Fotografia de Patrizia Bua (iscarrigada dae su web) |
S'idea est bènnida a unu grupu de babbos e de mamas chi si narat "Spaciada sa Bregùngia", genitores originàrios de totu sa Sardigna chi sunt pesende sos fìgios in sardu ca creent chi su plurilinguismu lis diat "una màrcia in prus" comente narant sos ùrtimos istùdios de linguìstica acuisitzionale.
In Catalugna, in Còrsica e in àteros logos s'iscola "immersiva" si faghet dae tempus meda e sos resurtados cunfirmant chi sos pitzinnos nd'essint prus abbistos, andant mègius in iscola e sunt prus abertos a su mundu.
Pro ite s'est pensadu de comintzare dae su niu? Ca "de su primu mesi finsas a is 7 annus is pipius funt spòngias, pigant totu su chi podint e arrennescint a imperai finsas 5 linguas in su matessi tempus. Duncas primu si incumentzat e mellus est" narat Gianni Farci, unu de sos babbos impignados in su progetu.
Bidu chi sa limba est parte importante de s'identidade de una persone e de una comunidade, pro sa Sardigna est una richesa manna chi sa limba istòricu-identitària sua siat ancora bia, mancari in suferèntzia ca sa limba ufitziale (s'italianu) est intrende in totu sos setores de sa vida e nch'est boghende su sardu finas dae sa vida privada. Custu progetu ponet in campu istrategias noas pro l'amparare e pro la trasmìtere a sas generatziones noas.
Pro nd'ischire de prus podides lèghere s'artìculu de AGI e s'artìculu de su blog de Enrico Lobina.
(GF.P.)
Nessun commento:
Posta un commento
Nota. Solo i membri di questo blog possono postare un commento.