Pro totu sos genitores chi diant chèrrere pesare in sardu sos fìgios ma tenent dùbbios de onni tipu, oe publicamus unos cantos artìculos interessantes iscritos dae Bobore Bussa, nugoresu tramudadu a Isvètzia chi at detzisu de pesare sos fìgios in sardu mancari italòfonu de nàschida.
In su blog suo chi si narat "Balentias e àteros contos", Bobore faghet un'anàlisi crara e cumpleta de sa situatzione linguìstica in Sardigna, faghende·si agiudare finas dae sos fìgios in calidade de intervistados.
"Nois l'amus detzisu 'a taulinu' [de pesare sos fìgios in sardu] - narat Bobore - ca non semus sardòfonos naturales. Babbos e mamas nostros nos ant pesadu in italianu e nois a pitzinnos amus imparadu a cumprèndere su sardu ma no a lu faeddare".
Su cussìgiu chi dat Bobore a chie si cheret aviare in custa àndala est de "Poderare su chi s'est detzisu, de non mollare, màssimu si b'at amigos o parentes chi si nde rient ca issos sunt sardòfonos naturales e nd'ischint prus chi non bois".
Pro lèghere sos artìculos bos podides cullegare a sos link chi ponimus in fatu:
1° puntada (detzisione de pesare in sardu sos fìgios);
2° puntada (pro ite a bortas pitzinnos chi intendent su sardu in domo faeddant in italianu);
3° puntada (a propòsitu de su sardu in iscola).
Sos artìculos sunt interessantes meda e s'isetu est chi sa de 4 puntadas no istentet a essire.
Nessun commento:
Posta un commento
Nota. Solo i membri di questo blog possono postare un commento.