Tinnura

ARCHIVIU NOVAS DE SOS ANNOS COLADOS

"A L'ISCHIS?" - Ispetàculu interativu in sardu

In ocasione de SA DIE DE SA SARDIGNA, sàbadu 27 de abrile 2019, a sas ses de sero (h18,00) in su tzentru sotziale de Tinnura, s'at a fàghere un'ispetàculu interativu in limba sarda, cun contos e giogos, pro ischire carchi cosa in prus de sa Sardigna nostra. At a èssere ghiadu dae s'animadore espertu Antonio Dettori, chi traballat fintzas cun sas iscolas. Su laboratòriu faghet parte de sas atividades culturales organizadas dae s'Ufìtziu Limba Sarda cun su dinari de sa Lege 482/1999 (annualidades 2014-2015-2016). 

Totu sos pitzinnos sunt invitados a partetzipare!

 

 

Nadale in festa in Tinnura

S'Amministratzione Comunale organizat sa manifestatzione "Nadale in festa in Tinnura" chenàbura 14 de nadale 2018 comintzende dae sas tres e mesa (h 15,30). S'at a fàghere s'isfilada de sos sonadores de zampogna (Zampognari di Sardegna) e a pustis, in sa Pratza de su Sole, tantas atividades de animatzione. Si faghet tempus malu sa manifestatzione s'at a fàghere in su tzentru polivalente.

 

 

Gita sotziale a Ollolai

S'Amministratzione Comunale de Tinnura proponet una gita sotziale a Ollolai, in ocasione de "Autunno in Barbagia", pro su 25.11.2018. Podent partetzipare totu sos residentes e fintzas sos chi non sunt residentes in Tinnura, finas a cantu b'at disponibilidade de postos. S'at a tènnere contu de s'òrdine de arrivu de sas domandas a su protocollo. Su mòdulu de domanda de partetzipatzione est disponìbile in s'ufìtziu protocollo de su  Comune. Sas domandas si devent presentare intro de sa una (h 13,00) de su 14.11.2018.

"Caccia al tesoro" in biblioteca

Sa TACS snc, in collaboratzione cun sas Amministratziones Comunales de Tinnura e de Sune, organizat una "CACCIA AL TESORO IN BIBLIOTECA" chi s'at a fàghere mèrcuris 31 de santugaine a sas bator (h 16,00) in sa biblioteca comunale de Tinnura. Sas iscritziones si faghent dae sas tres a sas bator.

A ùrtimu b'at a èssere sa merenda pro totus.

"Sa mesa 'e sos moltos"

Sa Domo Museu "Tiu Virgìliu", paris cun sas Bibliotecas de Sune e de Tinnura, cun s'intentu de fàghere connòschere e ammentare sas usàntzias antigas de sa Pianalza, invitant a sa manifestatzione "SA MESA 'E SOS MOLTOS"  chi s'at a fàghere lunis 2 de santandria 2015 a sas ses de sero (h 18,00) in sa Domo Museu "Tiu Virgìliu" in Sune. B'at a èssere finas unu cumbidu "Pro sas ànimas". Chie cheret podet ammentare custas traditziones chi at connotu in sa vida sua. 

Servìtziu de trasportu e acumpangiamentu antzianos e malàidos

Su Comune de Tinnura cheret ativare su servìtziu de trasportu e acumpangiamentu de antzianos (dae sos 65 annos in subra) e malàidos residentes in Tinnura chi apant netzessidade de andare a ispidales, ambulatòrios, istruturas riabilitativas, tzentros de diàlisi. Su mòdulu pro fàghere sa domanda si podet iscarrigare dae su situ istitutzionale de su Comune (www.comune.tinnura.or.it). Sa domanda cheret presentada intro de mesudie (h 12,00) de su 16/10/2015 a s'ufìtziu protocollo. Su responsàbile de su protzedimentu est sa dr.ssa Claudia Bosu - Servìtzios Sotziales. Pro informatziones: tel.0785 34839 - email: servsociali@comune.tinnura.or.it . 

