ARCHIVIU NOVAS DE SOS ANNOS COLADOS
L. 162/98 - Agiudos pro sos disàbiles graves
S'Ufìtziu Servìtzios Sotziales de su
Comune de Sinnarìolo dat a ischire chi sos tèrmines pro sa lege 162/1998
(agiudos a sos disàbiles graves) sunt prorogados a su 30 de abrile
2019.
Chie totu est interessadu
(finas chie tenet giai sos agiudos pro su 2018) devet presentare sa
domanda a s'Ufìtziu Servìtzios Sotziales intro de su 15 de martzu 2019 aunende sos documentos chi sighint:
1) Ischeda salude (cumpilada dae su dotore de base o de istrutura pùblica);
2) Tzertificadu de disabilidade (ex lege 104/1992 art. 3, comma 3);
3) Documentatzione agiornada in casu chi b'apat àteru familiare cunvivente cun patologias graves;
4) Tzertificatzione ISEE pro prestatziones sòtziu-sanitàrias ("ISEE ristretto");
5) Documentatzione de rèdditos esentes dae Irpef (invalididade, acumpangiamentu, pensione sotziale).
Leghe s'avisu in su situ de su Comune de Sinnarìolo.
Prima editzione de sos "Càntigos internatzionales in su Monteferru"
Su Comune de Sinnarìolo organizat dae su
13 a su 16 de nadale 2018 sa prima editzione de sos "Càntigos internatzionales in su Monteferru".
Sa manifestatzione si faghet pro more de su finantziamentu de sa L.R. 7/1955 (art. 1, lit. c) in collaboratzione cun s'Orchestra da Camera de Sardigna, paris
cun sos Comunes de Cùglieri, Iscanu e Santu Lussurzu, sos Istitutos
Cumprensivos de Bosa e Santu Lussurzu e sa Fundatzione Hymnos.
A mangianu si faghent atividades didàticas cun sas iscolas, a sero càntigos a cuncordu, corales e presentatziones de libros.
Su
progetu cheret èssere momentu de cunfrontu e iscàmbiu intre artistas
montiferrinos e furisteris, pro chi finas sas generatziones noas
connoscant sa richesa de sa cultura nostra.
Seis totus invitados a partetzipare.
Progetu "Promemòria Auschwitz 2019" - Seletzione de 2 giòvanos
S'Unione de sos Comunes de Monteferru e Altu Campidanu, paris cun ARCI Sardigna, bandit su progetu "Promemòria Auschwitz 2019", chi previdet ses dies de formatzione e unu biàgiu de sete dies a Cracòvia in ue s'ant a bisitare su Museu-Fàbrica de Oscar Schindler, su "ghetto" ebreu de Cracòvia e sos campos de cuntzentramentu de Auschwitz-Birkenau.
Podent partetzipare duos giòvanos dae sos 18 e 25 annos pro onniunu
de sos Comunes de s'Unione, chi sunt Baulau, Bonàrcadu, Cùglieri, Milis,
Nurachi, Santu Lussurzu, Iscanu, Sèneghe, Sinnarìolo, Tramatza e
Tzeddiani.
Si partit su 31 de ghennàrgiu 2019 e b'at una cuota de cum-partetzipatzione de 75 èuros peròmine.
Sa domanda pro partetzipare cheret mandada intro de su 12 de nadale a custu indiritzu: https://goo.gl/g2M7nz.
Su progetu e su bandu si podent visionare colleghende·si a s'indiritzu https://goo.gl/eY3AZG.
Progetu "Domo mia": naschet sa prima Cooperativa de Comunidade de Sardigna
Sos betzos comente capitale umanu chi
cheret contivigiadu in sos logos de su connotu. Est su chi pensat
Gianbattista Ledda sìndigu de Sinnarìolo, una biddighedda de su
Monteferru chi no imbatet a 200 abitantes (pro su prus betzos) e chi at
aviadu su progetu "Domo mia" progetende sa prima Cooperativa de Comunidade de Sardigna.
S'iscopu,
comente narat su sìndigu Ledda, est a trasformare sa betzesa in una
richesa, chi permitat a sos betzos de tènnere una vida dignitosa e
serena in domo issoro, e a sos giòvanos de traballare pro lis dare
assistèntzia, agiudu e cumpangia.
