Su traballu, intradu in sos chimbe nùmenes propostos pro su prèmiu "Targhe Tenco" 2020 (su reconnoschimentu prus mannu pro sa cantzone de autore italiana), est unu biàgiu in sas orìgines e in s'apartenèntzia a unu logu o a tantos logos.
Sardigna e Ùmbria sunt duos mundos chi a manera issoro sunt ambos "ìsula": sa Sardigna, inghiriada dae su mare chi est lìmite e potentzialidade, e s'Ùmbria inghiriada dae montes chi la ìsulant e li faghent de amparu. In custos mundos, isulados in manera diferente, sas cosas antigas e sas cosas noas andant paris e sa limba est comente unu pòsidu: su sardu, impreadu paris cun su dialetu eugubinu e cun s'italianu, bogat a campu bisos e disìgios chi si cullegant a s'infàntzia de sa cantante.
"Deo so fìgia de babbu sardu e de mama umbra - narat Sara Marini - e giai dae pitzinna mi so pòdida cunfrontare cun culturas diferentes. Apo bìvidu in Scheggia, una bidda umbra de 1500 abitantes e apo fatu sas vacantzas in Bosa, in ue bivent babbu e totu sos parentes suos. Giaja mia onni istiu mi giughiat cun issa a sas festas de sas biddas a intèndere sos grupos folk, e est in ie chi apo connotu sa mùsica traditzionale fata de organetes, chiterras e launeddas".
Sas cantzones "Una rùndine in sas aeras" e "Bentu lentu" sunt iscritas a bator manos cun Nicolina Marini, àteros testos sunt fatos paris cun sa cantautora eugubina Claudia Fofi.
Chie nde cheret ischire de prus podet lèghere s'artìculu de "Rockit.it".
Sa cantzone "Torrende a domo" si podet ascurtare incarchende in custu link.
(GF.P.)
Nessun commento:
Posta un commento
Nota. Solo i membri di questo blog possono postare un commento.