Ammentu de Antoni Zedda - Sas fotografias de sa "Duas Dies pro sa Limba" 2007

Sàbadu 28 de santandria est mancadu Antoni Zedda, sìndigu de Montresta. Aiat comintzadu s'atividade amministrativa sua in su 2005 e, essende chi s'ufìtziu limba sarda est operativu in Montresta dae su 2006, amus tentu sa possibilidade de collaborare cun issu pro annos meda.

L'amus connotu e apretziadu comente sìndigu "visionàriu", amantiosu de sa cultura,  vulcanu de ideas e  passione pro su traballu suo. Un'òmine onestu, ùmile in su tratare cun sa gente ma prontu a gherrare pro sos ideales fundantes de sa vida sua: identidade, rispetu de s'ambiente e de sas traditziones, abertura a su mundu e a sas cosas noas, amore pro sa limba sarda.

In totu custos annos at fatu de Montresta una prenda, rica de cultura e de cosas bellas.

A nois, chi tantu l'amus istimadu, nos praghet a l'ammentare cun sas fotografias bellas de sa prima initziativa in limba sarda chi amus fatu in ie: sa "Duas Dies pro sa Limba" de su 2007 in ue amus resonadu de limba, comunicatzione e pianificatzione linguìstica. Sa partetzipatzione sua e de sos àteros amministradores a sos momentos de traballu non fiat una cosa iscontada e l'amus apretziada meda.

"A nche lu connòschere in sa Santa Glòria", comente si usat a nàrrere... e nos paret chi lu semus bidende riende·si·nde cun ària sorniona.

Adiosu, Anto'...

(GF.P.)