"Unu tempus onni famìllia si faghiat càrrigu de sos betzos suos - narat Ledda -
ma a dies de oe sa vida est cambiada e b'at prus dificultade. Tocat a
traballare pro chi sos betzos torrent a èssere parte ativa de sa
comunidade in ue bivent".
Su
progetu "Domo mia" cheret creare una rete de assistèntzia difusa,
comente costumaiat in antigu cando sas famìllias e sos bighinados
s'agiuaiant pari-pari in una rete de assistèntzia chi faghiat de sas
biddas unu logu bellu in ue istare.
Pro pònnere in òpera su progetu su Comune de Sinnarìolo at aviadu una collaboratzione cun su Dipartimentu de Architetura, design e urbanìstica (DADU) de s'Alighera.
Sos
istudiantes de su segundu annu, ghiados dae sa diretora de Dipartimentu
Paola Pitaluga e dae sos ingegneris Giuseppe Onni e Cristian Cannaos
ant a progetare, paris cun sos amministradores, unu modellu operativu
chi siat sustenìbile pro sa bidda e chi pòngiat in rete giòvanos e
betzos in un'iscàmbiu de servìtzios e de cumpetèntzias.
Leghe s'artìculu de La Nuova Sardegna
Abbàida su servìtziu de Videolina
Seletzione de 1 impiegadu amministrativu
S'Amministratzione comunale de Sinnarìolo dat a
ischire chi est aviada sa seletzione pro assùmere a tempus determinadu
n° 1 impiegadu amministrativu (cualìfica: istrutore 4° livellu).
S'impiegadu
at a gestire un'ufìtziu de informatzione turìstica, at a catalogare sos
sitos archeològicos e at a agiornare su situ Internet de su Comune.
Podent
fàghere domanda sos disocupados iscritos a s'Ufìtziu de Collocamentu de
Cùglieri, chi non tèngiant peruna soventzione pùblica o indennidade de
disocupatzione e chi siant residentes in Sinnarìolo (o bi bivant). Bi
cheret sa cualìfica de Impiegadu Amministrativu.
Sas
domandas cherent presentadas a s'Aspal (Agentzia sarda pro su traballu -
Cùglieri, pratza de su Cunventu) o mandadas cun posta eletrònica
tzertificada intro de su 23 de santandria 2018.
Su bandu e su mòdulu de domanda si podent iscarrigare dae su situ de su Comune de Sinnarìolo.
Artìculos e fotografias de su cunvegnu de Sinnarìolo
Publicamus
artìculos, vìdeos e fotografias pro documentare su cunvegnu fatu sàbadu 21 de
santandria in Sinnarìolo.
Su cunvegnu, aparitzadu dae sos assòtzios Nino
Carrus e Borghi Autentici d'Italia, teniat s'iscopu de faeddare de
dificultades e prospetivas de sas biddas cun prus pagu de 5000 abitantes.
Sìndigos e amministradores si sunt interrogados movende dae datos chi narant
chi intro de s'annu 2050 b'at a àere 166 Comunes sardos in arriscos de
isparire, e 33 forsis ant a mòrrere intro de deghe annos.
Sos sìndigos
ant presentadu sos problemas cullegados a denatalidade, disocupatzione e
emigratzione in biddas abitadas pro su prus dae gente betza.
Concruende
sos traballos, s'assessore de sos Entes locales Cristiano Erriu at naradu chi
sa Regione est disponìbile a ascurtare sas propostas de sos sìndigos, bastat
chi andent a cara a sa semplificatzione de sos servìtzios.
Pro chie est
interessadu a s'informare mègius, ponimus su servìtziu de su TG regionale, unos
cantos artìculos online e sos interventos de sos sìndigos de
Pianalza-Montiferru registrados dae Màriu A. Sanna.
Ascurta
s'interventu de s'assessore Erriu. Ascurta sos interventos
de Gianbattista Ledda (sìndigu de
Sinnarìolo), de Omar Hassan (sìndigu de Mòdolo) e de Antonio Zedda (sìndigu de Montresta).
