Su sardu in Rai: isetos e isperas

https://www.freepik.com/

In atòngiu at a mòvere sa programmatzione in sardu de sa Rai, cun paritzos programmas de cultura, informatzione e intratenimentu.

Sunt previstas 100 oras pro sa programmatzione radiofònica e 22 oras pro sa programmatzione televisiva. No est meda, ma est unu passu a in antis e duncas est cosa bona, si est bene fata.

"Est un'obietivu chi amus chircadu dae s'incomintzu de sa Legisladura, pro more de unu cunfrontu fitianu cun su Guvernu e cun s'Azienda. - at naradu su guvernadore Christian Solinas - Sa limba sarda in Rai rapresentat su reconnoschimentu de su valore e de sa dignidade de s'identidade nostra".

B'at chertu 21 annos pro atuare su chi sa lege 482 aiat prevìdidu in su 1999: finas a como totu sos programmas fatos in ràdio e in televisione los aiat finantziados sa Regione cun dinari suo. Como imbetzes su dinari lu ponet Roma.

Su chi isperamus nois est chi sa programmatzione si fatzat pensende a beru a fàghere imbàtere su sardu a categorias chi no lu faeddant prus, comente pitzinnos e giòvanos (màssimu sas fèminas).

Su prus de sas trasmissiones fatas finas a como fiant destinadas a unu target "seguru": gente manna (òmines pro su prus), sardòfonos, istruidos e amantiosos de sa cultura sarda. Sos de s'aforru ('gente del mestiere') insomma.

Ma sos chi nde tenent prus bisòngiu (pitzinnos, giòvanos, fèminas) sunt indiferentes a sas trasmissiones de informatzione e de "saudade", nostalgico rimpianto di un mondo che non tornerà.

Duncas como diant chèrrere pensadas trasmissiones adatas a sos prus giòvanos, dinàmicas, chi lis diant sa curiosidade de las abbaidare non ca sunt in sardu ma ca sunt bellas e bene fatas.

Isperamus, dai.

Leghe sa nova Ansa.

(GF.P.)