ARCHIVIU NOVAS
Su Comune aderit a su "Manifesto della comunicazione non ostile"
Su Comune de Mòdolo at aderidu a sa rete de Comunes chi si reconnoschent in su "Manifesto della comunicazione non ostile",
pensadu pro agiuare sas amministratziones pùblicas a faeddare cun sa
gente in una manera chi si potzat cumprèndere sena dificultade.
Giai dae sos Annos Noranta s'est comintzadu a faeddare de semplificare su limbàgiu amministrativu, pro dare a chie leghet sas informatziones in sa manera prus lestra chi si podet. A dies de oe, chi sa comunicatzione est finas virtuale, est ancora prus importante chi totus potzant cumprèndere su chi s'iscriet e èssere informados in manera crara, e pro custa resone su Manifestu dat deghe cussìgios fàtziles, chi si podent lèghere culleghende·si a custu link.
Connoschimus su Madagascar: vìdeo-projetzione
Sàbadu 16 de martzu a sas 6 de sero (h
18,00) in su Salone Polivalente de su Comune s'at a fàghere una festa de
solidariedade pro sos pitzinnos de Madagascar.
S'eventu est aparitzadu dae Bosa Diving Center cun s'agiudu de
s'Istitutu Cumprensivu de Bosa, su Comune de Mòdolo, sos Rotary Club de
Bosa e Tàtari e sas cantinas Madeddu e Silattari.
S'at
a projetare unu documentàriu e at a faeddare Manina Consiglio,
professoressa in pensione chi at dedicadu sa vida a sos pitzinnos de
Madagascar creende prus de 200 iscolas chi dant istrutzione a prus de
12.000 pitzinnos. Cun su traballu suo at ativadu finas ambulatòrios,
domos pro betzos, e servìtzios de assistèntzia a pòberos e cartzerados.
Ant a animare sa serada sa cantante Maria Giovanna Cherchi e su flautista Eugenio Lugliè.
Animatzione territoriale
Giòbia 14 de martzu 2019 a sas 5 de sero
(h 17,00) in Mòdolo s'at a fàghere unu laboratòriu de animatzione
territoriale in sardu pro pitzinnos dae sos 5 annos in susu e pro totu
sos babbos e mamas chi tenent praghere de bi partetzipare.
S'Amministratzione comunale e s'Ufìtziu Limba Sarda bos invitat a bènnere: nos amus a divèrtere totu paris! Mese de sa preventzione
S'Amministratzione comunale de Mòdolo dat a ischire chi su 9 de ghennàrgiu
est comintzadu su "Mese de sa preventzione", fatu in collaboratzione
cun sos dotores de s'Assòtziu "Mèigos de sa preventzione" de Sestu.
S'ant
a fàghere controllos pro sas patologias de sa tiròide, de sas titas, de
sa pròstata, de sos rungiones, de su fìgadu e de su fele. De custas
bìsitas nde podent godire totu sos residentes, màssimu sa gente manna in
perìgulu de tènnere sas patologias.
Sos esàmenes si faghent in sa domo comunale a sas 9 de mangianu, in sas datas chi sighint:
mèrcuris 09/01/2019: ecografia de sa tiròide;
mèrcuris 16/01/2019: ecografia de sa tita;
chenàbura 18/01/2019: ecografia de sa pròstata (sos òmines si devent presentare a bussica prena);
martis 22/01/2019: ecografia fìgadu e bussica de su fele (sa bìsita si faghet a istòmagu bòidu);
chenàbura 25/01/2019: ecografia de sos rungiones.
Sos esàmenes si faghent in òrdine de arrivu finas a finire sa fila.
Acordu de amigàntzia intre sos Comunes de Mòdolo e de Vigonza
S'at a fàghere oe 20 de nadale 2018 a
sas sete de sero (h 19,00) sa prima vìdeo-cunferèntzia pro presentare
s'acordu de amigàntzia intre su Comune de Mòdolo e su Comune de Vigonza in Veneto.
S'idea
est de favorire sa collaboratzione intre custas duas comunidades chi,
mancari nche siant a tesu meda geograficamente, tenent paritzas
afinidades siat naturalìsticas siat de paesàgiu e duncas podent
collaborare pro megiorare sas cunditziones econòmicas, culturales e
turìsticas de sos duos Comunes.
Sos
sìndigos Omar Hassan e Innocente Marangon leant s'impignu formale de
fàghere initziativas de collaboratzione intre Comunes e de organizare
cuncàmbios intre iscolas e assòtzios culturales, sotziales e isportivos.
S'acordu de amigàntzia est istadu aprovadu dae su Comune de Mòdolo cun delìbera n° 94 de s'8 de santandria 2018. Mercadu de Nadale... cun sorpresa
Su Comune de Mòdolo paris cun s'assòtziu
Elite Island Experience bos invitant a su Mercadu de Nadale chi s'at a
fàghere sàbadu 15 de nadale in pratza de su Comune.
Sa
festa comintzat a sas 10 de mangianu cun s'allestimentu de su Mercadu; a
mesudie e mesu (h 12,30) b'est su pràngiu cun pulenta e binu nieddu; a
sas tres e mesa (h 15,30) arribant sos sonadores de zampogna e a pustis
su coro "Mariele Ventre" de Tàtari.
A ùrtimu, Babbu Nadale faghet sas fotografias cun sos pitzinnos in sa domita sua.
