Iscanu - Via sos nùmenes de sos Savòias dae sas carreras

Sa Giunta de Iscanu at deliberadu de cambiare sos nùmenes de sas carreras dedicadas a sos reales de Savòia, torrende·las a sos topònimos originàrios (cando bi sunt) o dende·lis su nùmene de iscanesos chi si sunt distintos pro cultura e pro àere fatu bene a sa bidda.

Ant a cambiare sos nùmenes chi sighint:

- Su cursu Vittorio Emanuele III at a retzire su nùmene de Padre Salvatore Pala chi est istadu una de sas personalidades prus illustres de su 1600 sardu. Primu professore de matemàtica in s'Universidade de Casteddu e fundadore in su 1629 de sa Cunfraria iscanesa de su Rosàriu, pro su prestìgiu chi teniat at retzidu in donu dae s'Archipìscamu de Casteddu una vèrtebra de Sant'Antiogu chi at fatu crèschere in Iscanu sa devotzione pro su santu finas a fraigare sa cresiedda in localidade Cabudabbas.

- Sa carrera Carlo Alberto at a retzire su nùmene de Antonio Giuseppe Trogu, bìvidu in su 1700 e vicàriu priorale de sa parròchia de Iscanu, chi at fatu nàschere a ispesas suas su Monte Granàticu pro agiudare a sos pòberos de sa bidda.

- Largo Vittorio Emanuele II s'at a cramare "pratza Francesco Porcu" pro ammentare a su padre carmelitanu bìvidu in su 1700 chi, organista de fama, at lassadu duos volùmenes de mùsica sacra (un'antifonàriu e unu "Quaderno de sequencias y varias intonaciones nuevemente escritas por Francisco Porru de la Villa de Escano. En el Combiento de Oristan en el ano 1762 vol.  in fol").

- Pratza Regina Elena at a torrare a su nùmene originàriu de "carrela de Funtana".

- Pratza Umberto at a torrare a su nùmene originàriu de "carrela de Putu".

Est unu passu importante pro sa bidda, custu de ammentare sa gente chi l'at fatu bene imbetzes de onorare a sos Savòias chi ant operadu semper contra a sos interessos de sos Sardos.

Professor Francesco Casula in su libru "Carlo Felice e i tiranni sabaudi" ispiegat bene totu sas infàmias fatas dae custos regnantes in Sardigna, movende dae sa distrutzione de sas biddas de Logudoro chi si fiant rebelladas a sos feudatàrios finas a imbàtere a su segrestu de sos buscos e a sa fura de sas terras pùblicas fata cun s'editu de sas "Chiudendas". In custu link agatades un'elencu in curtzu de sas malefatas de custos regnantes.

Res de paga inteligèntzia, de peruna cultura, presumidos, arrogantes e mandrones.

Non pagat sa pena de los ammentare.