Inauguratzione biblioteca Wolf in Nùgoro

Su 15 de nadale de su 2021 in Nùgoro est istada inaugurada sa "Biblioteca Wolf", chi regollet su patrimòniu de libros e documentos de su linguista Heinz Jürgen Wolf (1936-2016), linguista e professore in s'Universidade de Bonn e istudiosu mannu de sa limba sarda.

Sa biblioteca est collocada in sa "Domo de sos Mutilados", est a nàrrere in sos locales de s'Assòtziu Natzionale de sos Mutilados e Invàlidos de Gherra (ANMIG) in carrera Dante Alighieri n° 19 a cara a su litzeu clàssicu "G. Asproni".

Sa Biblioteca Heinz Jürgen Wolf de istùdios linguìsticos e de limba sarda at realizadu su disìgiu de Wolf de lassare in donu a sos Sardos su patrimòniu libràriu suo. Pro voluntade de sa fìgia Mimi e de sa mugere Sìlvia, e pro more de s'impignu de Diegu Corràine amigu mannu suo, sos libros nche sunt istados tramudados dae Bonn a Nùgoro intro de prus de 50 càssias de cartone e sunt a disponimentos de chie totu los cheret consultare. Non faghet però a los dare in prèstidu ca, pro su prus, sunt libros de valore e raros.

(GF.P.)