Su coronavirus ispiegadu a sos pitzinnos

Sos pitzinnos puru, comente sos mannos, podent istare male e in ànsia pro neghe de s’emergèntzia sanitària de su Covid-19. Pro los agiudare a espressare sas emotziones issoro e a cumprèndere ite est capitende sena de los fàghere a tìmere, s’Unicef at aprontadu una ghia pro genitores in 8 puntos. 

 1. Faghide.los faeddare e iscurtade

Faghide.nde faeddare sos pitzinnos bostros. Chircade de cumprèndere ite totu ischint e dade.lis su praghere. Si sunt piticos meda e no ischint nudda de s’epidemia, non b’at bisòngiu de los fàghere a tìmere, ma prus a prestu est s’ocasione pro  lis ammentare s’importàntzia de s’igiene, sena faeddare de timòrias noas. Unu ambiente seguru in ue permìtere a su pitzinnu bostru de faeddare liberamente, disignos, contos e àteras atividades agiudant a mantènnere aberta sa comunicatzione. Est  de importu a non discarculare o ignorare sos oriolos issoro, leare in cunsideru s’istadu de ànimu issoro e lis nàrrere chi est naturale a tìmere in custos casos. Faghide.lis a cumprèndere chi los iscurtades dende s’atentzione prus manna e tranchillizade.los narende.lis chi podent faeddare cun bois e cun sos mastros cando cherent.  

2. Ispiegade.lis sas cosas a manera de las cumprèndere

Sos pitzinnos tenent diritu de ischire ite sutzedet in su mundu e a su matessi tempus sos mannos  tenent sa responsabilidade de los preservare dae sa timòria. Duncas tocat de impreare unu limbàgiu adatu a s’edade, bìere sas reatziones, èssere sensìbiles a su livellu issoro de ànsia. Si no ischides rispòndere a sas preguntas issoro, non tiredas a indovinare. Chircade paris sas rispostas in sitos web sèrios ispieghende sas cosas a sos pitzinnos.

3. Ammustrade.lis comente defensare a issos e a sos amigos

Una cosa de importu mannu est de nàrrere a sos pitzinnos de si samunare sas manos bene e bortas meda in sa die. Lu podides fàghere impreende cantones o giogos gasi imparant divertèndesi. Tocat puru de lis nàrrere comente tussiare o isturridare e de avisare luego cando non istant bene.  

4. Tranchillizade.los

Sos pitzinnos, dae totu su chi bient in sa televisione e dae sas cosas chi intendent, podent tìmere meda e pensare de èssere in perìgulu mannu. Duncas tocat a sos mannos a los tranchillizare, ispieghende sas cosas, chirchende de fàghere sas cosas de semper e faghìndelos giogare e ispidientare.

5. Perìgulu de discriminatzione ratziale

Una cunsighèntzia de s’epidemia est puru sa discriminatzione ratziale in su mundu. Ispiegade a sos pitzinnos chi su coronavirus non b’intrat nudda cun sa ratza, sas orìgines o sa limba de sas persones. Narade.lis chi sa discriminatzione est una cosa fea meda e chi ognunu devet fàghere sa parte sua pro agiudare sos àteros e èssere gentile cun totus.

6. Chie gherrat contra a su virus

Est de importu mannu chi sos pitzinnos cumprendant chi in custu momentu sas persones si sunt agiudende una cun s’àtera e chi sos dotores e operadores sanitàrios traballant meda, die e note, pro su bene de totus.

7. Tenide.bos contu

Sa mègius manera de agiudare sos pitzinnos a afrontare sa crisi est cussa de resurtare a la afrontare a su mègius sos mannos. Sos pitzinnos ant a reagire in base a su cumportamentu e a sas reatziones bostras. Dedicade tempus a cosas chi bos fatzant rilassare e ais a trasmìtere sa calma e sa serenidade a sos pitzinnos puru.

8. S’importàntzia de sa manera de nde faeddare

Est importante chi sos pitzinnos non siant in ànsia. Osservade comente si cumportant, comente faeddant e comente si movent. Faghide a manera de èssere semper disponìbiles cun issos e chircade semper de los tranchillizare.

(M.G.S.)