Leghe s'artìculu de Borghi Autentici d'Italia cun su testu de
s'interventu de Fausto Fulghesu (BAI Sardigna)
In Sinnarìolo su cunvegnu "Spopolamento dei
piccoli comuni" pro sìndigos e amministradores
Sàbadu 21 de
santandria a sas 10 de
mangianu in Sinnarìolo (sala polivalente loc. "Santa 'Itòria")
sos assòtzios Nino Carrus e Borghi Autentici d'Italia aparitzant
s'atopu intituladu "Spopolamento dei piccoli paesi: Fenomeno
irreversibile? Quali politiche e quali strumenti per invertire la rotta?".
S'atopu,
patrotzinadu dae su Comune de Sinnarìolo, cheret dare unu contributu pro
cumprèndere ite sorte ant a tènnere sos comunes chi tenent prus pagu de 5000
abitantes. In Sardigna, a nàrrere de s'Anci, sunt s'83% (314 in mesu
de 377) e bi nd'at 166 chi non sobrant sos 1000 abitantes e chi sunt in
arriscos de isparire (leghe s'artìculu de sa Nuova Sardegna).
A pustis de
sos saludos de su sìndigu de Sinnarìolo Gianbattista Ledda e de Fausto Mura de
s'assòtziu Nino Carrus, ant a dare su cuntributu issoro Efisio Arbau
(sìndigu de Ollollai), Pietro Arca (sìndigu de Sorradile, Giampiero Cordedda
(sìndigu de Bànari), Emiliano Deiana (sìndigu de Bultiggjata), Omar Hassan
(presidente Consulta Comunes Minores), Clara Michelangeli (sìndigu de
Onanie), Romina Mura (sìndigu de Sàdili e parlamentare), Umberto Oppus
(diretore de s'Anci).
Sos concruos
los at a fàghere su presidente de sa Regione Francesco Pigliaru.
Coordinat
Renzo Soro, vitze presidente natzionale de s'assòtziu Borghi Autentici.
Sìndigos e
amministradores sunt invitados a partetzipare.
Còmpitos de sas cunfradias (dae su libru "Sinnarìolo"
de Màriu A. Sanna)
Dae su libru
"Sennariolo. Storia del paese e del territorio" de Màriu A.
Sanna aprendimus chi sa cunfradia de su Rosàriu de Sinnarìolo est nàschida su 5
de santugaine de su 1755 pro more de su delegadu Bonaventura Màsala de
Aristanis. In cussu tempus su sìndigu de Sinnarìolo fiat Giuanne (Juan)
Rosa.
In Sardigna
sas primas cunfradias sunt documentadas dae su 1400 (sec. XV), in època
catalanu-aragonesa, e teniant su còmpitu de assìstere sos malàidos, riscatare
sos presoneris de sos Moros, interrare sos mortos, agiudare sos pòberos
difendende·los dae sos usureris, pònnere paghe intro de sas lites.
Ogni
cunfradia teniat un'istatutu chi li daiat règulas craras e istabiliat sos
critèrios pro b'intrare: "I confratelli, che debbono essere persone di
specchiata moralità nell'ambito della comunità religiosa di appartenenza
(parrocchia), possono partecipare alle sacre funzioni indossando l'abito e le
insegne della loro confraternita e possono partecipare in corporazione
alle processioni con le proprie insegne e vessilli" (M.A. Sanna, "Sennariolo.
Storia del paese e del territorio", Ortacesus, Nuove Grafiche Puddu,
2015, pg. 156).
Bandu de mobilidade pro Istrutore diretivu contàbile -
Cat. D
S'Amministratzione
comunale de Sinnarìolo dat a ischire chi est ativende sa protzedura de
mobilidade voluntària pro unu postu de Istrutore diretivu contàbile (cat. D) a
tempus prenu e indeterminadu, pro lu destinare a s'Ufìtziu Finantziàriu.
Chie cheret
partetzipare podet iscarrigare su bandu dae inoghe e mandare sa domanda intro de su 23
de nadale. Sas domandas mandadas cun sa PEC devent imbàtere intro de su 27 de
nadale.
Su collòchiu
s'at a fàghere su 29 de nadale a sas 5 (h 17,00) in sa domo comunale de
Sinnarìolo.
