25/11/19

"Dibatimentos in sardu ebbia" - Proposta de Sollai pro sa difesa de sos pastores

Foto: https://terraevita.edagricole.it/
Sunt prus de 500 sos pastores chi ant retzidu avisu de garantzia pro sa "protesta de su late" de su mese de freàrgiu 2019.
"A peus de su dannu, sa befe" diat nàrrere su ditzu e si biet chi lu pensant finas paritzos avocados, chi si sunt organizados pro difèndere sos pastores acusados.
S'assòtziu Libertade, pro esempru, at preparadu unu vademecum cun 10 cussìgios de base pro chie esseret retzidu s'avisu: prima cosa de fàghere est de lu ritirare e de cuntatare sos nùmeros postos a disponimentu, pro cumprèndere cale sèberu difensivu est prus adatu pro onni persone. Custu cheret fatu luego, intro de 15 dies dae sa notìfica.
Gianfranco Sollai, avocadu dae semper atentu a sos bisòngios de su mundu agro-pastorale sardu, dat tres cussìgios importantes: 1) non cherent atzetados sos ritos abbreviados, ca sa veridade nd'essit in su dibatimentu; 2) non cheret atzetada s'assistèntzia legale gratùita ("gratuito patrocinio") pro non dare a s'Istadu sa possibilidade de fàghere controllos in sas aziendas; 3) cherent pretesos sos atos e su dibatimentu in sardu, chi permitit a sos pastores de espònnere sas resones issoro in sa limba chi lis est prus abituale.
Sa lege natzionale 482 permitit sos dibatimentos in sardu giai dae su 1999 e sas Procuras non si nde podent negare, si non cherent chi si chirchet sa Corte Costitutzionale pro chistiones de incostitutzionalidade.
"Si sas Procuras de sa Repùblica ant decraradu batàllia - narat Sollai - ateretantu devent fàghere sos pastores paris cun sos avocados".
Tzertu chi, si sos pastores esserent atzetadu, pro sas Procuras nde diat essire una bella "gatta da pelare".
Ascurta s'intervista a s'avocadu Sollai fata in YouTG


Nessun commento:

Posta un commento

Nota. Solo i membri di questo blog possono postare un commento.