Cursu pro imparare a nadare pro sos pitzinnos

Su Comune de Tinnura informat chi s'at a fàghere unu cursu pro imparare a nadare a sos pitzinnos (dae sos 4 a sos 14 annos) in Bosa in su "Villaggio Abbamala". Su cursu s'at a fàghere dae sas 9 a mesudie, tres bortas sa chida. Ant a èssere in totu 12 letziones. Si pagat 128 èuros in cc postale. Sas domandas cherent presentadas in Comune intro de su 23.07.2015 a sa una. 

Prima editzione de su Prèmiu "Adotta un fiore 2015"

Su Comune de Tinnura organizat sa prima editzione de su prèmiu "Adotta un fiore 2015" pro imbellire sa bidda e pro incoragiare sos istudiantes a fàghere sa bidda issoro prus bella e ospitale. A su cuncursu bi podent partetzipare sos istudiantes residentes in Tinnura chi in s'annu iscolàsticu 2014/2015 apant frecuentadu una cale si siat iscola e chi tèngiant dae sos 14 a sos 25 annos. Su cuncursu si faghet dae sa prima die de austu a su 15 de cabudanni. Sas domandas pro partetzipare iscadint su 27 de trìulas 2015 a mesudie. Pro sos istudiantes minorennes las depent presentare sos genitores. Si podent imbellire sas domos a parte de fora, sas terratzas, sas aiuolas, o àteros logos pùblicos. Sunt previstos prèmios pro totu sos partetzipantes. Su bandu e totu sas informatziones si podent domandare in su Comune de Tinnura o iscarrigare dae su situ istitutzionale: www.comune. tinnura.or.it. 

Iscanu - Tinnura - Tresnuraghes - Teatrinos de Nadale in limba sarda in sas iscolas de s'infàntzia

Ischimus chi su prus de sos pitzinnos, a dies de oe, sunt pesados in italianu ca oramai s'est pèrdida sa "trasmissione intergeneratzionale" de sa limba sarda, e duncas est pretzisu de rimediare ca si nono dae inoghe a pagos annos sa limba sarda nch'est ispèrdida! Sa mègius cosa diat èssere de torrare a faeddare in sardu a sos pitzinnos in domo, in iscola e in totue, a manera chi l'imparent e la faeddent gasi comente faghent cun  s'italianu, s'inglesu e totu sas àteras limbas chi si cherent. In prus b'at de nàrrere chi sa chirca iscientìfica a livellu internatzionale, in particulare sos istùdios chi est faghende Antonella Sorace, professoressa de Linguìstica Acuisitzionale in s’Universidade de Edimburgo, narant chi sos pitzinnos chi connoschent prus de una limba sunt prus abbistos, imparant mègius sas àteras limbas e andant bene in iscola, a s’imbesse de su chi pensat calicunu! E custu lu naraiat finas Maria Teresa Pinna Catte, annos a como, in un’òpera de importu mannu chi s’intìtulat “Educazione Bilingue in Sardegna”. Pro tantu s'Ufìtziu de sa Limba Sarda, cun s'apògiu de sos Comunes e de sas iscolas de s'infàntzia, at fatu una sèrie de laboratòrios de limba in sas iscolas de s'infàntzia de Iscanu, Tinnura e Tresnuraghes, traballende cun unos chentu pitzinnos in totu. Sos laboratòrios sunt finidos cun su teatrinu de Nadale "Cando est nàschidu Gesùs" chi sos pitzinnos sunt presentende pròpiu in custas dies in sas iscolas.

 

Cursu de "ginnastica dolce e training autògeno"

S'Amministratzione comunale de Tinnura cheret ativare unu cursu de "ginnastica dolce e training autogeno". Si bi podent iscrìere sos residentes e sos chi non sunt residentes in Tinnura chi apant cumpridu sos 50 annos. Si pagat 10 € a su mese (residentes) e 15 € a su mese (non residentes). Sas domandas iscadint su 10/10/2014. Su cursu s'at a fàghere si b'at a àere nessi 20 iscritos. 

Cursu pro imparare a nadare e Iscola de murales

Su Comune de Tinnura faghet a ischire a chie est interessadu chi s'at a fàghere unu cursu pro imparare a nadare a sos pitzinnos dae sos bator a sos batòrdighi annos de edade. S'at a fàghere in su villàgiu "Abbamala" in Bosa. Sunt previstas 18 letziones. Sas domandas cherent presentadas a su Comune de Tinnura intro de su 13/05/2014. 