Grupos de istùdiu pro imparare sos pitzinnos a
istudiare
S'ufìtziu de
sos Servìtzios sotziales de Sinnarìolo dat a ischire chi s'Amministratzione
comunale est ativende unu servìtziu de agiudu iscolàsticu pro pitzinnos de
iscola elementare, mèdia e superiore.
Su servìtziu
prevedit de formare grupos de istùdiu pro imparare sos pitzinnos a istudiare in
manera "giusta" e pro los sighire in su traballu.
Sos
genitores chi sunt interessados podent partetzipare a sa riunione informativa
chi s'at a fàghere mèrcuris 5 de santandria a sas deghe e mesa de
mangianu (h 10,30) in s'àula de su Consìgiu de su Comune.
Riunione pro problemas Abbanoa
Su Comune de
Sinnarìolo dat a ischire chi s'ADICONSUM (Associazione Difesa Consumatori
e Ambiente) est disponìbile a fàghere una riunione pro faeddare de sos
reclamos contra a sas faturas de Abbanoa.
Chie est
interessadu (sinnariolesu o de àteras biddas) lu podet comunicare a sa
dot. Patrizia Ledda (ufìtziu Afàrios Generales), chi at a dare comunicatzione
de sa data de sa riunione.
Cunferèntzia pro ammentare sos mortos in gherra
A sos chentu
annos dae su comintzu de sa Gherra Europea, s'Assòtziu natzionale "Combattenti
e Reduci" (setzione de Sinnarìolo) organizat una cunferèntzia pro
ammentare sos mortos de ambas gherras mondiales.
Sa
cunferèntzia s'at a fàghere s'11 de santugaine a sas 5 de sero (h 17,00)
in s'iscola mèdia betza, e ant a faeddare su dot. Tino Melis e su dot. Giuliano
Chirra (espertos de s'argumentu).
Totu sa
populatzione est invitada a partetzipare.
Cummèdia "Su Sìndigu pro una die"
Sàbadu 30 de
austu 2014 a sas
9 de sero (h 21,00) in su Parcu de Santu Sebustianu a palas de s'iscola
elementare sa cumpangia teatrale "I Barbariciridicoli" de
Otzana at a presentare sa cummèdia in limba sarda intitulada "Su
Sìndigu pro una die" de Francesca Pinna e Tino Belloni.
S'intrada
est lìbera e non si pagat nudda, però tocat a si nche leare sas cadreas dae
domo.
Dae su mele de Brisi su tziculate chi at bìnchidu su
mondiale de Firenze
"E
tue, Sinnarìolo, non ses ebbia sa bidda prus minore de su Montiferru..."
podimus nàrrere parafrasende unu testu famosu de sa Bìblia.
Como
Sinnarìolo, bidda de 184 abitantes, est connota in totu su mundu finas pro more
de s'azienda "Dolce Peano" de Otieri chi pro sos tziculates
suos at impreadu su mele de ulidone ('corbezzolo') de Davide Brisi de
Sinnarìolo, e chi at chertu dare onore a sa bidda ponende·lis su nùmene suo.
Custos
tziculates, apretziados in Sardigna, in Continente, in totu Europa finas a
Rùssia, in Brasile, in sos Emirados Arabos, Bahrein e Dubai, ocannu ant
bìnchidu sa medàllia de oro in su International Chocolate Award europeu.
Custu prèmiu
('mondiale' de su tziculate de calidade) ocannu s'est fatu in Firenze e sos
tziculates "Sinnarìolo" ant bìnchidu in sa categoria "Milk.
Ganaches and truffles" ('cioccolatini al latte ripieni'). Como tenent
deretu a partetzipare a sa finale internatzionale chi s'at a fàghere in Gran
Bretagna in atòngiu.
Unu bellu
bàntidu pro Otieri (chi s'at fatu onore cun unu produtu de màssimu livellu), ma
finas pro Sinnarìolo chi at postu su mele genuinu suo.
Sas manifestatziones de custu istiu
Publicamus
su calendàriu de sas manifestatziones de s'"Istiu sinnariolesu 2014",
chi ant a comintzare custu sàbadu (19 de trìulas) cun una rassigna de ballu
latinu-americanu e ant a finire su 13 de cabudanni cun su radunu de motos
"Vespa" de època.