Serrat sa festa su grupu musicale "Le Generazioni".
Seis totus invitados a partetzipare, ca in prus de custas b'at tantas àteras sorpresas!
Contributos pro su deretu de istudiare
S'ufìtziu Servìtzios Sotziales de su
Comune de Mòdolo dat a ischire chi sos istudiantes chi nde tenet deretu
podet presentare domanda pro otènnere sas agevolatziones chi sighint:
- Bursa de istùdiu regionale (pro istudiantes de iscola primària e segundàrias - a.s. 2017-2018);
- Bonu pro comporare libros (pro istudiantes de iscola segundària de 1° e 2° gradu - a.s. 2018-2019);
- Bursa de istùdiu natzionale (pro istudiantes de iscola segundària de 2° gradu - a.s. 2018-2019).
Totu sas informatziones e su mòdulu de domanda si podent iscarrigare dae su situ de su Comune de Mòdolo.
Iscadèntzia: 14 de nadale de su 2018.
Bonos de ispesa pro atividades ricreativas
S'ufìtziu Servìtzios Sotziales de su
Comune de Mòdolo dat a ischire chi sunt abertos sos tèrmines pro
presentare sas domandas pro otènnere sos "voucher" de ispèndere in atividades ricreativas.
Totu
sos residentes chi faghent domanda ant a retzire 200 èuros, dados
rispetende s'òrdine de arrivu e dende preferèntzia a sos pitzinnos,
finas a finire su dinari.
Sos bonos
si podent ispèndere in su 2019 dae su mese de ghennàrgiu a su mese de
santandria, e pro los rimborsare tocat a rendicontare sas ispesas.
Ocannu passadu sas domandas sunt istadas 21, pro su prus de pitzinnos chi ant impreadu su dinari pro fàghere isport.
Su bandu e su mòdulu de domanda si podent iscarrigare dae su situ de su Comune de Mòdolo.
Iscadèntzia: 30 de santandria 2018.Tzensimentu de sa populatzione
Dae su 13 de santugaine a su 23 de santandria 2018 s'Istitutu natzionale de istatìstica (Istat) est faghende su Tzensimentu permanente de sa populatzione e de sas domos.
Dae ocannu s'at a fàghere onni annu (non prus onni deghe) cun
rilevatziones istatìsticas "a campione" e Mòdolo est una de sas biddas
seletzionadas. Sas informatziones ant a abarrare riservadas, non s'at a
ischire a chie sunt riferidas ca sos resurtados benint istudiados in
forma agregada.
COMENTE
RISPÒNDERE A SU CUESTIONÀRIU
Unu
rilevadore at a andare dae domo in domo dae su 13 de santugaine a su 23 de
santandria. At a portare unu tablet
e unu tesserinu pro lu reconnòschere.
PRO INFORMATZIONES SI
PODET
·
Telefonare a
su nùmeru gratùitu Istat 800 811 177 (dae
sas 9 de mangianu a sas 9 de sero)
·
Iscrìere a
s’indiritzu censimentipermanenti.popolazioneareale@istat.it
·
Consultare
su situ www.istat.it/it/censimenti-permanenti/popolazione-e-abitazioni
Seletzione pro n° 1 operaju comunale
Su sìndigu de Mòdolo dat a ischire chi
sunt comintzende sas seletziones pro agatare n° 1 operaju, chi at a
èssere dipendente de su Comune pro 8 meses (progetu "LavoRas").
Pro partetzipare tocat a èssere residentes in Mòdolo e disocupados (o inocupados).
Chie est interessadu devet andare cantu primu a agiornare s'ischeda anagràfica in su Tzentru Servìtzios pro su Traballu de Bosa.
Chenàbura limba sarda, mùsica e bona coghina in su ristorante Sardineri
Pro sos
amantiosos de sa mùsica, de sa coghina bona e de sa limba sarda, su
ristorante-pitzeria Sardineri de Mòdolo, paris cun s'Ufìtziu Limba
Sarda, organizant un'eventu musicale chi non si podet pèrdere: chenàbura 3
de trìulas dae sas 8 de sero (h 20,00) su cumposidore eletrònicu Frantziscu
Medda "Arrogalla" at a presentare in anteprima su discu
"IS" e at a faeddare de sas tècnicas de cumpositzione. S'eventu at a
tènnere comente limba veiculare sa limba sarda.
Frantziscu Medda ispirat sa mùsica sua a
sas traditziones sardas e a sos ambientes e paesàgios de Sardigna. Collàborat
cun su mundu de su teatru e de s'arte contemporànea, at sonadu in totu Europa e
at publicadu discos pro etichetas natzionales e internatzionales.
Pro
s'ocasione su ristorante Sardineri proponet unu menu ispetziale a 20 èuros e sa
possibilidade de degustare sa malvasia de Mòdolo, Magumadas e Bosa, mantenende
aberta finas sa pitzeria pro chie non cheret rinuntziare a mandigare sa pitza.
Pro
prenotare tocat a telefonare a su nùmeru 349-0759082.
Pro
nd'ischire de prus cullega·ti a sa pàgina Facebook de su ristorante Sardineri.
Iscàrriga sa
locandina.
Mòdolo partètzipat a sa protesta de sos sìndigos
contra a Abbanoa
Su sìndigu
de Mòdolo Omar Hassan at partetzipadu custu mangianu (11/03/2015) a sa
manifestatzione contra a Abbanoa fata dae sos Cussìgios comunales de 28 biddas
sardas.
