“Fàulas” – Su fèstival chi bòrtulat sas frases fatas in contu de sa Sardigna

Pro nde betare a terra sos istereòtipos cullegados a sas ideas de Sardigna chi tenet gente meda (siat continentales siat sardos) naschet su fèstival “Fàulas” (‘bugie, falsità’), chi giai in su nùmene manifestat una voluntade de cambiamentu e de novidade.

Su fèstival est a sa prima editzione e s’at a fàghere in Aristanis sàbadu 3 e domìniga 4 de nadale.

“Sas frases fatas in contu de sa Sardigna e de sos sardos sunt meda, e a bortas sunt sos sardos matessi a las torrare a nàrrere, modifichende sa realidade, dispretziende sa vida culturale, econòmica e sotziale de sas comunidades issoro” ispiegat Andrea Laterza, presidente iscadidu de Assemblea Natzionale Sarda (ANS), chi at organizadu s’eventu.

De custas frases fatas bi nd’at chi sunt sìmiles a su serrone (‘il tarlo’), s’impreant ogni borta chi si faeddat de sardos e de Sardigna: “Pocos, locos y mal unidos”, “Su sardu non tenet mentalidade de imprendidore”, “Tenimus limbàgios diversos, non nos cumprendimus a pare dae una bidda a s’àtera”, “Cale sardu? Mègius a imparare s’inglesu”, “Sos sardos sunt imbidiosos”, etc.

“Su fèstival “Fàulas” cheret analizare custa immàgine de se chi tenent sos sardos e bogare a campu sos istereòtipos” narat Riccardo Pisu Maxia, vitze presidente iscadidu de ANS.

In su fèstival b’at a àere giogos, leturas, mùsica, ma su momentu prus importante at a èssere cussu de sos “ANS Talk”, in ue sete espertos ant a tratare argumentos diferentes in monòlogos de 15 minutos. Sos espertos sunt: Alessandra Guigoni (antropòloga), Vittorio Sanna (radiotelecronista), Sabrina Biru Tomasi (chircadora in su setore turìsticu), Francesco Aresu (giornalista), Gianfranca Salis (archeòloga), Micheli Keki Ladu (iscritore e espertu de limba sarda) e s’at a cullegare finas Alessandro Pili sìndigu de Scraffìngiu!

Chie cheret papare màndigos de sa traditzione l’at a pòdere fàghere pro more de s’agiudu de sos locales aristanesos.

Su programma cumpletu s’agatat in https://www.assembleasarda.org/faulas-2022/ans-talk/.

(GF.P.)