Faghet a ischire fintzas chi organizat unu "Cantiere scuola Murales" pro 15 persones, dae sos 16 annos in susu, residentes in Tinnura. Si b'at postos disponìbiles s'ant a ammìtere fintzas sos chi non sunt residentes. Su cursu s'at a fàghere dae su 21/07/2014 a su 02/08/2014 dae sas noe a mesudie (h 09,00-12,00) e a su sero dae sas tres a sas ses (h 15,00-18,00). Sas domandas de iscritzione iscadint su 30/05/2014. 

Pro cale si siat informatzione preguntare in Comune. 

Beneditzione de sa crèsia de campagna intitulada a Santa Rita

Su Sìndigu e s'Amministratzione Comunale de Tinnura invitant cun praghere mannu a sa tzerimònia de beneditzione de sa crèsia de campagna intitulada a Santa Rita, chi s'at a fàghere sàbadu 10 de maju 2014 a sas ses de sero (h 18,00) in Tinnura (localidade Corrau). Sa Missa l'at a fàghere su Pìscamu Muss. Mauro Maria Morfino.

Seminàriu informativu

Mèrcuris 9 de abrile 2014 a sas ses de sero (h 18,00) in su teatru comunale de Tinnura s'at a fàghere unu seminàriu informativu subra sa cura e su benèssere de sa pessone: oportunidades ocupatzionales in Pianalza pro Operadores Sòtziu-Sanitàrios (OSS e SUPER OSS). Su seminàriu est organizadu dae "ARAFORM", agentzia pro sas chircas e atividades in sa formatzione. Ant a partetzipare: Maria Grazia Carta (Sìndigu de Tinnura); Massimo Castangia (Diretore Generale ARAFORM); Alessandro Murana (espertu de polìticas de su traballu); Angelo Demetrio Cherchi (Presidente de s'Unione de sos Comunes de Pianalza e Montiferru otzidentale).

 
 

Campionadu de fùbalu ('calcio')

Sas Amministratziones comunales de Frussio, Sune e Tinnura, cun sa collaboratzione de sas sotziedades isportivas Nikeyon Suni e sa Flussiese, invitant a partetzipare a su campionadu de càlcio riservadu a pitzinnos (òmines e fèminas) dae sos 5 a sos 16 annos. Sos mòdulos e sas informatziones si podent preguntare in onni comune de residèntzia. Sas iscritziones iscadint su 16/09/2013 a mesudie (h 12,00).

Cursu de ballu latinu-americanu

S'Amministratzione comunale de Tinnura cheret ativare unu cursu de ballu latinu-americanu (cun unu mastru F.I.D.S.) dae su 03/10/2013 a su 31/05/2014. S'at a fàghere sa giòbia dae sas 4 e mesa a sas 6 de sero (h 16,30-18,00) in su Tzentru de Agregatzione Sotziale de Tinnura.

A su cursu si bi podent iscrìere sos residentes in Tinnura e finas sos chi non sunt residentes.

Sos mòdulos pro sas adesiones si podent ritirare in Comune onni die dae sas ùndighi a sa una e mesa. Sas domandas iscadint su 23 de cabudanni 2013 a sas duas (23/09/2013 h 14,00).

Pro cale si siat informatzione si podet preguntare in su Comune de Tinnura.     

II Trofeu de s'Amigàntzia

S'Amministratzione comunale de Tinnura paris cun sa sotziedade TACS organizant su Segundu Trofeu de s'Amigàntzia chi s'at a fàghere su 25 de trìulas de su 2013 a sas bator de sero (h 16,00) in su campu de "calcetto" de Tinnura (tzentru polivalente). Partètzipant sas iscuadras: Flussiese - Pozzomaggiore - Nikeyon - Polisportiva Montiferru. Categorias: "Esordienti" - "Pulcini" - "Piccoli amici".