A sa
manifestatzione, organizada dae su Comitadu GASI (Gestioni Autonome
del Servizio Idrico), b'at partetzipadu prus de milli persones pro
protestare contra a sa lege chi cheret a tzèdere sa gestione de s'abba a
Abbanoa.
In prima
lìnia su sìndigu de Domusnoas Angelo Deidda, paris cun sos amministradores de
Àgghju, Anela, Arresi, Àrthana, Bessude, Biddamanna Strisàili, Bonàrcadu,
Bòtidda, Brucei, Burtei, Cherèmule, Frùmini Majori, Isporlatu, Lotzorai,
Mòdolo, Nuxis, Ortzai, Paule, Pèjfugas, Santeru, Santu Lussurzu, Serramanna,
Seui, Sìligo, Sìnnia, Su Burgu, Teulada.
Su
presidente de Anci Sardigna, Piersandro Scano, at dadu apògiu cumpletu a sos
Comunes in avolotu.
Càntigos de Nadale
Sàbadu 27 de
nadale in su
Tzentru de agregatzione sotziale de Mòdolo s'at a fàghere su Cuntzertu "Càntigos
de Nadale", cun su Coro polifònicu de Magumadas.
Su Sìndigu e
totu sa Giunta, augurende bona Pasca de Nadale e mègius annu nou a totus, bos
invitant a partetzipare.
Vìdeu de un'intervista a don Porcu
Ponimus su
cullegamentu a un'intervista a don Giuseppe Porcu publicada in sa Libreria
Digitale de Sardigna (archìviu de vìdeos, cantzones,
fotografias, libros in sardu e de sardu).
Don Porcu,
modolesu, faeddat de sa pitzinnia sua, de sos annos in seminàriu e de
s'esperièntzia comente pàrracu.
S'intervista,
fata in su 2008 dae Luigi Oliva, si podet abbaidare incarchende inoghe.
Su sìndigu Hassan in s'atopu de Montecitòrio
Su sìndigu
de Mòdolo Omar Aly Kamel Hassan, coordinadore regionale de sa Consulta ANCI pro
sos Comunes minores de Sardigna, at rapresentadu sos Comunes sardos in s'atopu
inter-istitutzionale chi s'est fatu eris 6 de santugaine in Montecitòrio in
presèntzia de sa presidente de sa Càmera Laura Boldrini.
S'atopu fiat
intituladu "I Sindaci d'Italia nell'aula di Montecitorio. Idee per il
futuro del Paese", b'at partetzipadu 500 sìndigos e si b'est faeddadu
de ambiente, finantzia locale, immigratzione, legalidade, polìticas de gènere,
ordinamentu e welfare.
Su 5 de
santandria su sìndigu Hassan at a partetzipare finas a sa Cunferèntzia
Natzionale de sos Comunes Minores chi s'at a fàghere in Milano, e in s'ìnteri
su Cussìgiu de sas Autonomias Locales de Sardigna l'at nominadu rapresentante
de sos Entes Locales in sa mesa tècnica regionale pro sa semplificatzione
amministrativa paris cun su sìndigu de Cuartu Sant'Aleni e de su presidente de
sa Provìntzia de Nùgoro.
Pro carchi
informatzione in prus leghe inoghe
Curas termales in Tìvoli. Sunt abertas sas
iscritziones
S'Ufìtziu de
sos Servìtzios Sotziales dat a ischire chi sunt abertas sas iscritziones pro
chie tenet praghere de andare a sas termas de Tìvoli.
Su biàgiu
s'at a fàghere dae su 19 a su 26 de santugaine 2014. Bi podet andare
fèminas chi tèngiant prus de 55 annos e òmines chi nde tèngiant prus de 60, e
pro fàghere sas curas termales est òbrigu a tènnere sa retzeta de su dutore.
In prus de
fàghere sas curas termales s'at pòdere andare a bìdere a Tìvoli, Subìaco,
Guidònia-Montecèlio, Sambuci, Castelli Romani, Frascati, Grottaferrata e
Marino.
S'adesione
cheret dada intro de su 10 de santugaine 2014. A tenore de su rèdditu bi
podet àere una partetzipatzione de su Comune a s'ispesa.
Servìtziu educativu e grupos de istùdiu
Martis 30 de
cabudanni a sas 4 de
sero (h 16,00) in su Tzentru de Agregatzione sotziale de Mòdolo sa Cooperativa Sirone
at a fàghere una riunione pro ispiegare a sos genitores ite est su
servìtziu educativu e comente funtzionant sos grupos de istùdiu.
Su servìtziu
est indiritzadu a pitzinnos minores e pitzocos adolescentes.
Chie est
interessadu si podet informare in Comune (ufìtziu Servìtzios sotziales) o
telefonende a su nùmeru 0785-34730 (Cooperativa Sirone).
Sos tziclistas inghìriant sas bìngias
Domìniga 14
de cabudanni sa bidda de
Mòdolo at a èssere protagonista de s'Inghìriu de sas Bìngias ('Il giro
delle Vigne'), campionadu tziclìsticu regionale de resistèntzia.
