In Biella “Santa missa cantada” in sardu cun su cardinale Miglio e su pìscamu Farinella

Su 20 de santandria 2022, pro sa solennidade de Cristos Re de s’Universu, su Tzìrculu culturale sardu “Su Nuraghe” de Biella at organizadu una missa in sardu in s’àrea monumentale de Nuraghe Chervu, in s’intrada de Biella.

Sa Missa l’at presèdida su cardinale Arrigo Miglio (archipìscamu metropolita emèritu de Casteddu) e b’at cuntzelebradu mussegnore Roberto Farinella (pìscamu de sa diòtzesi de Biella). Fiant presentes autoridades religiosas, tziviles e militares cun su sutasegretàriu de Istadu a su Ministèriu de sa Giustìtzia on. Andrea Delmastro Delle Vedove, su presidente de su Cussìgiu regionale de su Piemonte Stefano Allasia, sìndigos bènnidos dae sos comunes italianos, prefetu e sìndigu de Biella.

Unas cantas partes de sa missa las ant fatas in sardu, faghende riferimentu a sos testos litùrgicos in limba sarda chi sunt prontos de presentare a sa Cunferèntzia Episcopale Italiana (CEI) pro otènnere sa “confirmatio” dae su “Dicastero per il culto divino e la disciplina nei sacramenti”.

Sa parte musicale l’ant animada su cuncordu “Planu de Murtas” de Putumajore, “Le voci di Su Nuraghe” de Biella e sa banda militare de sa Brigata tataresa.

Finida sa missa, sa protzessione de gente est andada a cara a Nuraghe Chervu, cussu nuraghe fraigadu dae su Tzìrculu de sos sardos in su 2008 pro ammentare sos mortos de sa Gherra Europea.

In ie, su su cardinale Miglio e su pìscamu Farinella ant beneitu su segundu grupu de pedras de memòria, chi ammentant nùmenes, datas e logos de provenièntzia de sos mortos e a pustis sas fèminas sardas, sighende unu ritu antigu, lis ant betadu frores e trigu.

Su vìdeu de sa missa si podet abbaidare incarchende in su link https://www.youtube.com/watch?v=vhTtLOVLb2o

(GF.P.)