Iscolas serradas in belle totu sa Pianalza

A pustis de duas dies de vatzinos e de tampones, su sìndigu de Bosa at detzisu de serrare totu sas iscolas finas a su 15 de ghennàrgiu 2022.

Sàbadu 8 e domìniga 9 de ghennàrgiu dae sas 7 de mangianu su personale sanitàriu, cun s'agiudu de sos barratzellos e de sos voluntàrios de sa Croce Rossa, ant sumministradu 1.002 vatzinos e 1.098 tampones antigènicos a sa gente de Bosa e de totu sa Pianalza.

Essende chi in Bosa sos positivos a su Covid sunt 250 e bi nd'at finas in àmbitu iscolàsticu, chi in totue sos contàgios sunt creschende e chi a sas iscolas de Bosa b'acudit istudiantes dae totu sa Pianalza, su sìndigu  at istabilidu de serrare totu sas iscolas finas a su 15 de ghennàrgiu.

Cun una riunione urgente fata a de note, sos sìndigos de Pianalza ant detzìdidu de suspèndere sas letziones in presèntzia finas in Sune e in Tresnuraghes.

Abarrant abertas sas iscolas materna e elementare de Montresta (chi in custas dies no at tentu casos noos de Covid) e sas iscolas de Iscanu.

(GF.P.)