Organizadu
dae s'Assòtziu tziclìsticu "Il Fornaio Macomer" pro ammentare
a Bruno Mocci, su campionadu est patrotzinadu dae su Comune de Mòdolo cun
s'agiudu de sos Comunes de Bosa, Frussio, Iscanu, Magumadas, Sàgama, Sinnarìolo,
Tinnura e Tresnuraghes.
S'atopu est
a sas 8 a in antis de su Comune de Mòdolo. Si movet a sas 9 e mesa e tocat a
fàghere 35 chilòmetros passende dae Turas, Tresnuraghes, Sinnarìolo, Iscanu,
Sàgama, Tinnura, Frussio e Magumadas. S'inghìriu si faghet tres bortas (in totu
sunt 105 chilòmetros).
A pustis de
sa gara, s'Amministratziones tenet su praghere de cumbidare a totus.
Pro
informatziones telefonare a sos nùmeros 328-6513044 (Giancarlo Meloni);
328-7620189 / 327-6689934 (Marco Atzori).
"Il borgo in mostra"
Su 26 de
trìulas 2014 in Mòdolo s'at a fàghere sa manifestatzione "Il borgo in
mostra". Su calendàriu de sas atividades est custu:
H
10,00-13,00: Cursu de
fotografia digitale "Fotografiamo Modolo", a cura de su
fotògrafu Serafino Deriu. Chie cheret partetzipare podet telefonare a su nùmeru
348-0851406. Pro s'iscrìere si pagat 20 èuros.
H 10,30-23,00: Espositzione de sas òperas de
Serafino Deriu (in su Salone polivalente) e espositzione de bestires de isposa
e ornamentos de s'Atelier AeSSE (in su Museu).
H
15,00-17,00: Sèberu de
sas mègius fotografias de su cursu.
H 19,00: 2° Rassigna de produtos
enogastronòmicos e de artesania. S'at a fàghere peri sas carreras e l'at a
animare Enzo Mugoni.
H
21,00-23,00:
Degustatzione de "anzone errile a cansola" (màndigu tìpicu) e
de binu modolesu.
H 23,00: "S'isposa eris, oe e
cras". Isfilada de bestires de isposa dae sos Annos Trinta a oe (a
cura de s'Atelier AeSSE de M. Antonietta Campus e de su fotògrafu Serafino
Deriu). Presentat Enzo Mugoni.
In su situ de su Comune duas ofertas de traballu
Su Comune de
Mòdolo at publicadu duas ofertas de traballu signaladas pro Aristanis.
Sa prima est
pro manovale (5 meses) e sa domanda iscadit su 21 de trìulas, sa segunda
pro informàticu (3 meses) e sa domanda iscadit su 23 de trìulas.
Chie nde
cheret ischire de prus si podet cullegare a su situ de
su Comune de Mòdolo.
In morte de Orlando Biddau, su poeta de su disisperu
Su 7 de
abrile 2014 est mortu, a 76 annos, su poeta modolesu Orlando Biddau.
Amus agatadu
un'artìculu de su 1993, iscritu dae Attilio Mastino, chi contat sa vida e
s'òpera de "su poeta de su disisperu", pintende·nde sa
pitzinnia 'arcàdica' passada in Mòdolo, su dolu pro sa morte de sa mama, sas
tribulias, s'amore pro sa mugere Anna, sa soledade e su "male de
vìvere".
Lu cherimus
publicare pro ammentare a unu de sos poetas prus mannos de sa literadura
italiana contemporànea.
Nàschidu in
Fiume in su 1938 dae babbu e mama modolesos, torradu a Sardigna in tempus de
gherra, Orlando Biddau si fiat laureadu in Lìteras in sa Sorbonne de
Parigi e in Limbas Istràngias in s'Universidade de Urbino cun Carlo Bo. A
pustis, sa maladia e sas dificultades l'aiant custrintu a lassare su traballu e
a torrare a bidda sua.
S'òpera sua
contat su disisperu de sa soledade, "l'inadeguatezza del vivere"
e "l'infamante marchio degli esclusi".
Lassat 6
libros de poesias: Le verdi vigilie, L'inverno inconsolabile, L'anima degli
animali, Una fame di vento, Gufo cieco, Sale d'acqua e di grano (publicadas
dae Edes in Opera Omnia). At iscritu finas unu romanzu
semi-autobiogràficu (Predestinazione) e una sèrie de poesias in limba
sarda.
Sos dòighi nuraghes
In sos
cùcuros de sos montigros chi inghìriant sa bidda de Mòdolo b'at dòighi
nuraghes, e sos betzos narant chi in antigu in ogni nuraghe bi viviat una
famìllia.
Custas
comunidades minoreddas aiant afrontadu pestes e maladias de ogni calidade
vivende semper in paghe intre issas, finas a sas invasiones de sos Moros chi
las aiant fatas fuire pro s'aunire totu cantas a inghìriu de su nuraghe Trìpolis
(in ue fiat sa famìllia prus numerosa) e fàghere nàschere sa bidda de Mòdolo.
In sa cantzone
"Pregadoria a Babbai 'etzu (mortu e postu a sicare in sa pedra lada de
Monte Nieddu)" nos paret chi si b'agatet sa memòria de cussos tempos,
cando sas tribù viviant ognuna in su nuraghe suo. Custa cantzone, tramandada
dae sos betzos de Mòdolo, narat su contu de sa morte de "Babbai 'etzu"
(fortzis unu capo-tribù), prantu dae totus pro su bene chi aiat fatu e pro àere
"unidu meda zente / de sas baddes modolesas e nuraghes / cun
mannu coràgiu e sièntzia in mente".