S'Amministratzione
comunale invitat a totus a partetzipare.
Iscàrriga su
calendàriu.
Cursu pro imparare a nadare
S'Ufìtziu de
sos Servìtzios Sotziales de Sinnarìolo dat a ischire chi s'Amministratzione
organizat unu cursu pro chi sos pitzinnos imparent a nadare.
Su cursu (in
ue si faghet finas atividade de animatzione) est pro pitzinnos dae sos 4 a sos
14 annos, e s'at a fàghere in su Village "Abba Mala".
Sos
genitores podent presentare domanda intro de su 20 de làmpadas 2014.
Gita de una die a su Flumendosa
Su Comune de
Sinnarìolo dat a ischire chi cheret organizare una gita a su lagu Flumendosa
pro su 10.11.2013.
Est a
biagiare in postale "Gran Turismo", a mandigare in ristorante
e b'at un'escursione in batellu.
Pro
partetzipare si pagat unu tantu, comente si podet lèghere in fatu:
Pro sos
residentes:
- Sos
pitzinnos finas a sos 3 annos non pagant nudda;
- Dae sos 4
a sos 11 annos si pagat 10,00 èuros;
- Dae sos 12
a sos 18 annos si pagat 25,00 èuros;
- Chie tenet
prus de 18 annos pagat 30,00 èuros.
Pro chie no
est residente:
Pitzinnos e
mannos chi non sunt residentes in Sinnarìolo pagant 75,00 èuros.
Chie est
interessadu podet dare adesione intro de su 4.11.2013 a s'Ufìtziu
Servìtzios Sotziales (chi est abertu in mèrcuris, giòbia e chenàbura).
Cuntributu pro libros de testu A.S. 2013
S'Ufìtziu de
sos Servìtzios Sotziales de Sinnarìolo dat a ischire a sos istudiantes de
iscola mèdia e superiore chi sunt abertos sos tèrmines pro presentare domanda
de cuntributu pro libros de testu (A.S. 2013-2014).
Sa domanda
cheret presentada intro de su 15.11.2013 a s'Ufìtziu Servìtzios
Sotziale, paris cun tzertificatzione ISEE (chi non sobret sos 14.650,00 èuros).
Cummèdia "Alba e pilos"
S'Amministratzione
comunale de Sinnarìolo bos invitat a partetzipare a sa cummèdia in limba sarda
"Alba e pilos" proposta dae s'assòtziu culturale "Elighelande
Teatro" de Iscanu.
Sa cummèdia,
ambientada in sa Sardigna de su tempus de su fàsciu, at a èssere rapresentada martis
13 de austu a sas 9 e mesa de sero (h 21,30) in pratza "Sa
Mandra" a palas de s'iscola betza.
Pro intrare
non si pagat nudda.
Bursas de istùdiu
Sos
Servìtzios Sotziales de Sinnarìolo dant a ischire a totu sos istudiantes
de iscola elementare, mèdia e superiore chi sunt abertos sos tèrmines pro
presentare domanda de Bussa de istùdiu pro sas ispesas tentas in s'Annu
Iscolàsticu 2012-2013.
Podet
partetzipare chie non sobrat sos 14.650,00 èuros de I.S.E.E.
Sos mòdulos
si podent retirare in s'ufìtziu Servìtzios Sotziales, e cherent presentados
intro de su 31/07/2013.
S'ammentat
chi intro de sa matessi data cherent presentadas finas sas domandas de
rimborsu ispesas de biàgiu pro sos pitzinnos de iscola materna e pro sos
istudiantes de iscola superiore.
Nicholas, su primu pitzinnu dae 3 annos a como
A pustis de
3 (tres!!!) annos dae s'ùrtima borta, su 26 de su mese de làmpadas in
Sinnarìolo est nàschidu un'àteru pitzinnu, Nicholas Massidda.
Su Sìndigu,
sos Amministradores e sa bidda intrea li dant su bene bènnidu, augurende·li
ogni bene. E àugurant a sa mama e a su babbu ditzosos chi sa cuntentesa de
custu momentu duret pro totu sa vida.
