Resumu de s'atopu cun s'assessore Firino de su 25 de martzu 2015

Fotografia de http://www.sassarinotizie.com

Mèrcuris 25 de martzu 2015 si sunt riunidos in Casteddu, cunvocados dae s'assessora a sa Cultura Claudia Firino, sos operadores de limba sarda de totu sa Sardigna.

Custa riunione benit a pustis de un'àtera fata su 17 de santugaine de su 2014, in ue s'assessora aiat leadu impignos pro sa limba sarda faeddende de nche la fàghere intrare a iscola e de amparare sos operadores creende unu registru ad hoc.

Mèrcuris sa d.ssa Firino at dadu contos de su traballu fatu finas a como, faeddende in antis de totu de s'aprovatzione de sas normas de atuatzione de s'istatutu ispetziale. De custa manera sas cumpetèntzias in contu de limba ant a passare a sa Regione, chi s'at a pòdere mòvere in autonomia siat in sa programmatzione siat in s'ispesa, bidu chi dae ocannu partit sa programmatzione integrada (dinari regionale, istatale e comunitàriu gestidu a manera ùnica).

S'assessora at torradu a faeddare de su registru de sos operadores, istrumentu importante meda pro tutelare sas professionalidades chi sunt operende in custu setore. Su registru at a previdire totu sas figuras, siat sos chi tenent esperièntzia in iscola, siat sos chi ant traballadu ebbia in sos isportellos.

In contu de dinari, su bilàntziu 2015 ponet 500.000 èuros pro integratzione a sos isportellos e 900.000 pro s'inserimentu de su sardu in iscola (chi ant a èssere integrados cun dinari comunitàriu). Sa nova in se est bona meda, ca non fiat iscontadu a tènnere dinari in bilàntziu bidos sos tempos metzanos, però "la domanda nasce spontanea": comente tocat a l'ispèndere, custu dinari, si sos progetos devent partire in s'annu iscolàsticu 2015/2016 e non b'at galu lìnias craras de traballu, sos mastros non sunt formados e non s'agatat libros de testu? Custas sunt dificultades mannas e cherent risòlvidas cantu primu.

Duncas, in sìntesi, dae s'atopu at essidu novas bonas ma finas crititzidades. Su tempus est colende, e sas crititzidades diant chèrrere risòlvidas in presse si si cheret imbàtere a su cumentzu de s'annu de iscola imbeniente prontos pro nche fàghere torrare a intrare, A BERU, sa limba nostra in iscola.