"Musas e Terras", laboratòrios musicales pro pitzinnos de iscola

S'assòtziu culturale CAMPOS organizat sa manifestatzione "Musas e Terras 2021", festival internatzionale de mùsica e poesia de Sardigna, chi s'at a fàghere su 13, 20, 21 e 27 de martzu 2021 (in modalidade online pro sas limitatziones anti Covid-19) e s'at a pòdere abbaidare in EJATV (canale 172 de su digitale terrestre), in Facebook, Instagram e in su canale YouTube de s'assòtziu.

Una parte de sas atividades est dedicada a sos pitzinnos de iscola. Si tratat de bator laboratòrios didàticos chi tratant de istrumentos traditzionales (launeddas, chiterra sarda) e de cantu (a chiterra e 'a mutetus'). Sos pitzinnos de iscola ant a pòdere sighire sa direta in su situ de CAMPOS, in su situ de Musas e Terras o in sa pàgina Facebook de CAMPOS. Una parte de sos alunnos s'at a pòdere cullegare cun Zoom pro fàghere preguntas a sos mastros de sos cursos.

Sos laboratòrios s'ant a fàghere su 13, 20, 21 e 27 de martzu 2021 a sas 11 de mangianu e sas iscolas sunt invitadas a partetzipare.

(GF.P.)