AUGÙRIOS!
Pro imparare a nadare
Sos
pitzinnos de Sinnarìolo chi cherent imparare a nadare podent partetzipare a su
cursu ammaniadu dae s'Amministratzione in su "Village Abba Mala".
Su cursu est
destinadu a pitzinnos dae sos 4 a sos 14 annos, e sas adesiones cherent dadas intro
de su 26/06/2013.
Libru fotogràficu
Sàbadu 11 de maju a sas 7 de sero (h 19,00)
in s'iscola elementare betza s'at a presentare su libru fotogràficu "In
Sennariolo", curadu dae Maria Letizia Mastino.
Sa
publicatzione, patrotzinada dae su Comune de Sinnarìolo, est promòvida dae sa
Biblioteca de Sardigna.
A pustis
presentadu su libru s'at a inaugurare sa mustra de sas fotografias antigas.
Pro intrare
non si pagat nudda.
Avisu pro Presidentes de sègiu
S'Ufìtziu
Eletorale de Sinnarìolo avisat chi sunt abertos sos tèrmines pro presentare
domanda de inserimentu in s'Albu de sos Presidentes de sègiu.
Chie cheret
partetzipare devet èssere residente e eletore in Sinnarìolo, non devet superare
sos 70 annos e devet tènnere nessi su diploma.
Pro
partetzipare tocat de cumpilare su mòdulu ch'est in Comune (Ufìtziu Eletorale)
e lu presentare intro de su mese de santugaine.
Gita a Orgòsolo
S'Amministratzione
comunale de Sinnarìolo organizat una gita de una die a Orgòsolo in data 21.10.2012,
pro Cortes Apertas.
Sa gita
prevedit de visitare sas Cortes e de mandigare in ristorante. Pro partetzipare
si pagat unu tantu, comente si podet lèghere in fatu:
Pro sos
residentes:
- Sos
pitzinnos finas a 11 annos non pagant nudda;
- Dae sos 12
a sos 18 annos si pagat 20,00 èuros;
- Chie tenet
prus de 19 annos pagat 25,00 èuros.
Pro chie no
est residente:
Pitzinnos e
mannos chi non sunt residentes in Sinnarìolo pagant 73,00 èuros.
Chie est
interessadu podet dare s'adesione a s'Ufìtziu Servìtzios Sotziales intro de
su 12.10.2012.
S'operadore
sotziale b'est in mèrcuris, gioja e chenàbura.
Domandas pro borsa de istùdiu e contributu pro libros
de testu
S'Ufìtziu de
sos Servìtzios Sotziales comùnicat:
1. Chi sunt
abertos sos tèrmines pro presentare domanda de borsa de istùdiu pro sas ispesas
tentas in s'Annu Iscolàsticu 2011-2012. Sos mòdulos sunt in Comune e
cherent presentados intro de su 10.10.2012
paris cun sa tzertificatzione ISEE vàlida a cussa data.
2. Chi sunt
abertos sos tèrmines pro presentare domanda de contributu pro sos libros de
testu. Sos mòdulos sunt in Comune e cherent presentados intro de su 26.10.2012 paris
cun sa tzertificatzione ISEE vàlida a cussa data.
"Cristian Cocco Show"
Sàbadu 11 de
austu a sas 10 de note in dae in antis de sos campos isportivos s'at a esibire
Cristian Cocco cun s'ispetàculu "Cristian Cocco Show", duas oras de
mùsica e cabaret.
Seis totus
invitados a partetzipare.
Est operativu in Sinnarìolo s'Ufìtziu Limba Sarda
Dae su mese
de trìulas est operativu in Sinnarìolo s'Ufìtziu de sa Limba Sarda.
Ocannu su
servìtziu est a livellu sovra-comunale (in rete cun totu sos Comunes de
s'Unione de Comunes de Planàrgia e Montiferru otzidentale) e Iscanu est su
Comune capofila.
Pro cale si
siat informatzione s'Ufìtziu est abertu ogni chenàbura cun oràriu 10,00-14,00.
Nessun commento:
Posta un commento
Nota. Solo i membri di questo blog possono postare un commento.