Ìcaro - Una trasmissione de Sardegna Uno

Immàgine dae su web

Ogni giòbia a sas 9 e cuartu de sero (h 21,15) in Sardegna Uno Tore Cubeddu faeddat de bisos e de libertade in sa trasmissione "Ìcaro" paris cun Alexandra Porcu, Maria Barca, Ivo Murgia e Elio Turno Arthemalle.

Sa trasmissione, finantziada cun su bandu Imprentas (L.R. 22/2018 art. 22 - annualidade 2020-2021), est comintzada su 16 de cabudanni 2021 e faeddat de impresas, de progetos noos fatos dae gente "visionaria" chi no at tìmidu de ispàrghere sas alas a cara a su sole, comente cussu Ìcaro fìgiu de Dèdalo fuidu dae sa presonia in Creta cun alas de puma e chera. Pro sa balentia de chèrrere bolare tropu a curtzu a su sole nd'aiat pèrdidu sa vida e est abarradu a sìmbolu eternu de ànimu e de punna a sa libertade.

Su matessi disìgiu de libertade chi ispinghet tantos imprendidores sardos a provare sas fortzas issoro a dispetu de sas dificultades, pro dare una forma a sos sònnios.

Ogni puntada de Ìcaro presentat sas istòrias de custos imprendidores "visionàrios" chi non timent de bolare a cara a su sole.

Sas puntadas betzas si podent abbaidare incarchende in sa pàgina de Ìcaro Sardegna Uno.

(GF.P.)