Pro fàghere
onore a su mortu sa gente aiat mòvidu dae totue"cun rocos e fastizos
apicados / in coronas de pruinca imboligados / atitendedi totu a manos
giuntas".
Sa cantzone narat
chi sa nova de sa morte fiat andada currende dae sartu in sartu propagada cun
sonos e fogos: "Sonadu at su conchizu dae Corona / rispostu at su corru
in Albadanis / in su Càlmene su tocu 'e sa malora", e a pustis "Paltidu
est s'avisu dae su Monte / cun tristura ant allutos sos nuraghes".
No ischimus
de cale època est custa cantzone, e no ischimus si contat memòria de cosas
capitadas de a beru. Però nos praghet a pensare chi sa traditzione orale at
tramandadu s'ammentu de cussos tempos antigos, cando sas tribù nuràgicas
viviant in paghe in sa badde de Mòdolo pro more de s'impignu de totu sos òmines
sàbios e de bona voluntade. De totu sos Babbai.
Fonte:
Antonio Puggioni, Modolo tra storia e leggenda (Bosa, Tipografia San
Giuseppe, 2009, pp. 87-91 e 97-99)
"Sas Terras Rùgias". Nàschida de
un'amore
Finas a 50
annos como, sos giòvanos non teniant ocasiones meda pro si connòschere. Una de
sas pagas fiant sos ballos de Carrasegare, cando b'aiat unu pagu prus de
libertade de si faeddare, de ballare paris, e de cumprèndere si podiat nàschere
unu sentimentu.
Sa traditzione
de "Sas Terras Rùgias" naschet dae inoghe, e nos la contat
Antonio Puggioni in su libru "Modolo tra storia e leggenda".
Duncas in
Mòdolo, finidu su Carrasegare, sos òmines si riuniant in su salone de sos
ballos pro 'analizare' su chi fiat capitadu, cales fiant sas còpias chi podiant
fàghere bona resurtada, e programmare "Sa 'etada de sa terra rùgia".
A parte de
mangianu essiant cun unu sachitu de terra rùgia a coddu, e nde betaiant unu
pùngiu in sa gianna de ogni pitzoca chi (a s'anàlisi fata in antis) pariat
adata a unu de sos giòvanos de sa bidda, narende custas paràulas:
Boghe: "Terra
rùgia"
Coro: "Est
imbrùgia" ('è pronta per essere sparata')
Boghe:
"Est in lèpere" ('dalla canna del fucile')
Coro: "E
a chie?"
A custu
puntu si naraiat su nùmene de sa fèmina e de s'òmine, betende tres pùngios de
terra ruja in su giannile, cantende sos prègios (e carchi difetu) de sa fèmina.
A su prus,
sos giòvanos cantados si faghiant a isposos de a beru.
Sos mannos
naraiant chi custa traditzione, chi esistit in biddas meda (nois l'amus agatada
finas in Iscanu, Magumadas e Bolòtana, ma de seguru b'at a èssere in
àteros logos puru) esseret bènnida dae Àfrica.
Fonte:
Antonio Puggioni, Modolo tra storia e leggenda (Bosa, Tipografia San
Giuseppe, 2009, pp. 54-57)
Pro
connòschere sa traditzione de "Sas Terras Rùgias" in Iscanu
cullega·ti a inoghe.
Unu modolesu Campione Natzionale de tziclismu
Mòdolo si
podet bantare de tènnere unu modolesu in sos Campiones Natzionales.
Su 15 de
cabudanni de ocannu, difatis, Giancarlo Meloni at otentu su tìtulu italianu de
tziclismu de istrada in sa categoria "Master" (50-54 annos), a
pustis de 154 chilòmetros de gara in su "Giru de sas Minieras".
S'Amministratzione
comunale e sa bidda intrea li faghent sos mègius augùrios.
Torrant sos Barratzellos
Su Comune de
Mòdolo comùnicat cun praghere chi est torra operativa sa Cumpangia de sos
Barratzellos, chi tenet s'incàrrigu de vigilare in campagna pro prevènnere sa
fura.
In Mòdolo
sos Barratzellos esistiant dae sos primos de s'Otighentos ma posca, essende chi
sos giòvanos chi b'aderiant fiant pagos, si nche fiat ispèrdida.
Su capitanu
de sa Cumpangia noa (formada dae dòighi elementos) est Antoine Deriu.
Su gigante
Su 9 de làmpadas
de su 1822 su sìndigu de Mòdolo paris cun su retore e cun su pìscamu de Bosa
fiant andados a Sa Sea, in ue bi fiat una cresiedda derruta, pro
l'iscunsagrare e nde la ghetare a terra. In antis de lu fàghere nd'ant bogadu
sas relìchias de sos santos dae s'altare magiore.
Faghende sos
traballos de demolitzione, sunt essidos a campu ossos de gente interrada in sos
fundamentos de sa crèsia. In mesu de sos àteros bi nd'aiat unu de unu gigante
artu prus de duos metros, interradu in suta de pedras bene picadas ma sena
iscritura peruna. Chie diat èssere? E cando est vìvidu? Diat èssere un'òmine
importante (comente faghent pensare sa pedras bene traballadas postas in ue
nche l'ant interradu)? Unu de sos gigantes chi si mentovant in sas paristòrias?
