"L'ultima pia illusione"

Sa die de eris at marcadu sa làcana.

A pustis de cussa risposta dada dae su MIUR a unu mastru ("La Spending Review declassa la lingua sarda a "dialetto" sardo, quindi toglie la tutela e i conseguenti finanziamenti alla scuola") non si podet prus fàghere contu de nudda, isperende chi pro more de sa bona voluntade (de chie?) calicunu (chie?) s'impignet a nche fàghere intrare sa limba sarda in iscola (cando? e comente?) pro chi sos pitzinnos no la perdant.

Finas a como, belle totu sos Sardos ant pensadu chi sa limba s'imparat pro sièntzia infusa, sena la faeddare. "B'at a pensare s'iscola. Tocat chi bi penset s'iscola. S'iscola, si devet impignare".

Abbastare diat custa iscola, cando a custos pitzinnos non b'at niunu chi los chistionet in sardu! Abbastare diant custos mastros, sena istrumentos didàticos, sena formatzione, sena incoragiamentu perunu, fìgios de una cultura chi los at crèschidos cun sas paràulas de Manzoni chi cheriat s'Itàlia "una d'arme, di lingua, d'altare, / di memorie, di sangue e di cor".
Abbastare si deet.

Como chi su MIUR nch'at bogadu finas s'ùrtima "pia illusione" (pro la nàrrere cun Tex Willer chi de gherras contra a s'ingiustìtzia nd'at fatu bona chedda), at a èssere ora de abèrrere sos ogros e de cumprèndere una bona borta chi si a sa limba nostra non bi pensamus nois non b'at a pensare niunu.

NOIS in su senso de DEO, TUE, ISSU, OGNUNU, cun s'impignu personale de faeddare sena timòria, de pesare sos pitzinnos in sardu, de non pensare chi chie faeddat in sardu fora dae domo est maleducadu.

Roberto Bolognesi lu narat in manera colorida: "Is Sardos s’ant fatu s’idea – ki benit dae is traumas sufridos in sa scola – ca a faeddare in sardu siat cosa de maleducados, comente a essire a mudandas in sa ruga" (leghe totu).

Comente at iscritu su poete fiammingu Pieter Jan Renier in àteros tempos "Sa limba est sa bandera de sos pòpulos presoneris: chie non tenet limba non tenet pàtria". In tempos prus antigos, Isidoro de Siviglia aiat iscritu "Ex linguis gentes, non ex gentibus linguae" ('Sunt sas limbas chi faghent sos pòpulos, non sos pòpulos chi faghent sas limbas').

NOIS la devimus tutelare, sa limba nostra, sena isetare permissos dae su MIUR nen dae àtera istitutzione peruna.