Ispàssios virtuales in tempus de coronavirus

Immàgine iscarrigada dae Internet

Non potzo essire a bìere su mundu? Tando su mundu benit a domo mia.

In custu tempus de cuarantena, chi su mundu lu bidimus dae sa frenesta ebbia, s'at ativadu unu muntone de gente pro fàghere a manera chi sa cuarantena esseret su prus pagu dificultosa possìbile, dende sa possibilidade de s'ispassiare sena dèvere essire dae domo.

Mentovamus ebbia calicuna de sas initziativas bellas chi sunt essidas a campu, ischende però chi bi nd'at àteras meda chi nois mancu connoschimus.

Sardinia Media at postu a disponimentu documentàrios, vìdeos e film pro totu sos chi si registrant in su situ.

Pro sos chi lis agradat a lèghere, sa Rai ponet a disponimentu unos chentu audio-libros, dae Addio alle armi de Hemingway a Vita di Galileo de Brecht.

Sos amantiosos de sos fumetos si podent ispassiare leghende fumetos de autores italianos che Manuele Fior o Marco Corona e internatzionales che Philippe Druillet o Shintaro Kago.

A chie l'agradat sa poesia "a bolu", Domus de Janas l'at fatu unu regalu bellu a beru, ca at postu a disponimentu su situ nou de su museu de sa poesia improvisada, in ue b'at istòria, fotografias e garas de sos protagonistas de custa forma de arte.

Chie non cheret rinuntziare a sos biàgios si podet cullegare a sos sitos "Si Viaggia" o "GreenMe", in ue si podent fàghere biàgios virtuales a logos meda de su mundu.

A chie l'agradat s'arte, podet visitare a manera virtuale sos museos italianos e sos de mesu mundu.
Non mancant sos sitos pro sos prus piticos, comente "Lezioni sul sofà" chi ponet a disponimentu giogos, laboratòrios, vìdeos e contos (totu sena pagare nudda).

Mancari in domo, duncas, tempus pro s'annoiare non bi nd'at. 

(GF.P.)