26/08/20

Maneras de saludare: "Oh!", su saludu prus curtzu de su mundu

A diferèntzia de sa limba italiana, chi comente fòrmulas de saludu impreat pro su prus duas formas ebbia ("Buongiorno/buonasera" pro su saludu formale e "Ciao" pro su saludu informale), sa limba sarda tenet unu panorama variadu meda de fòrmulas chi s'impreant a tenore de sa situatzione chi unu est bivende e de su gradu de cunfidèntzia chi tenet cun sa persone chi saludat.

Sas fòrmulas prus connotas e prus impreadas sunt "Salude" (cando unu arribat) e "Adiosu" (cando si nch'andat). A custa ùrtima fòrmula unu tempus si rispondiat cun "Bae/andet in bonora!" ('Vai e abbi fortuna!').

Unu tempus (ma si faghet finas oe) sa gente pro saludare poniat in evidèntzia sa situatzione chi su chi fiat passende s'agataiat in dae in antis, comente si bidet in sas figuras chi sighint.

 

Su saludu a bortas est "telegràficu" meda, ma sos interlocutores si cumprendent a pare su matessi...

Tocat a nàrrere chi s'esclamatzione "Oh" in sardu tenet una variedade de significados a tenore de su tonu e de sa manera de la pronuntziare. Nde ponimus calicunu, ma capatzu chi bi nd'at àteros puru:

Saludu genèricu: "Oh!" (= 'Ciao, anche tu qui?');

Ispantu: "Maria at tentu pitzinnu" "Oh??" (= 'Ma davvero? Che bella notizia!');

Cuntentesa: "Apo finidu su còmpitu" "Oh!!!" (= 'Finalmente! Era ora!') ;

Disaprovatzione: "Luca at pèrdidu su libru" "Oh!!" (= 'Non ne fa una giusta');

Negatzione: "A bisu meu niat" "Oh..." (= 'Non credo proprio');

Allarme: "Atentzione! Oh!" ('Stai attento!');

Dispraghere: "A Pedru l'ant ricoveradu oe" "Oh..." ('Quanto mi dispiace!').

Sa richesa de sa limba nostra si bidet finas in custas cosas.

(GF.P.)

Nessun commento:

Posta un commento

Nota. Solo i membri di questo blog possono postare un commento.