Cando si pesat su bentu. Novas malas pro sa limba e tempos malos pro sos operadores

Su bentu si fiat pesende a lenu a lenu, e forsis nois no lu cherìamus bìdere.

Como sunt comintzende a si tremulare giannas e ventanas, e su perìgulu est chi siat una temporada chi nde betat a terra sa domo dae sos fundamentos.

In custos meses l'amus iscritu paritzas bortas: Ma pro ite est chi Pìgliaru non narat nudda in contu de limba sarda?

Cussu silèntziu nos poniat pensamentu, ca no lu cumprendìamus (o no lu cherìamus cumprèndere).

Bene. Gianteris, 30 de cabudanni, amus tentu cunfirma chi est beru chi su riu mudu est tragiadore: sa Giunta regionale at propostu de mutzare in curtzu totu sas boghes de ispesa cullegadas a sa limba sarda: a fora sos finantziamentos a isportellos, iscola e mass-mèdia, ma finas a s'Atlante Linguìsticu, a sa Cunferèntzia pro sa Limba Sarda, a sas òperas didàticas, a sas mapas linguìsticas, a su Curretore Ortogràficu e a Bilinguismu Creschet, comente si leghet in sa proposta de assestamentu de bilàntziu e in su cummentu de Giuseppe Coròngiu.

Su prus chi nos ispantat est chi s'assessora Firinu, chi paritzas bortas at naradu chi tenet in contu mannu sos isportellistas, no apat mòvidu unu pòddighe contra a sa proposta de nche catzare dae su bilàntziu finas sos 500.000 èuros destinados a sos Ufìtzios de sa Limba Sarda.

A sa pregunta fata dae Christian Solinas (Capogrupu de su Psd'Az in Cussìgiu regionale) s'assessora Firinu b'at rispostu chi sas mutzaduras sunt "riduzioni di voci di bilancio che in ogni caso nel 2014 non potevano avere conseguenza in termini di erogazione di spesa" (leghe su comunicadu). Ma a nde bogare su dinari dae unu capìtulu (su de sa limba) pro lu pònnere in aterue mustrat in craru ite contu nde faghet su Guvernu regionale de custa chistione. Sa limba sarda no est una prioridade. Punto.

Làstima chi nois ischemas, però, chi sa limba sarda EST una prioridade: ca la bidimus onni die, sa rosigadura in fine-in fine fata dae sa limba italiana; la bidimus onni die sa situatzione de "allarme rosso" in sas biddas nostras, in ue b'at a bortas 3 generatziones de gente chi non faeddat in sardu; lu bidimus onni die chi nemos lis imparat prus su sardu, a sos pitzinnos.

Nois lu bidimus e ischimus chi custos sunt sos annos chi ant a decretare si sa limba sarda bivet o morit. E nos est de iscunfortu su cumprèndere cantu sos polìticos nostros siant tzegos e pagu abbistos, e cantu pagu cabu tèngiant.

At a èssere tempus chi totu sos chi istimant sa limba sarda lassent sas comodidades issoro e si movant totu paris pro la difèndere.

Pro cumprèndere mègius sa situatzione de sa limba sarda si podet ascurtare s'intervista a Antonello Garau fata custu mangianu dae Radiolina.