"Agiudu torradu in tempus de Coronavirus"

Foto: https://www.isnews.it/

"Si non nos podimus addobiare, nos podimus nessi agiudare". Cun custa idea, su grupu de ANS (Assemblea Natzionale Sarda) at detzisu de pònnere in motu una retza de solidariedade chi diat agiudu a chie nde tenet bisòngiu, in custos tempos tristos in ue s'emergèntzia causada dae su perìgulu de contàgiu dae coronavirus òbligat sa gente a abarrare in domo.

Tenende in mente su sistema sardu antigu de s'agiudu torradu, est a nàrrere de torrare su praghere retzidu faghende·nde un'àteru, sos giòvanos de ANS ant creadu su grupu Facebook "Agiudu torradu in tempus de Coronavirus", chi funtzionat in una manera fàtzile meda: chie tenet bisòngiu de agiudu iscriet #CHIEDO, chie si ponet a disponimentu pro carchi cosa iscriet #OFFRO, chie pedit informatziones iscriet #INFO, e a pustis sa tzitade o bidda de riferimentu. Sa pàgina est aberta a totus pro chi totus iscant chi non sunt solos mancari sos acadimentos de custas dies los òblighent a istare in domo a bortas a sa sola.

In su grupu si b'agatat de totu: b'at gente disponìbile a fàghere cumandos a betzos e malàidos o ripetitziones gratùitas in Skype; b'at gente chi faghet cursos gratùitos de inglesu o de àteras matèrias; b'at gente chi ponet a disponimentu apartamentos, veturas e servìtzios pro chie est traballende contra a su coronavirus; b'at professionistas chi dant consulèntzias fiscales gratùitas; b'at finas dotores in pensione chi faghent consulèntzia gratùita online.

Un'idea bella meda, duncas, chi faghet torrare s'isperàntzia in custas dies tristas de barantena obligada. 

Ma chie sunt sos chi ant aparitzadu sa pàgina? S'Assemblea Natzionale Sarda (ANS) est un'assòtziu apartìticu "chi traballat pro fàghere crèschere sa cussèntzia natzionale fintzas a s'autodeterminatzione de su pòpulu sardu". Dae su chi iscrient in sa pàgina issoro, pro istatutu "no at a èssere mai unu partidu polìticu e duncas mai s'at a pòdere candidare pro is eletziones". Faghet polìtica in mesu de sa gente "pro fàghere nàschere una Sardigna solidale, responsàbile e pròspera".

Chie cheret visitare sa pàgina Facebook de "Agiudu torradu" podet incarcare in custu link.

(GFP)