Dae su 2017 in Tresnuraghes b’est sa possibilidade
de visitare su museu “Casa Deriu” chi
rapresentat “un unicum” in sa realidade
museale sarda. Visitende su museu est comente a fàghere unu percursu in su
tempus in ue, partende dae s’istòria de sa famìllia burghesa sarda de sos sèculos
XVIII-XIX, si podent connòschere cosas meda pro more de sas òperas custoidas in
sa domo. In su pianu terrinu sunt istados ricostruidos sos ambientes cun sos mòbiles istòricos
e sos ogetos de sa vida de onni die de una famìllia burghesa de cussos tempos.
In su pianu de subra si podet visitare su percursu istòricu-espositivu de sa
emeroteca istòrica, cun una colletzione manna de rivistas e giornales de s’Otighentos. Dae su
10 de trìulas a su 31 de nadale 2020 in su museu s’at a pòdere visitare sa
mustra “L’ALTrA MODA. Vestire in Sardegna fra 1810 e 1930”. Est patrotzinada
dae sa Regione Sardigna e curada dae Pier Tonio Pinna e Antonella Unali cun sa
collaboratzione de istudiosos de istòria e de istòria de sa moda, comente Franca
Rosa Contu (responsàbile de su setore de sos museos de s’ISRE de Nùoro, chi at
dadu sa consulèntzia iscientìfica pro su chi pertocat sas bestimentas
traditzionales), Federico Ledda (pro su chi atenet s’istòria de Bosa) e
Antonella Murtas (istòrica de sa moda e istilista – costumista, chi s’est
ocupada de su restàuru de sos bestires e de s’anàlisi istòrica, in collaboratzione
cun sos curadores de sa mustra e cun sos àteros membros de su comitadu
iscientìficu). Si podent ammirare prus de trinta bestires originales de famìllias
nòbiles, burghesas, de Bosa, Cùglieri, Tresnuraghes e de àteras biddas sardas.
Mustrat sa moda “d’oltremare” in Sardigna dae sos primos annos de su 1800 a sos
primos vinti de su 1900, cando sos bestires cumintzaiant a èssere sìmbulu de
modernidade chi dae foras fiat arribende a Sardigna pro more de sa classe polìtica
dominante e difusa dae sas rivistas illustradas. Sa mustra s’est pòdida
realizare gràtzias a sa disponibilidade de sas famìllias chi ant postu a
disponimentu sos bestires chi essint pro sa prima borta pro pòdere èssere
ammirados dae totus.
Sa mustra si podet
visitare dae su 10 de trìulas a su 31 de nadale 2020 onni die, foras de su lunis, dae sas 10,00 a sas 12,30 e
dae sas 17,00 a sas 19,30.
Si podet prenotare sa vìsita
telefonende a su nùmeru: 0785-35509.
Pro nd’ischire de prus: www.museotresnuraghes.it
(M.G.S.)
Nessun commento:
Posta un commento
Nota. Solo i membri di questo blog possono postare un commento.