Paradura pro su Comitadu NoNucle NoScorie

Su 5 de ghennàrgiu 2020 sos Ministèrios de s'Isvilupu econòmicu e de s'Ambiente ant dadu campu a sa sotziedade Sogin de publicare sa mapa de sos sitos ipotizados comente depòsitu de sas iscòrias radioativas: sa Sardigna b'est mentovada pro 14 sitos, mancari in custos annos sos Sardos apant naradu "Nono" in manera crara cun su referendum de su 2011, cun leges e documentos regionales, cun delìberas de Comunes e Provìntzias, cun determinatzione de sa Cunferèntzia Episcopale Sarda.

Su Comitadu NoNucle NoScorie, nàschidu pro aunire totu sos Sardos de cale si siat colore polìticu in sa batalla contra a custu perìgulu, s'est postu luego in movimentu pro istudiare sos documentos e fàghere atividades de informatzione e sensibilizatzione.

In custu momentu serbit de produire materiales chi informent sa gente de sa gravidade de su perìgulu, e dinari non bi nd'at. Pro custa resone est nàschida una "Paradura" (in inglesu diat èssere "Crowfounding"): chie tenet praghere de agiudare podet intrare in su link Paradura pro su Comitadu e dare su chi podet pro sustènnere su Comitadu e sas atividades suas.

S'istòria de sas batallas fata in custos annos est bene sintetizada in duos vìdeos fatos dae sa giornalista e iscritora Lisa Corimbi: in sa Parte I b'est sa cronistòria e in sa Parte II b'at deghe resones pro nàrrere NONO a custa minetza.

(GF.P.)