"E... state con noi"

S'Amministratzione comunale de Tinnura organizat "E... state con noi", bator seros de ballos cun sa partetzipatzione de su maistru Otello Manconi. S'ant a fàghere chenàbura 19 e sàbadu 27 de trìulas; domìniga 11 e sàbadu 17 de austu, semper a sas deghe de note (h 22,00) in sa pratza de Su Sole.Su 22 e su 29 (h 16,15) in sa biblioteca comunale s'at a fàghere " I passeggioni", unu laboratòriu manuale pro fàghere gatos e canes cun roba riciclada.

In prus su 25 e su 26 de trìulas si festat a Sant'Anna: su 25 a sas deghe de note (h 22,00) b'at a àere ballos cubanos, latinu-americanos e sardos cun su maistru Michel Miranda e s'organetista Fabiana Còntini. Su 26 (sa die de sa festa) a sas deghe e mesa (h 10,30) prutissione e missa solenne cantada dae su sopranu Angela Farina. A sas chimbe de sero (h 17,00) in su tzentru de agregatzione sotziale s'ant a fàghere giogos traditzionales, in collaboratzione cun sa Cooperativa Sotziale Sirone de Sune.

A sas deghe de note (h 22,00) cabaret e mùsica cun " Pino e gli anticorpi".

Cursa de solidariedade in Pianalza

"Sardegna Solidale" de Bosa, paris cun sos assòtzios de volontariadu de Pianalza (Sune, Tinnura e Frussio) organizat pro domìniga 23 de Làmpadas 2013 sa II editzione de sa "Cursa de sa solidariedade",  chi tenet su fine de valorizare su volontariadu.

Si movet a sas 9,00 dae Pratza Bua in Sune, si faghet pasu in Tinnura e s'imbatet a Frussio in ue, in localidade "Sa Roda", b'at a èssere sa premiatzione a mesudie e mesu  (h 12,30) e a sa una (h 13,00) s'at a mandigare totu paris. 

Ordinàntzia contra a sos fogos 2013

Su Sìndigu òrdinat a sos propietàrios de terrinos e ortos, a sos responsàbiles de cantieris ediles e istradales, de istruturas turìsticas, artigianales e cummertziales de pulire sos terrinos intro de su 15 de làmpadas de su 2013 a ispesas issoro, pro non creare dannu a niunu.

Si non si osservat custu òrdine, su Comune at a incarrigare sos Barratzellos de fàghere sa pulitzia de sos terrinos, ma sos trasgressores ant a pagare una multa chi andat dae 50 a 500 èuros. Pro nd'ischire de prus si podet preguntare in su Comune de Tinnura.

Chie bidet carchi fogu podet telefonare a sos nùmeros 1515 o 115.

Esibitzione de ballu

Sàbadu 25 de maju 2013 a sas ses e mesa de sero (h 18,30) in s'anfiteatru de su tzentru de agregatzione sotziale de Tinnura s'at a fàghere sa segunda editzione de su "Saggio di danza" de sos pitzinnos e pitzinnas de s'iscola de ballu latinu- americanu de     Tinnura, Iscanu e Boàtiri (Baràtili San Pietro), preparados dae su mastru Otello Manconi.

Progetu "Intrecci"

Sos Comunes de Bosa, Sune, Tinnura e Frussio paris cun sa Fondazione con il Sud ant aparitzadu su progetu “Intrecci”, indiritzadu a totu sos tzitadinos de su territòriu.

Su progetu est articuladu in 3 setores:

1.      Isportellu informativu: pensadu pro chie cheret connòschere mègius sos servìtzios dados dae sos Comunes, màssimu pro sos disàbiles e sas famìllias issoro. S’isportellu informat subra de sas leges de assistèntzia e sos servìtzios ativados (CSM, consultòriu, agiudu a chie tenet maladias graves o problemas de dipendèntzias) e agiudat a cumpilare sas pràticas ASL.

2.      Cursu de vela: pro sos giòvanos, pro lis imparare a amministrare una barca. Su cursu est de 50 oras, si faghet in sa marina de Bosa e pro lu fàghere tocat a s'iscrìere.

3.      Laboratòrios traditzionales: pro chie totu est interessadu a imparare a coghinare sos màndigos antigos, a cosire, a laurare ('lavorare il Filet') e a fàghere cestinos de isciareu ('asfodelo'). Tocat a s'iscrìere.