O un'òmine 'normale' malàidu de gigantismu? No l'amus a ischire mai.
Fonte:
Antonio Puggioni, Modolo tra storia e leggenda (Bosa, Tipografia San
Giuseppe, 2009, pp. 14-15)
Festa de sas Àrbores
S'Amministratzione
comunale de Mòdolo invitat a totu sos pitzinnos a partetzipare a sa Festa de
sas Àrbores chi s'at a fàghere su 24 de santandria dae sas 9 e mesa
de mangianu (h 9,30) in localidade "Cala Salabria".
Totu sos
pitzinnos chi non sobrant sos 12 annos e chi sunt fìgios de Modolesos
(residentes o non residentes) ant a pòdere "adotare" un'àrbore e
tènnere una targa cun su nùmene issoro.
In una die
de festa non podet mancare su cumbidu, e pro custu si pedit a sas mamas si bi
la faghent a dare una manu de agiudu ammaniende carchi durche o àteru apicòniu.
Graduatòria "Mòdolo frorida"
Su Comune de
Mòdolo informat chi si podet consultare online sa relata finale de sa prima
editzione de su cuncursu "Modolo in Fiore", organizadu dae
s'Amministratzione pro valorizare sa bidda mudende de frores ventanas, balcones
e giardinos.
Bene bènnidu Federico!
Eris 10 de
làmpadas 2013 est nàschidu Federico, primu fìgiu de su Sìndigu de Mòdolo Omar
Hassan e de Maria Elena Angioi.
Amministradores
e paesanos àugurant ogni bene a su pitzinnu e a sos genitores ditzosos.
AUGÙRIOS!
Pro imparare a nadare
Sos
pitzinnos de Mòdolo chi cherent imparare a nadare podent partetzipare a su
cursu ammaniadu dae s'Amministratzione in su "Village Abba Mala".
Su cursu est
destinadu a pitzinnos dae sos 4 a sos 14 annos, e sas adesiones cherent dadas intro
de su 20/06/2013.
Sos terrinos de sos Cavalieris de Malta
In sos
sèculos passados bona parte de su territòriu de Mòdolo, Magumadas e Bosa
aparteniat a s'Òrdine de sos Cavalieris de Malta, chi teniant sa comienda
(sos benes) in Santu Lenardu de Set Fontanas.
Su primu
documentu chi nde faeddat est de su 1561, e l'at iscritu unu padre (Fra'
Alerame de la Lingueglia) incarrigadu de agatare sas làcanas de su saltu de
Andronis.
Preguntende
a sos betzos de cussas biddas Fra' Alerame aiat agatadu sas làcanas, ma nde fiat
nàschida cuntierra intre sos Cavalieris de Malta e sa tzitade de Bosa chi nde
rivendicaiat sa propiedade. Tando su pìscamu Antoni Càvaro aiat dadu incàrrigu
a unu notàriu de andare cun sos testimòngios (totu gente manna e rispetada) a
agatare sas làcanas de sos saltos de Andronis e de Bùturos de Canisteddu.
Sa chi
sighit est sa trascritzione de su documentu, chi est de su 1563:
"prencipiu
de lacana assa rughe + de sa via de Carru quale est afrontada a sa crisura de
sa vinza fuit de Johanne Suerqui quale possedit Doňu Antiogu Marras dae chue
calande a manu manca bia bia andande a Tresnuragues fini a su badu de Abba Mala
dae cue calande riu riu fini assa crisura de sa vinza de mastru Bartumeu
Pisqueda cadande per isa crisura fini assu buturinu qui passat per
mesu de dita vinza de ditu mastru Bartumeu cun sa vinja de Pedru Murta
cadande et vista de Monte Coronedu acta acta de ditu Monte Coronedu comente
betat aba a manu manca et gasi andat dita acta de Monte Coronedu finy a sa
Furrague de sa calquina de Buturos de Canistedu afrontande a su cabu de sa
rocha manna bianca de Monte Cucu vaginde a sa vinza de Anguelu Raffaelle intro
de sa jurisdictione de ditu saltu de Andronis, et Buturos de Canistedu, et
besinde da su aydu azigu de dita vintza de Raffaelle afisquiande assa quisura
de sa vinza de sos heredes de su quondam mastru Bilianu Pane bia de
mesu, et gasi seguinde dita bia finy a sa rugue de sa via que primu at
principiadu."
Totu custas
terras, sas mègius de su territòriu, fiant in giurisditzione de Mòdolo finas a
su Medioevu, e sunt passadas a Bosa ebia in su sèculu XV.
(FONTE:
Antonio Puggioni, Le proprietà della commenda di Siete Fuentes in agro di
Bosa e nelle valli di Modolo in I quaderni – L’insediamento dei Templari
e degli Ordini ospedalieri in Sardegna a c. di Massimo Rassu, Cagliari,
Editrice Arte e Valori, 2012, pp. 145-159)
Augùrios a su Sìndigu nou
In sas
votatziones comunales de su 26 e 27 de maju 2013, Mòdolo at cunfirmadu su
mandadu a Omar Hassan, Sìndigu dae su 2008, cun su 63% de sos votos.
Li faghimus
sos mègius augùrios pro chi su traballu suo, de assessores e cussigieris siat
de profetu mannu pro sa bidda e pro totu sos modolesos.
