Mùsica e paràulas: sos cursos noos de s'ULS de Pianalza e Montiferru otzidentale

S'Ufìtziu Limba Sarda est aprontende sos cursos de formatzione cullegados a su progetu "Poetende, cantende e... chistionende" (lege 482/1999, annualidade 2020), chi s'ant a fàghere in Bosa e in Iscanu.

Ocannu at a èssere sa mùsica chi at a fàghere de ghia a chie totu cheret imparare a faeddare e a iscrìere in sardu: cun s'agiudu de dotzentes espertos amus a connòschere mègius paràulas, testos e mùsicas de su panorama musicale sardu, e amus a cumprèndere comente, cantende, est prus fàtzile a imparare sa limba sarda e sas règulas suas finas pro chie no est abituadu a la praticare.

Sos cursos sunt 2 de 30 oras ognunu, destinados a sos dipendentes comunales e abertos a chie totu est interessadu a s'argumentu. Pro partetzipare non si pagat nudda.

Chie est interessadu devet cumpilare su mòdulu de adesione e l'imbiare a s'indiritzu e-mail uls.planargiamontiferru@gmail.com intro de domìniga 11 de abrile 2021.

Pro ativare ogni cursu bi cherent nessi 10 adesiones e nessi una tertza parte devet èssere formada dae dipendentes comunales.

Si sas adesiones non sunt bastantes pro ativare unu cursu, chie s'est iscritu (si nde tenet praghere) podet leare parte a s'àteru.

(GF.P.)

Laore assumet 109 diplomados e laureados valutende sa connoschèntzia de sa limba sarda

In sa seletzione noa fata dae s'agentzia regionale Laore, chi si òcupat de programmas de isvilupu rurale, vàlutant finas sa connoschèntzia de sa limba sarda.

Paret iscontadu ma no est gasi, e a nois nos paret unu passu importante chi pro assùmere agrònomos e peridos agràrios apant postu finas custa valutatzione, bidu chi custa categoria de traballadores intrat in relatzione cun gente chi su prus faeddat in sardu e bidu chi pro fàghere custu traballu tocat a connòschere bene sos nùmenes in sardu de prantas e de erbas.

Su bandu est pro assùmere 109 intre diplomados e laureados (85 funtzionàrios tècnicos agrònomos, 14 peridos agràrios e 10 tècnicos de laboratòriu). Pro su postu de agrònomu bi cheret sa làurea in agrària o àteras làureas chi permitant s'iscritzione a s'Albu de sos dotores agrònomos e forestales. Pro sos àteros postos bi cheret su diploma de peridu agràriu o agrotècnicu, de tècnicu de laboratòriu o de tècnicu industriale. Podet partetzipare chie tenet dae sos 18 a sos 65 annos.

Sas domandas cherent mandadas intro de martis 6 de abrile cun posta eletrònica tzertificada o cun racumandada A/R.

Pro visionare sos documentos si podet intrare in su situ de Sardegna agricoltura.

(GF.P.)

Bosa - Dantedì 2021

Cras 25 de martzu 2021 est su "Dantedì", die natzionale dedicada a Dante Alighieri istituida dae su Cussìgiu de sos ministros in su 2020.

Ocannu est su de 700 annos dae sa morte de Dante e Bosa at detzisu de ammentare su Poeta cun una trasmissione de Radio Planargia in ue sos istudiantes de s'istitutu superiore "G.A. Pischedda" leghent su I cantu de sa Divina Cummèdia.

In sa trasmissione intervenent sa professora Paola Pintus, s'avocada Maria Giovanna Campus, s'archeòlogu medievalista professore Franco G.R. Campus, su regista de teatru dotore Alessandro Arrabito.

Sa trasmissione si podet ascurtare in streaming culleghende·si a www.radioplanargia.net a sas 10,00.

(GF.P.)