Pro tènnere totu custos servìtzios NON SI PAGAT NUDDA.

Chie si cheret informare podet telefonare a a su nùmeru 329-4144586 (sig.ra Piera Lotti) o mandare una e-mail a s’indiritzu progetto.intrecci@gmail.com.

Sa psicòloga chi coordinat su progetu est sa d.ssa Manuela Schintu.

ORÀRIOS DE S'ISPORTELLU INFORMATIVU:

LOGU	DIE	ORÀRIU
Bosa (Sasol Point)	Martis Chenàbura	10,00-12,00
Sune (domo comunale)	Mèrcuris	10,00-12,00
Tinnura (domo comunale)	Lunis	15,30-17,30
Frussio (domo comunale)	Gioja	10,00-12,00

Contributu libros de iscola

Su Comune de Tinnura faghet a ischire chi at a dare unu contributu pro sos libros de iscola (pro sas iscolas mèdias e superiores). Sos mòdulos si podent ritirare in Comune onni die dae sas 11,00 a sa una (h 13,00) e cherent presentados, cumpilados, intro de su 16 de santandria 2012. B'est su contributu fìntzas pro sos libros de segunda manu (a su 50%).

Cursu de ballu Latinu-Americanu

S'Amministratzione Comunale de Tinnura cheret ativare, dae su 4 de santugaine 2012 a su mese de maju 2013, unu cursu de ballu "Latinu-Americanu"(ballos de grupu) cun unu mastru "F.I.D.S.", pro pitzinnos e mannos. Sas letziones s'ant a fàghere sa gioja sero dae sas 16,30 a sas 18,00 in su Tzentru de Agregatzione Sotziale de Tinnura. Si podent iscrìere (ancora) sos residentes e fintzas sos chi non sunt residentes in Tinnura.

Pro informatziones preguntare a sos ufìtzios comunales de Tinnura.

Iscola de calcio pro sos pitzinnos

Sas Amministratziones comunales de Frussio, Magumadas, Sune e Tinnura cherent fàghere un'iscola de calcio pro sos pitzinnos (òmines e fèminas) chi tenent dae sos 5 a sos 13 annos. Su cursu costat 10 èuros su mese e 10 èuros de iscritzione.

Sos mòdulos si podent agatare in ogni Comune de residèntzia e sas iscritziones cherent fatas intro de mesudie de su 25/09/2012.

1° Trofeo de s'amigàntzia

S'Amministratzione comunale de Tinnura organizat su 1° Trofeo de s'amigàntzia, triangolare calcio A5, Tinnura - Sune - Frussio. Categoria: Senior e Junior.

S'at a fàghere gioja 30 de austu cumintzende a sas 7 de sero in su campu de "calcetto" de Tinnura, tzentru polivalente in localidade "Sa Tanchita".

Gita a Sa Maddalena e Caprera

S'Amministratzione Comunale de Tinnura organizat, pro s'1 e su 2 de cabudanni, una gita a Sa Maddalena e Caprera. Sas adesiones si devent dare a su Comune intro de su  21 de austu.  Sos mòdulos e su programma si podent agatare in su Comune. Podent partetzipare sos residentes e, si b'est sa disponibilidade de sos postos, fintzas sos chi non sunt residentes in Tinnura.

Fatoria Didàtica Istentales

S'Amministratzione Comunale de Tinnura aderit a s'initziativa de su Comune de Sune de partetzipare a sa "Fatoria Didàtica Istentales" de Nùgoro (pro tres dies, pro sos giòvanos nàschidos in su 1995/1996/1997). Sas adesiones cherent dadas a su Comune de Tinnura intro de mesudie de su 3 de austu 2012. 

Est torra operativu in Tinnura s'Ufìtziu Limba Sarda

Est torra operativu in Tinnura s'Ufìtziu de sa Limba Sarda.

Ocannu su servìtziu est a livellu sovra-comunale (in rete cun totu sos Comunes de s'Unione de Comunes de Planàrgia e Montiferru otzidentale) e Iscanu est su Comune capofila.

Pro cale si siat informatzione s'Ufìtziu est abertu ogni gioja cun oràriu 10,00-14,00.