Sa prima pitzinna
Su Sìndigu,
sos Amministradores e sa bidda intrea narat "Bene bènnida!" a Laura,
sa prima pitzinna nàschida ocannu in Mòdolo, augurende·li chi in sa vida sua
non manchent mai sa paghe, su gosu e s'amore de totu sos chi l'istimant.
AUGÙRIOS!
Sos meràculos de su canònigu Onida
Dae su 1810
a su 1855 Mòdolo at tentu unu pàrracu sedulesu, su preìderu esorcista Giuseppe
Maria Onida.
Sos betzos
l'ammentant che òmine bonu mortu in cuntzetu de santidade, e narant sos contos
de sos meràculos ch'at fatu e de comente prevediat sas cosas.
Pro nde
nàrrere una: una borta aiat pregadu totu note in s'ortu. Torradu a domo a parte
de mangianu, at naradu a sa perpètua de pichiare in ogni domo de Mòdolo narende
"Su retore at nadu ch'est beninde su ciclone. Pesade.bos.nde, ponide a
seguru totu su bestiàmene e poi inserrade.bos in domo".
A lughe de
mangianu est arrivada una trumba de ària chi nd'at israighinadu àrbores
seculares e nch'at piscadu ghennas, bentanas e sa tèula dae sas coberturas. Ma
a sa gente, avisada cun tempus, no l'at capitadu nudda.
In su 1855
su canònigu Onida, betzu e tzegu, nch'est torradu a Sèdilo.
Su 31 de
trìulas de su 1856, a note alta, in sa crèsia si b'at intesu unu sonu de òrganu
e càntigos de Missa magiore. In bighinadu de crèsia non b'at dormidu niunu.
A sa fata de
sa die, est arrivada sa raporta dae Sèdilo pro avisare chi su canònigu Onida
fiat mortu.
Fonte:
Antonio Puggioni, Modolo tra storia e leggenda (Bosa, Tipografia San
Giuseppe, 2009, pp. 37-40)
Sas "pèlcias" de Sas Menduleddas e santu
Èrriu màrtire
In su cùcuru
de Monte Nieddu bi sunt sas "pèlcias" ('le caverne') de Sas
Menduleddas.
Custas
pèlcas, cuadas dae buscos aupados, in tempos antigos ant amparadu sos primos
Cristianos fuidos dae Bosa vetus pro sas persecutziones de
s'imperadore Domitzianu (90-95 p.C).
Su contu
narat chi Èrriu, unu preìderu giòvanu, a pustis fuidu dae Bosa si fiat cuadu in
sas pèlcas vivende che eremitanu. Sa fama sua aiat curtu finas a Roma, e su
paba Clemente I l'aiat fatu pìscamu. Tando Domitzianu aiat chircadu de lu
bochire, ma sa gente l'aiat liberadu dae presone (a issu e a un'àteru preìderu
chi si naraiat Silbanu).
Esiliados in
antis in Maluentu e posca in su Montiferru, custos duos preìderos sunt mortos
màrtires in Iscanu su 17 de abrile de s'82 p.C.
In su 1616 e
1628 sunt essidas a campu sas relìchias, e dae cussu momentu in Iscanu si
festant sos santos màrtires Èrriu e Silbanu su 13 de cabudanni. In antigu, a sa
festa bi pigaiant a caddu finas sos modolesos e sos bosincos, e firmaiant a
festare in domo de sos amigos iscanesos.
Fonte:
Antonio Puggioni, Modolo tra storia e leggenda (Bosa, Tipografia San
Giuseppe, 2009, pp. 70-73)
Sos arcanos de Coronedu
Finas a
primos de su Noighentos, Mòdolo s'8 de cabudanni festaiat a "Sas
Marias" in tres cresieddas de campagna (Santa Maria de Turudas,
Caravetta e Nostra Signora de Coronedu).
Sa crèsia de
Coronedu fiat sa prus manna, e sa gente at semper pensadu chi a curtzu b'aiat
unu pòsidu, cuadu fortzis pro sa timòria de sos Moros. Naraiant chi in cussos
logos bi capitaiat arcanos e mistèrios.
Unu note
(pro nde nàrrere unu) un'òmine nche fiat calende s'olia a su mòlinu de Bosa, a
caddu in s'àinu. Nant·chi in caminu aiat atopadu a unu preìderu caminende a
cara a Mòdolo. Saludados si sunt, e s'òmine at preguntadu: "E a
inue?", e su preìderu nant·chi l'at rispostu: "A Mòdolo a
nàrrere Missa".
S'incras,
s'òmine at preguntadu a su pàrracu chie l'aiat narada sa Missa, e issu at
rispostu: "Deo ebia, a sas sete".
Sa gente narat
chi cuddu preìderu de su note diat èssere un'ànima de Purgadòriu obrigada a
nàrrere Missa pro iscontare sa pena.
Fonte:
Antonio Puggioni, Modolo tra storia e leggenda (Bosa, Tipografia San
Giuseppe, 2009, pp. 47-51)
S'annu de sa "collèra"
Sa Sardigna
in antigu at patidu epidemias meda. Pro sa bidda de Mòdolo una de sas peus est
istada sa de su 1609, chi in pagos meses at degumadu sa bidda e chi est
abarrada in sa memòria de sos betzos.
