitat a su prèmiu de contadura in limba sarda "Contos e Paristorias" (segunda editzione), chi s'at a fàghere s'11 de austu 2012 a sas 5 de sero in s'iscola mèdia de Sune. A pustis b'est su cumbidu e sa "Sagra de sos drucches" e sa "Sagra de su polcrabu".  

S'Ufìtziu Limba Sarda est torra operativu

Est torra operativu in Sune s'Ufìtziu de sa Limba Sarda.

Ocannu su servìtziu est a livellu sovra-comunale (in rete cun totu sos Comunes de s'Unione de Comunes de Planàrgia e Montiferru otzidentale) e Iscanu est su Comune capofila.

Pro cale si siat informatzione s'Ufìtziu est abertu ogni lunis cun oràriu 10,00-14,00.