Traballare in "smart working" in tempus de pandemia

Sunt giai chidas meda chi semus vivende in emergèntzia e semus imparende a cunvìvere cun su coronavirus chi, mancari non si biet, est semper presente in sos pensamentos nostros. In totu custu tempus amus imparadu puru a connòschere unu vocabulàriu nou collegadu a su virus, est a nàrrere paràulas noas, italianas e inglesas meda, chi impreant totus sas autoridades e sos òrganos de informatzione e chi onniunu de nois, oramai, s’est abituende a las intèndere e impreare onni die. Una de custas est “smart working”, paràula intrada oramai in su faeddare comune. Ite cheret nàrrere? Est unu mètodu de traballu chi sos traballadores dipendentes podent fàghere a distàntzia, dae domo. Custa definitzione no est nàschida como, si nde faeddaiat giai in passadu fintzas cun una lege apòsita. Ma como, dae cando s’est difusa s’emergèntzia de s’epidemia, su Presidente de su Cussìgiu de sos Ministros at emanadu unu decretu, chi tenet valore pro cantu durat s’emergèntzia, pro chi sos traballadores potzant traballare dae domo pro èssere prus tutelados. Una cosa de importu chi cunsentit de sighire a traballare in seguresa e trancuillidade, organizende.si su traballu in sa mègius manera e, bortas meda, cun rendimentu prus mannu.
(M.G.S.)