Si narat chi
"in su peale de S'Ardineri bi fuit su campusantu de sa collèra",
est a nàrrere sas fossas comunes pro interrare sos mortos e, a bortas, finas
sos moribundos.
Narant finas
chi su sìndigu e s'autoridade sanitària faghiant sa cùmpida dae domo in domo
pro agatare malàidos noos e los "curare" cun una meighina de cianuro
chi provocaiat sa morte.
Sos parentes
de sos malàidos nche los bogaiant a campagna pro los cuare, e bortas meda nde
los torraiant mortos. In Su Càrmine b'ant agatadu ossos ammuntados a
carchina, fortzis restos de carchi malàidu mortu in una de custas epidemias.
Fonte:
Antonio Puggioni, Modolo tra storia e leggenda (Bosa, Tipografia San
Giuseppe, 2009)
"Ottobre in poesia"
Su Comune de
Mòdolo, paris cun sos Comunes de Tàtari, Nùgoro, S'Alilghera, Carbònia e cun su
Lussemburgo, promovet su fèstival internatzionale "Ottobre in
poesia".
A custu
fèstival b'est abbinadu su Prèmiu literàriu internatzionale "Città di
Sassari".
Sa
manifestatzione s'at a fàghere dae su 19 a s 21 de su mese de santugaine 2012.
Chie cheret
prus informatziones si podet cullegare a su situ www.ottobreinpoesia.it.
Domandas pro borsas de istùdiu
S'Ufìtziu de
sos Servìtzios Sotziales de Mòdolo comùnicat chi sunt abertos sos tèrmines pro
presentare domanda de borsa de istùdiu pro sas ispesas tentas in s'Annu
Iscolàsticu 2011-2012 (ex Lege 62/2000). Sos mòdulos sunt in Comune in
s'ufìtziu de sos Servìtzios Sotziales e cherent presentados intro de su 19.10.2012 paris cun sa tzertificatzione
ISEE vàlida a cussa data.
Cando a sos mortos los poniant a sicare
In biddas
meda de Sardigna s'est mantesu su modu de nàrrere "Ancu ti ponzant a
sicare". Est unu frastimu antigu, ma si narat sena lu cumprèndere.
Una chirca
fata dae prof. Antonio Puggioni e pubblicada in su libru "Modolo tra
storia e leggenda" (Bosa, Tipografia San Giuseppe, 2009) bogat a campu
un'interpretatzione interessante meda.
Sos
intervistados de Mòdolo mantenent galu s'ammentu de cando a sos mortos los
poniant a sicare in pedras sacrificales a curtzu de sos nuraghes, comente
ischimus chi ant fatu àteros pòpulos de àteras partes de su mundu (pro es. sos
Parsos de s'India e sas tribù americanas de sas pianuras).
S'autore de
su libru mentovat una cantone antiga tramandada in Mòdolo e intitulada "Pregadoria
a babbai 'ezzu (mortu e postu a sicare in sa pedra lada de su nuraghe de Monte
Nieddu)".
Sa cantone
incomintzat gosi:
Babbai chi
dae sa pedra ses bedinde
sos fizos
tuos meda isconsolados
chi bènnidos
nde sunt gai currinde
a cando sun
bistados avisados.
Bie sos de
sas ispilluncas
cun rocos e
fastizos apicados
in coronas
de pruinca imboligados
atitende.ti
totu a manos giuntas.
(Iscàrriga su libru e sighi a lèghere - Est a pg
97)
Contributu pro atividade isportiva
Su Comune de
Mòdolo, pro valorizare s'atividade isportiva, dat unu contributu a sos
residentes chi ant fatu atividade isportiva a pagamentu in su perìodu chi andat
dae su mese de santu gaine ('ottobre') 2011 a su mese de trìulas ('luglio')
2012.
Sas domandas
cherent presentadas intro de su 15 de cabudanni ('settembre') 2012, paris cun
totu sa tzertificatzione de sas ispesas.
S'Isee de
chie faghet sa domanda non devet superare sos 20.000,00 èuros.
Significadu de su nùmene
Mòdolo est
sa bidda prus minore de Sardigna (2,52 kmq) ma tenet un'istòria antiga meda,
chi incomintzat in su III sèculu in antis de Cristos.
Su nùmene
fortzis benit dae su topònimu "Màdala" (antigu meda, fortzis
asiàticu) o dae su latinu MODULUS ('cundutu pro s'abba').
In tempus
romanu su nùmene cambiat paritzas bortas: a cando "Modullo", a
cando "Modulo", a cando "Modol".
Su
Codex Diplomaticus (1198-1303) lu mentovat comente "Modulu de
Vallis", e in su 1341 cumparet comente "Model de Valle".
A dies de oe
in Mòdolo b'at 170 abitantes.
S'Ufìtziu Limba Sarda est torra operativu
Dae su mese
de trìulas est torra operativu in Mòdolo s'Ufìtziu de sa Limba Sarda.
Ocannu su
servìtziu est a livellu sovra-comunale (in rete cun totu sos Comunes de
s'Unione de Comunes de Planàrgia e Montiferru otzidentale) e Iscanu est su
Comune capofila.
Pro cale si
siat informatzione s'Ufìtziu est abertu ogni martis dae sas 15,00 a sas 18,00.
Nessun commento:
Posta un commento
Nota. Solo i membri di questo blog possono postare un commento.