Letzione itinerante pro connòschere a Bosa

Ocannu su cursu de limba sarda aprontadu dae s’Ufìtziu Limba Sarda paris cun s’Universidade de sa Tertza Edade de Bosa previdet modalidades noas pro imparare su sardu, finas gràtzias a sa disponibilidade de sa professora Elisabetta Sanna chi est un’esperta manna de istòria bosinca.

A sas letziones pro imparare a iscrìere, a lèghere e a faeddare mègius in sardu, difatis, ocannu si b’aunint letziones itinerantes pro connòschere mègius sos logos mentovados in sos testos chi semus leghende a intro de su cursu.

Sa prima essida didàtica l’amus fata su 17 de làmpadas peri “Sa piata” chi fiat su coro econòmicu de sa tzitade, movende dae “Crèsia Mazore” e andende a bellu a bellu a connòschere sas domos de sos “ricos de Piata” chi ant fatu s’istòria de Bosa. Amus bidu sa meridiana antiga, sa “Puntana Manna”, su rione de “Modoleddu” (chi fiat comente una bidda a contu suo) e tantos àteros monumentos istòricos de sa Bosa de unu tempus, finas a imbàtere a su “Palatu don Carlos” in ue nos semus pasadas.

Un’esperièntzia bella a beru, chi isperamus de torrare a repìtere in s’atùngiu ca sa tzitade tenet tantas prendas cuadas de mustrare a chie las cheret bìere.