Dae cras 14 de nadale 2018 at a èssere disponìbile in sas librerias su libru "Òja, o Ma'", bortadura in sardu de "Mia madre e altre catastrofi" de Francesco Abate, tragi-cummèdia chi faeddat de su raportu de s'iscritore cun mama sua.
Su libru est ambientadu in su coro de Casteddu e sa protagonista est sa mama de s'autore (viuda, mastra de iscola, religiosa e marxista). Sa limba sarda duncas est perfeta pro dare a su testu sa càrriga dinàmica e brillante chi tenent sos contos nàschidos in sa vida reale.
Sa bortadura in sardu l'at fata Cristian Urru, operadore e mastru de limba sarda, pro sa domo de imprenta Ilisso. "Francesco Abate at iscritu sos libros suos pensende·los in limba casteddaja - narat Urru - e deo non cheria chi sa bortadura mia esseret una traspositzione dae s'italianu. Pro custu apo lèghidu testos meda in sardu e mi so acurtziadu a su mundu de sa gente chi faeddat in sardu a fitianu, a sos chi sardu lu faeddant de a beru".
In custu libru s'ironia nd'essit a sa sola. "Non b'at cosa chi non si potzat nàrrere in sardu - sighit Urru - e non b'at perunu registru comunicativu chi non si potzat nàrrere in custa limba, partende dae su còmicu e imbatende a su tràgicu, e lu bidimus bene in sa traditzione literària nostra".
Custu fine de chida autore e tradutore ant a èssere disponìbiles in Casteddu pro firmare sas còpias de su libru: sàbadu 15 in sa libreria Feltrinelli de carrera Paoli e domìniga 16 in sa libreria Miele Amaro de carrera Manno, semper a sas 11 de mangianu.
Nessun commento:
Posta un commento
Nota. Solo i membri di questo blog possono postare un commento.