"Cheria imparare su sardu e so bènnidu a Sardigna pensende de l'intèndere in onni carrera, in onni butega, in onni domo. No est istadu gasi e a s'incomintzu bi so abarradu male". Lu narat Alexis Barranger, unu frantzesu de 27 annos amantiosu de sas limbas chi in su 2015 at detzisu de si tramudare a Sardigna pro imparare sa limba sarda.
Sigomente intendiat a totus faeddende in italianu, at comintzadu a iscrìere in Facebook "e a bellu a bellu apo connotu àtera gente chi la pensaiat che a mie e su sardu l'apo pòdidu imparare su matessi". Dae tando, paris cun àteros linguistas e apassionados, Alexis est gherrende pro sarvare custa limba. At collaboradu a sa prima Cunferèntzia aberta de sa limba sarda, chi at bogadu a campu tantas crititzidades e in primis su fatu chi non b'at prus trasmissione intergeneratzionale. "Su prus de sa gente - narat Alexis - non faeddat prus in sardu pensende de si liberare de una cadena (màssimu sos chi istùdiant e cherent megiorare sa cunditzione sotziale issoro). Pensant chi a faeddare in sardu siat a èssere ignorantes, ma non b'at idea prus isballiada de custa".
Analizende sa situatzione linguìstica de s'Ìsula, Alexis agiunghet: "Apo notadu chi su sardu mancat in sas iscolas, in sas universidades, in sos ufìtzios pùblicos e chi sos chi traballant pro sa limba sarda sunt totus precàrios. S'amparu de sas istitutziones est formale ebbia, ca in sa pràtica non faghent nudda pro mantènnere custa limba bia".
Nois auguramus chi sa cussèntzia linguìstica chi tenet custu giòvanu chi benit dae tesu intret in sos coros de tantos (giòvanos e betzos) chi sunt nàschidos inoghe.
S'intervista cumpleta a Alexis l'agatades in s'artìculu de Vistanet.it.
Nessun commento:
Posta un commento
Nota. Solo i membri di questo blog possono postare un commento.