Mesaustu – Orìgine de sa festa

Dae inoghe a pagas dies festamus sa festa de Mesaustu. Comente naschet custa festa?

In s’annu 18 a.C. s’imperadore Ottaviano Augusto (chi at dadu su nùmene a su mese de austu) aiat istabilidu chi, finidos sos traballos de campagna, sa gente esseret tentu unu tempus de pasu e de festas. Li naraiant Feriae Augusti (‘riposo di Augusto’) e teniat orìgine dae sa traditzione de sos Consualia, festa dedicada a Conso deus de sa terra e de sa fertilidade.

In custu tempus si faghiant festas e cursas de caddos in totu s’Imperu, e sos massajos costumaiant a fàghere sos augùrios a sos meres, e a retzire dae issos un’istrina.

Sas dies de pasu (e de festa) duraiant totu su mese e su 13, in particulare, si festaiat a Diana, signora de sos buscos, protetora de sos animales agrestes e bardiana de benales e rios.

Sèculos a pustis, sa crèsia catòlica at fatu sua custa festa, dedichende·la a Nostra Signora Assunta e ispostende sa data a su 15. Su dogma de Maria artziada a Chelu in ànima e corpus l’at proclamadu paba Pio XII in su 1950.

Sa gente cando at comintzadu a festare su Mesaustu cun gitas a campagna e a mare? Sas “gitas fuori porta” sunt comintzadas in sos Annos Binti, cando su Fàsciu at organizadu sos “Trenos populares de Mesaustu”, chi permitiant a sos italianos de biagiare peri s’Itàlia cun billetes baratos. S’oferta baliat pro su 13, 14 e 15 de austu e permitiat duos tipos de essida: “Gitas de una die” (intre sos 100 chilòmetros) e “Gitas de tres dies” (100-200 chilòmetros). In custa manera sos italianos ant comintzadu a bìere logos diversos sena pagare meda.

E in su restu de su mundu? S’Irlanda, chi est catòlica meda, su 15 de austu festat s’Assuntzione de Maria e finas in Cànada b’at festa natzionale in onore de Nostra Signora.

S’Ìndia su 15 de austu ammentat sa Die de s’Indipendèntzia dae sa Gran Bretagna (15 de austu 1947) pro more de s’impignu de Mahatma Gandhi.

In àteros logos (Istados Aunidos, Gran Bretagna, Rùssia, Tzina) su 15 de austu est una die che a totu sas àteras.

Ah, a propòsitu: in sardu non si narat Ferragosto ma Mesaustu, e s’orìgine de sa paràula est bastante crara (‘sa metade de su mese de austu).

(GF.P.)